Tilburg

Adriaen sone wijlen Jans Emmen de Canter woonende tot Tilborch aende Rijth heeft wittelick ǁ ende erffelick vercoft Seberden Janss. de Raet eenen jaerlicken ende erffelicken chijns van vijftien Carolus gulden tot twintich ǁ stuijvers goets gancbaers gelts elcken gulden gereeckent, te betalen alle jaer erffelick opten negensten dach der maent Aprilis ǁ ende voor den iersten termijn van betaelinge opten negensten Aprilis anno xvi c sevenenveertich, ende binnen deser stadt vrij ǁ van alle beeden, exactien, subventien, tiende, twintichste, honderste, meerdere ende mindere penningen, commeren, scattingen ǁ ende lasten, gewoonlicke, ongewoonlicke, ingestelt ende naemaels ingestelt te wordden egeene lasten uut gescheijden ǁ te leveren, van ende uut een dorde gedeelt in de helfte van huijs, schuere, schop, met genne gronden, hoff, boomgart ǁ ende erfenisse, soo saij als weijlant daertoe behoirende, groot int geheel omtrent veertich loopensaten  lants gelegen ǁ onder de voors. parochie van Tilborch aende Rijth ende Schijve bij het hagelcruijs aldaer, tussen erffenisse Michiel ǁ Goijerts de Veth westwaerts aen d’een zijde, ende tussen erffenisse de wedue mette kijnderen Cornelis Michiel ǁ Daniels aen d’ander zijde, streckende van seeckeren wech oft steeghsken tot aende gemeijn straet, soo hij verclaerde ǁ vande selven coopere metten erffrecht te hebben ende te besitten ende heeft die voorn. vercooper den voors. chijns den ǁ voorn. coopere opgedraegen met helmelinge vertijdenis inne maniren in dien gewoonlick zijnde, geloevende ǁ die voors. vercooper als sculdenaer principael op verbant van sijnen persoon ende alle zijne goederen present ende ǁ toecomende, dat hij den voorn. coopere vande voors. chijns sculdige ende gerechte sal doen warantscap, ende dat ǁ hij allen anderen commer, calangie ende aentael int voors. onderpandt wesende oft comende den voorn. coopere ǁ aff zal doen geheelicken, uut genomen een derde gedeelt inde helfte van drije vierdel vaten roggen aende ǁ Convente vande Baseldonck binnen deser stadt, ierst jaerlicx van rechtswegen daeruut te vergelden staende, ǁ soo hij verclaerde, ende dat hij oijck 't voors. onderpandt voor de betaelinge des voors. chijns den voorn. coopere ǁ jaerlicx daeruut, als voor, te vergelden altijt goet genoch ende welduegende sal maecken ende houden mit conditien ǁ in desen toegedaen dat de voorn. vercooper den voors. chijns ten allen tijden zal mogen lossen, ende quijten ǁ teffens ende ten eenemael mit de somme van drije hondert Carolus gulden tot twintich stuijvers goets ǁ gelts elcken gulden gereeckent, in specie van patacons tot vijftich stuijvers t’stuck, ende metten loopenden ǁ jaerchijns ende achterstellen ten tijde der afflossinge daervan t’achter ende ombetaelt staende, behoudelick ǁ dat men den voors. los sculdich ende verbonden sal wesen een halff jaer te voorens wittelick te vercondigen ende ǁ op te seggen, getuijgen waeren hierover scepenen in s Hertogenbossche Laureijns van Berckel ǁ ende Davidt vande Bosch, gegeven den negensten dach der maent Aprilis in 't jaer ons Heeren duijsent ǁ sesshondert sessenveertich

Littera emptoris [***]

J. van der Meulen

Dorsale aantekening:

Tilborch ǁ constitutie van xv gulden