Tilburg

Gielis zoen wilner Jans Zwagemakers als mombaer ende Joest zoen wilner Jan Leijten als toesiender van Joesten, Willemen, ǁ Cornelisen ende Jannen gebruederen, Kathelijnen, Marikene ende Corneliskene gesusteren onmondige kijnderen wilner Peters ǁ Jans Zwagemakers ende Anne sijnder huijsvrouwen dochter wilner Jan Leijten daer sij mombaer ende toesiender voerscreven ǁ voer instaen ende geloeft hebben ende dat int bijwesen ende tegenwoirdicheijt van Joesten den oudtsten zoen wilner Peters ǁ ende Anne voergen. ende tot het ghene des hier naevolght soe verre in hem was consent dragende ende hem ende sijn goeden ǁ verlovende een stuck erffs tot weijde liggende dordalff lopensaet ende vier roeijen off daer ontrent, begrijpende off soe groot ǁ ende cleijn als men tselve metter maten bevijnden sal gelegen inder prochien van Tilborch ter plaetssen geheijten in der ǁ Schijve tusschen erffenis Marcelis Aerdtsz van Vessen aen deen sijde ende tusschen eenen ackerwech geheijten den Hoevenschen ǁ Kerckwech aen dander sijde hodende metten beijden eijnden aen erffenis Anne voers. met hoeren kijnderen, alsoe sij seeden, ǁ hebben in wittelijcken ende erffelijcken vercoft overgegeven ende opgedragen Jacoppen zoen Huijbrechts de Wagemaker ǁ met affgaen ende vertijen als dat gewoenlijcken ende recht is, Ende hebben geloeft Gielis ende Joest mombaer ende ǁ toesiender voergen. inden naem vanden onmondigen kijnderen voergen. ende op verbijntenisse der selver onmondiger ǁ kijnderen voers. gueden nu hebbende ende naemaels vercrijgende, Jacoppen coper voers. dit stuck erffs voerscreven ǁ te waren loss ende vrij gelijck men loss ende vrij erve schuldich is te waren uuijtgenomen dat hij Jacop coper ǁ voers. daer uuijt sal gelden een halff mud roggen erffpachts der maten van Tilborch aen Joesten van Ierssel van ǁ Oesterwijck te betalen ende noch dartich stuver erffchijns aen heeren Peteren Soffaerts priester tot Goerl te betalen te lossen ǁ staende die voers. dertich stuver met zeven ende twintich Karolus gulden achtervolgende zekere brieven daer aff sijnde alsoe ǁ sij seeden, ende daer toe dat hij tsheeren scauwe vanden waterlaet aen deen eijnde vanden stuck erffs voers. lopene sal onderhouden ǁ naeder onder gewoenten gelovende voirts die voers. mombaer ende toesiender opte verbijtenisse als voer. Dit vercopen overgeven opgedragen ǁ affgaen ende vertijen voers. altijt vast ende stendich te houden ende inne der onmondiger kijnderen voers. naer te doen houden sonder ennich weder ǁ seggen ende allen anderen commer ende calangien daer op comende altemael aff te doen den selven orconden hebben hier over geweest scepenen ǁ in Tilborch ende in Goerle Anthonis Denijs Meijnaerts ende Cornelis Claess van Ghierl die den zegel hoirs gemeijns scependoms ǁ desen brieff open aen hebben doen hangen int jaer ons heren dusent vijff hondert neghen ende veertich den darthiende dach in November

Dorsale aantekening:

Supportavit ipsus? Anthonij Bacx? ǁ sibi [Beurden] et [Daniels]

Jacob Ghijsbrecht de Wa ǁ gemaker