Tilburg

Wii Ian Peyman, Iacob Huyben, Denis Danels soen, Peter Verschueren, Ian Suyt, Ian van Dun, ende ǁ Ian Vels, scepenen in Tilborch, ende in Goerle, doen cont enen iegeliiken, dat voer ons comen ǁ siin, Mychiel Stappert ende Mathys Henric Beerten als provisoren, der tafelen, vanden heiligen geest ǁ tot Tylborch, ende hebben een conde geleyt, als van, veertien mud roggen, erflix pachs ǁ die in voorleden tiiden,  bewiist siin,  totter fundacien, van Sinte Dingens ende Sinte Barbarae ǁ altaar, inder kercken van Tylborch, daer aff her Iacob Monick, nu ter tiit,  rectoor is, die ǁ daer aff over gegeven heet, een zedulle, van wien hii,  die hoffende is,  inhoudende, alsoe ǁ hier nae volght, die heilige geest, drie mud roggen, Herman Heysten, vier mud twe lopen ǁ Denis Danels soen, een mud viiftien lopen, Peter Mertens soen ende Pouwels Peterssoen ǁ een mud, Ian Meus nu Willem Corneys, twelff lopen, Ian Giiben soen van Boerden ǁ twelff lopen, Adriaen Denis, een halff mud, Willem Leenkens, een halff mud ǁ Gherit van Endenhove halff mud Gherit Peter Eelkens, een halff mud ende Heesken ǁ Gosens,  seven lopen van den welken,  die provisoren in den name der tafelen voirs. ǁ ende die voirges.  personen, ende elc biisonder hen, voir ons bekent hebben, iaerlix ǁ sculdich te siin, geliic voirs. staet, Ende biisonder, die provisoren voirs., van ǁ persones wegen van Tilborch, iaerlix een mud, ende van piilysers erfnis, twe ǁ mud iaerlix Herman  Heysten voirs., uut twe mudsaet lants , aen die Herenvoert ǁ drie mud twe lopen iaerlix, ende  uut den goede tot herenveert,een mud iaerlix ǁ Denis Danels soen voirs., uut twe mudsaet lants, bii die stochasselt een mud ǁ viiftien lopen iairlix, Gherit van Ouwenhoven, uut negen lopensaet lants ǁ aen die velthoven, een halff mud iaerlix, van welker conden voirs., gemaect ǁ siin twe brieve, den enen brieff, voir den rectoor voirs. ende den anderen brieff ǁ voir der tafelen voirs.,  om die een den anderen hier in biistant te doen, ǁ nae inhout der brieven die sii malcanderen dair aff gegeven hebben, in ǁ welker kennissen wy scepenen voirs., bii wil ende consent der parochien voirscreven, ǁ den segel ons gemeyn scependoms desen brieve open aen hebben doen ǁ hangen, op sinte lauwereys avont int iair ons Heren duysent vierhondert ǁ vier ende negentich

Dorsale aantekening:

Schepen conde door ǁ Heer Iacob Monickx geleydt