Oosterhout

Wij Bernaert Jans. vander Spout ende Gijsbrecht Peeter Jan Lambrechts ende scepenen ǁ in Oisterhout, oirconden ende kennen dat voir ons quam, Cornelis Roeloff Anssemss soontien ǁ tot Drijmmelen, ende kende ende lijde vercoft te hebben om een somme van gelde die hem ǁ vol ende al betaelt is, Danielen Henrick Wouters. cleermaker, die thien lopenen rogs ǁ tsiaers in dezen doorgestoken scepenenbrieve begrepen met twee verschenen pachten ǁ te gelden ende te leveren alle jaer op alsulcken pachtdach met alsulcke mate vuijt ǁ alsulcken onderpant ende bijpant, met alsulcke waernisse, die voort in alle ǁ der selver vorwaerden ende manieren als de brieff inhoudt ende begrijpt daer ǁ deze met onze zegelen bezegelt doorgesteken is, ende waerinne de voorgenoempde ǁ Daniel Henrick Wouters. gevest ende geerft is met vonnisse ende met recht, zoo ǁ dat ze hem zeker zijn ende vast, met vorwaerde dat hij daer aff sal moeten doen ǁ ende geven alle scoten beden ende gebuerlijcke rechten tOisterhout, in oirconden dezen ǁ brieve met onze zegelen bezegelt int jaer ons heeren duijsent vijfhondert ǁ ende tzeventich, den dertiensten novembris ǁ

Tweede charter:

Wij Bartelmeeus Pauwels sone ende Jan Henrick Adriaens sone scepenen in Oisterhout orconden ende kennen dat voer ǁ ons quam Cornelis Gerijt Jans. kende ende lijde dat hij vercoft hadde om een somme van gelde die hem vol ende ǁ betaelt is Frans Evertssoen tot behoeff van Adriaen Evertssoen zijnen brueder thien lopen rogs tsiaers erffpachs ǁ te gelden ende te leveren alle jair goeden cusbaeren rogge metter maten van Oisterhout op Sunte Baven dach den ǁ ijersten dach octobris op ende uut sess lopensaet weijen luttel min oft meer alzoe die gelegen zijn aen haijcx ǁ dijck Mathijs Jan Goderts. erve westwaert ende Mathijs Peter Weijns soen erfgenamen erve oostwaert hodende noortwaert ǁ op Jan Peter Scappers. erve ende suijtwaert op Adriaen Huijgen soen erfgenamen erve te vrijen ende te waeren den onderpant ǁ voers. met heeren chijns jairlijcx voer vutgaende ende om den erffpacht voers. den voirgen(oemde) Adriaen Evertssoen ǁ ende zijne naecomelingen te bat te versekeren soe sette Cornelis Gerijts. voers(chreven) te bijpande twee lopensaet lants ǁ gelegen ten Hout in de Moerstege Cornelis Gerijt Goderts. erve westwaert ende oestwaerst sHeeren straet ende ǁ noortwaert hodende suijtwaert op Jans Wouter Goderts. erve te vrijen ende te waeren den bijpandt voers. ǁ met een viertel rogs erffpachts jairlijcx voer vutgaende in welcke thien lopen rogs tsiaers erffpachts ǁ voers. de voergenoempde Frans Everts. gevest ende geerft is met vonnisse ende met rechte tot behoeff van Adriaen ǁ Everts. zijnen bruere voers. alzoe dat ze hem zeker zijn ende vaste met vorwaerden dat hij hier aff schuldich ǁ sal zijn te doen ende te geven alle schoten beden ende gebuerlijcke rechten tOesterhout in orconden desen ǁ brieve met onsen segelen besegelt int jair ons heeren duijsent vijffhondert sess ende viertich den

elften dach januarij ǁ

In dorso:

Adriaen Everts.