Hedel

Maurits geboren prince van Oraengien grave van ǁ Nassau Catzenellenbogen, Vianden Dietz etcetera marquis vander Vere ende van Vlissingen, heere van Sint Vyt, Daesborch, der ǁ
stadt Grave, ende van den lande van Cuijck, gouverneur ende capiteijn generael vanden vorstendom Gelren, ende vande graeffschappen van ǁ Hollandt, Zeelandt, Westvrieslandt, Zutphen Utrecht ende Overijssel, admirael generael der Nederlandtscher zee, regent ende administrateur ǁ van tvorstendom van Oraengien, ende vande heerlicheden ende goederen, toebehoorende den hoochgeboren furst, heere Philipe Wilhelm, prince van Oraengien ǁ grave van Nassau, onsen vrundtlicken gelieffden heer ende broeder, Allen den genen die dese sullen sien oft hooren lesen saluijt, Wij hebben ǁ ontfangen d'ootmoedige supplicatie van onse lieve beminde de schoutet, schepenen ende gesworens der vrijheijt van Oosterhoudt, innehoudende hoe dat zij supplianten ǁ ende de gemeijne innegesetenen der voors. vrijheyt, geduerende dese inlandtsche oorloghe, soo deur den brandt, als deur de legers, aldaer tot diversche reysen (ende ǁ nu oock noch onlancx) gelegen hebbende, soo beschadight, geruineert ende gedepaupereert sijn, dat zij tselve nemmermeer en sullen cunnen verhaelen, hebbende omme te ǁ voldoen de sware ende onsprekelicke groote sommen van penningen, die sij voor t'rancoen van sekere heure gevangenis, als oock omme te betaelen de contributien ende andere ǁ groote soo ordinarise als extraordinarise lasten, genootsaeckt geweest op grooten interest op te lichten verscheyden merckelicke ende notable sommen van penningen, ǁ die sij nyet en hebben connen noch weten te restituteren, midts dat zij soo lancx soo meer verarmen ende te gronde gaen, Inder vougen dat heure particuliere ǁ innegesetenen voor desselve restitutie verobligeert staende, daervoor alomme becommert, gehouden ende gearresteert worden, die oversulcx de renten oft ǁ jaerlicxen interest vandien oock selffe moeten voldoen ende betaelen, Waerdeur ende sunderlinge midts dat de dagelicksche lasten alnoch nyet en cesseren, ǁ maer eer verhoocht worden, de supplianten genootsaeckt souden sijn de voors. vrijheyt te verlaten, Ende hen met hare familien en bestialen elders ter ǁ strecken, dwelck sij nochtans nyet gerne en souden doen, soo verre als sij eenichssins gesoulageert, oft anderssins deur eenige voorderinge geencourageert mochten worden, ǁ dwelck eenichssins gevoughelick soude kunnen geschieden, overmidts de voors. vrijheyt is gelegen seer naer het water, palende met eenen arm oft canael aen het ǁ groot water, loopende voorbij onse stadt van Geertruydenberghe, voorsien sijnde van seer groote ende schoone beempden, ende weijden, ende op haren ǁ ordinaris weeckmerctdach gefrequenteert wordende van alle de ommeliggende dorpen ofte nabueren, die aldaer heure graenen, boter, eijeren, hout, torff, ende ǁ allerhande soorten van inlandtsch gewas, jae oock heure bestiaelen gewoonlick sijn ter merct te brengen, Ende te vercoopen, Ende aldaer wederomme te ǁ coopen ende mede te dragen allerhande soorten van cremerije, specerie, laecken, ende alles anders des den huysman voor sijn noottruft ende tot bevoorderinghe ǁ vande landtbouwinghe vandoen heeft, In der vougen dat soo verre de voors. vrijheyt boven de mercten, dye sij over lancx gehadt hebben, waren versien ǁ van twee peerdemercken des jaeren, tselve grootelicx soude tenderen tot proffijt ende voordeel, jae tot augmentatie ende vermeerderinghe der selver, Welcken aengemerct ǁ ende dat zij supplianten nyet en twijffelen, oft wij en sagen de goede onderdaenen van onzen huyse van Breda garne gevoordert ende gebeneficiert, zoo verre tselve ǁ sonder onsen oft yemandts achterdeel oft vercorttinge can geschieden, hebben ons seer ootmoedelick gebeden, hen de voors. twee peerdemercten tsjaers te willen accorderen, ǁ ende daerop te doen expedieren onse opene brieven van octroye in gelijcken cas dienende, Waeromme soo eest dat wij de saecken voors. aengemerct, ǁ ende eerst hierop gehadt d'advies van onse lieve ende getrouwe, de luyden van onsen rade ende rekeningen, genegen wesende ter bede der voors. supplianten, hebben ǁ den selven van wegen ende in den name vanden hoochgemelten heere prince van Oraengien, onsen vrundtlicken gelieffden heere ende broeder, voor hem, zijnen ooren ǁ ende nacommelinghen heeren van Breda, ende der voors. vrijheyt van Oosterhoudt (boven de merckten die sij overlanghe gehadt hebben) gewillecoort, ǁ geoctroyeert ende geconsenteert, willecoren, octroyen, ende consenteren bij desen onsen brieve, Dat zij binnen de voors. vrijheyt van Oosterhoudt ǁ sullen mogen leggen twee jaerlicxe peerdemercten, te weten d'eene t'sanderdaeghs naer Palmsondach, ende dander tsaterdaeghs naer Vrouwen Hemelvaertǁdach, Welcke twee jaermerckten dueren sullen drije dagen lanck, Te weten die van s'maendaeghs naer Palmsondach, van Palmsondach naer den noen, den ǁ geheelen maendach, dynsdach, ende des woonsdaeghs daer nae voor den noen, Ende dye van saterdach naer Vrouwen Hemelvaert van des vrydaeghs daer te ǁ voren naer den noen, den geheelen saterdach, maendach ende dynsdach, daernae voor den noen, Tot welcke voors. twee jaerlicxe peerdemercken ende dagen wij allen ǁ persoonen hebben geoorloft, deur den voors. geheelen lande van Breda te commen, stille liggen, ende weder te keren sekerlick en vrijelick, Ende aldaer ter ǁ merct te mogen brengen, te vercoopen ende coopen allerhande peerden, ende andere bestialen ende coopmanschappen alst hen believen sal, zonder dat zij int comen ǁ stille liggen oft wederkeeren sullen mogen gepraempt , gevangen oft gearresteert worden in eeniger manieren, te saecken van heure schulden, vuytgenomen voor ǁ schulden oft oorsaecken opte voors. merctdaghen gemaeckt, Behoudelick dat de voors. supplianten gehouden sijn, dese te verthoonen, te brengen ende leveren ǁ in onse voors. camere van rekeningen, omme aldaer geregistreert te mogen worden, Ontbieden daeromme ende bevelen onzen drossaert ǁ ende schoutet van Breda, midtsgaders allen anderen onsen rechteren, justicieren, ende officieren, in der stadt ende lande van Breda geseten, ǁ dat zij den voors. supplianten van dese onse gratie ende octroy, midtsgaders van allen dinnehouden van desen in der vougen ende manieren voren verclaert peyselick ǁ rustelick, vredelick ende volcommelick doen ende laten genyeten ende gebruycken, Tesserende alle beletten ende wederseggen ter contrarien, Des ǁ toorconden hebben wij dese geteeckent met onzen name, Ende onzen grooten segel hieronder doen aenhangen, gegeven opten huijse van Hedel ǁ den XVIIen julij XV^c drijentnegentich.

Op de pliek:
Bij zijne excellentie ǁ Milander

Dorsale aantekening:
Octroij vande twee ǁ nieuwe peerdemercten ǁ van zijne excellentie ǁ no. VIe 1593 juli 17