Geertruidenberg

Wij Johan Willemsz. Schuijffhil ende Adriaen Aertsz. vander Merwen schepenen ǁ der Stede Geertruijdenberge, doen cont ende kennelijck eenen ijgelijcken , dat voir ǁ ons gecomen ende gecompareert zijn, inde secretarie der selver stede, Cornelis Jop ǁ Jacops Z. pottebacker ter eenre ende Adriaen Mathijs Roelen Z. met Aert Oppers ter andere ǁ zijden, nopende sekere questie ende geschille tusschen hen geresen ter saecken zekere erffǁscheijdinge van eene erve bijden voirnoemde Cornelis Jop Jacops Z. gecoft vande naegelatene ǁ wedue van zaliger Marcelus Jans Z. gelegen opden haverdijck achter aen de erve vande ǁ wedue van zaliger Jan Schoonemans ende parthijen bij appointemente vande V^de februerij XVI^C ǁ  derthien verleden bij schepenen deser stede gewesen zijn tot preuve van accordt, soo ist ǁ dat om meerdere costen te voorcomen, de voirnoemde parthijen metten anderen int minnelijck zijn ǁ overcomen ende veraccordeert, in manieren als volcht, te wetene dat den voorgenoemden ǁ Cornelis Jop Jacops Z. ende zijne nacomelingen voirdaene de voors. erve sal gebruijcken in ǁ sulcken gestalte als die nu bij parthijen door metsers ende timmerluijden is affgemeten ǁ ende affgepaelt opden hoeck van Aert Oppers schuere noortwestwaerts gelijck hij dat ǁ nu betimmeren zal, dat d’erve van Jan Schoonemans achter zess voeten breeder was ende ik ende ǁ Jacops erve van gelijcke zess voeten breeder, alwelcke breette van voors. sess voeten ǁ jegenwoordige sullen wesen ende blijven halff ende halff, ende aende noortzijde inde breette ǁ van zeventwintch hont voeten, Ende hiermede bedancten parthijen doen den anderen ǁ goede erffscheijdinge ende accoorde ende de costen ten wedersijden in desen gevallen ende ǁ gedaen gecompenseert, alles zonder arch off list, Aldus gedaen ende geaccordeert ǁ int jaer ons heeren dusent zesshondert ende derthien, negen dagen in februarij ǁ Joost Buijs ǁ