Geertruidenberg

Hertoghe Willem van Beyeren grave van Holland van Zeland here van Vriesland ende verbeyder der graefscap van Henegouwen ǁ doen cond allen luden dat wi met goeden voersiene om trouwe dienste die onse lieve ende ghetrouwe poertere van onser stede ǁ van Sinte Gheerden Berghe ons ende onsen ouderen ghedaen hebben ende ons ende onsen nacomelinghen noch doen moghen ghegheven ǁ hebben ende gheven alsulc recht gracie ende vrihede als hier na bescreven staen inden eersten soe hebben wi hem ghegheven ende ǁ gheven dat wise versetten verleven noch ververven en sullen in gheenre manieren vander bailiuscap van Zuutholland si en sullen ǁ ander graeflichede van Holland bliven altoes ende daer of gheregeert siin voert soe hebben wi ghegheven onsen goeden luden
voerseyt soe wat poerter van Sinte Gheerden Berghe siin liif met rechte verboerd die en mach ieghens ons nietmeer ver ǁ boren dan half siin eyghelike goed ende die ander helfte sal bliven sinen wive of sinen wittachtighen kinderen of sinen ǁ gherechten erfnamen hadde hi gheen wiif noch wittachtich kint voert soe hebben wi hem ghegheven dat alle poertere ǁ die scepene of rade gheweest hebben of siin in der tiit vreden nemen moghen gheliken onsen scoute voert waer dat sake dat ǁ onse lieve stede voirscr. enighe hantvesten hadde die verout of verdonkert waren of bi onghevalle verloren verbrand of ǁ van ouderdom doerghegaet worden dat si betoghen mochten met uutscriften bezegheld met wittachtighen luden die souden ǁ wi hem vernuwen ende bezeghelen buten haren coste behoudeliic ons ende onsen nacomelinghen altoes onser heerlichede ende ǁ onser graefliker ghewelt ende om dat wi willen dat alle dese voerscreven poynten onsen poerteren voernoemd eweliken ǁ vaste ende ghestade ghehouden worden van ons ende van onsen nacomelinghen soe hebben wi desen brief ende hantvesten ǁ open bezeghelt met onsen zeghele ghegheven tot Sinte Gheerden Berghe opden vier ende twintichsten dach van meye int ǁ iaer ons heren dusend drie hondert vive ende viiftich.