Terheijden

[1]

Wij Jan Daniel Willems sone ende Dingman Mathys Gheryts sone scepenen Ter Heyden, oirconden dat ǁ voir ons quam Rombout Cornelis sone, Ende lijde dat hij vercoft heeft om een somme van gelde die ǁ hem vol ende al betailt is, Adriaenen zijnen wittigen sone den Jongen, Een half buijnder lants luttel min ǁ oft meer in dese doirsteken scepenen brieve begrepen, Tot alsulcker stadt gelegen met alsulcker wairnissen ǁ Ende voirt in alle der selver vorwairden ende manieren als die brieven inhouden ende begrijpen Dair ǁ desen brieve met onse segelen besegelt doirgesteken is, in welcken halven buijnder lants voirs. de ǁ voirgenoemde Adriaen Rombout Cornelis sone gevest is ende toegedaen met vonnis ende met recht soe dat ǁ hem seker is ende vast, met vorwairde dat hij hier af doen sal alle gebuerlick recht, ǁ In oirconden desen brieve met onse segelen besegelt int jair ons Heeren duijsent vijfhondert ǁ zessendetwintich vijerendetwintich daghe in aprille.

Joh. de Corput

[2]

Wij Daniel Jans soen van Leyden ende Andries Domaes soen scepenen Ter Heyden oirconden ǁ dat voer ons quam Adriaen Zebrecht Peter Gheryts ende lijde dat hij vercoft heeft om ǁ een somme van gelde die hem vol ende al betaelt is Rombouten Cornelis sone Een ǁ half buijnder lants luttel min oft meer gelegen inde hoeve Ter Does in desen doersteken ǁ scepenen brieve begrepen tot alsulcker stadt gelegen ende voert in alle der selver vorwaerden ǁ ende manieren als die brieve begrijpt daer desen brief met onsen segelen besegelt doergesteken ǁ is Welck half buijnder lants voirs. die voirgenoemde Adriaen gelooft heeft te vrijen ende te ǁ waeren met sheeren chijnse ende metter weerden van vijfendedertich stuvers erfchijns daer ǁ jaerlicx uutgaende Ende dat medepant ende bijpant bliven sal daert met recht schuldich is ǁ medepant ende bijpant af te sijn in welcken half buijnder lants voirs. die voergenoemde ǁ Rombout Cornelis soen gevest is ende toegedaen met vonnis ende met recht alsoe dat ǁ hem seker is ende vast met vorwaerden dat hij hier af doen sal alle gebuerlick recht ǁ In oirconden desen brieve met onsen segelen besegelt int jaer ons Heeren duijsent ǁ vijfhondert ende elve, vijf ende twintich dage in novembri

J. v. de Houten

Dorsale aantekening:

aen Rombout Cornelis

[3]

Wij Jan Daniel Willems zone ende Daniel Jans zone van Leyden scepenen Ter Heyden oirconden dat voir ǁ ons quam Adriaen Zebrecht Peter Gerits zone, Ende heeft met recht bedingt ende gecocht uut sheeren ǁ hant om een somme van gelde die hij vol ende al betailde dair hij se na die recht sculdich was te ǁ bekeren Een half buijnder lants luttel min oft meer gelegen inde hoeve Ter Does westwaert aen sHeeren ǁ strate, noortwaert neven Syruyters Vaert suijtwaert neven Adriaen Laureys z. erve, ende oestwaert neven ǁ Rombout Cornelis z. erve In welcken halven buijnder lants voirs. die voirs. Adriaen Zebrecht Peter ǁ Gerits zone gevest is ende toegedaen met vonnisse ende met rechte soe dat hem seker is ende vast, behou ǁ delick altoos eenen yegeliken sijns rechts ende voircommers die daer met recht sculdich is voir uut te gaen ǁ Hier toe is geschiet al datter met recht sculdich was toe te geschien Ende die here is hier af gewijst ǁ warandt te sijn als van bedingden goede met vorwairden dat Adriaen voirs. hier af doen sall ǁ alle gebuerlick recht In oirconden desen brieve met onsen segelen besegelt in jair ons Heeren dusent ǁ vijfhondert ende seven opten iersten dach in junio.

P. Martens