Oisterwijk

Henrick soone Lambert Janssen als man ende momboir Josina sijn ǁ huijsvrouw dochtere wijlen Peter Jan Lamberts heeft wettelijck ende erffelijck vercocht heeren Goyaerden ǁ Henricx van Gorchom presbiter en altarist inder kercken van Oisterwijck, eenen jaerlijckse ǁ ende erfelijcke chijns van vijff carolus gulden van twintich stuijvers 't stuck oft die wierde daer voor in ǁ anderen goeden gelde te vergelden ende te betalen allen jaeren ersttelijck op Sint Servaes ǁ dach, waer affden jiersten betaeldach wesen sal op Sint Servaes dach anno sestienhondert ǁ ende vijff en veertich, nu jierst comende van ende uut een huijs, ende erffe daer aen liggende ǁ ende daer toe behoorende drije lopensaet ofte daeromtrent begrijpende gelegen inde parochie van ǁ Haren aenden Belverse straete tussen erffe Jan sone Peter Jan Lamberts aen deen zijde, ende ǁ tusschen erffe Gerit Peters aen dander zijde streckende metten eenen eijnde aende gemeijn ǁ strate ende metten anderen eijnde aen erffe Pauwels Janssen, als hij sede om den voors. chijns ǁ bij den voors. copere in een erffrecht te hebben ende te besitten, Gelovende die voors. vercopere als ǁ schulder principael op hem ende op alle sijne goederen hebbende ende vercrijgende den voors. chijns ǁ van vijff carolus gulden den voorss. copers te waren, alsmen erffchijns schuldich is te waren ende t voorss. ǁ onderpant voorde jaerlijcxe betaelingen vande voors. chijns, altijt goet, seecker genoech ende ǁ weldogende te houden ende te maecken ende allen anderen commer ende calangie daer inne ǁ wesen den selven aff te doen geheel getuijgen, waren hier over Schepenen in Oisterwijck ǁ Jan Janss. Timmermans ende Adam Martens van Hees die henne segelen in getuijgenis hier aen ǁ hebben gehangen opten twelffsten dach van maij int jaeren ons heeren duysent sesshondert ǁ vier ende veertich

J. Peijnenborch                                               

Dorsale aantekening:

[***] ǁ V gulden op Henrick ǁ Lamberts Jans tot ǁ Haren ǁ 16 mei 1644