Oisterwijk

Gheertruit dochter wilner Gherit Scilders metten momboer der selver daer toe van hoer ghecoren ende hoer vanden ǁ richter ghegheven als recht is een half mud rogge iaerliics ende erfeliics pachs hoer als zii zeede toebehorende te ǁ verghelden allen iaer erfeliic op onser vrouwen dach purificatio uut ende van enen hove gheleghen inden vriiheit ǁ van Oesterwiick tusschen den erfen der erfghenamen wilner Peter Syen ende der erfghenamen wilner Ians Cupers op die een ǁ ziide ende tusschen enen ghemeinen wech die gheet tusschen Claeus Schemen kinderen erve ende den voers. hof op die ander ǁ ziide streckende vanden weghe die ter borchwaert gheet totten weghe die ten ghener waert gheet inne noch uut ende van ǁ enen huse ende hove met sinen gronde ende toebehoerten ghelegen inder vriiheit voers. tusschen den voers. hof op die een ziide ǁ ende tusschen den erfen Henric van Buele op die ander ziide hodende metten enen einde aen den erfen der kiinderen wilner Claeus Plu ǁ men als sii zeede ende welc half mud rogge erfpachs voers. Gherit Scilder voers. teghen Iannen soen wilner Alout Simen ǁ Eemans met overgheven erfeliic ghecreghen hadde gheliic dat in scepenen letteren van Oesterwiic daer op ghemaect ǁ volcomeliiker begrepen is heeft sii witteliic ende erfeliic overghegheven ende opghedraeghen Willemen gheheiiten ǁ Quisthout soen wilner Ians te samen met allen scepenen letteren ende vorwaerden deese daer af hebbende is mentie ma ǁ kende ende ghewach doende met allen hoeren machten rechten ende begriipen met afgaen ende vertiien als daer toe be ǁ hoerliic is ende heeft gheloeft Gheertruit mit hoeren momboer voers. als een principael sculders op hoer ende op allen hoer ǁ gueden die sii nu heeft ende naemaels hebben ende vercrighen mach dit overgheven opdraghen afgaen ende vertien ǁ voers. den voers. Willem eweliic ghestendich ende vast te houden ende in hoeren name te doen houden sonder ennich we ǁ dersegghen ende allen commer ende calangie van hoeren weghen daer in wesende altemael af te doen den selven or ǁ conden hebben hier over gheweest scepenen in Oesterwiick Ghiisbrecht Korstiaenss soen ende Peter vanden Emde ǁ die hoer zeghelen in ghetughenissen hier aen hebben ghehanghen int iaer ons heeren duiisent vier hondert ǁ viiftich ende acht derthien daghe in februario ǁ [***]

Dorsale aantekening:

Supportavit [***] van Ghierle