Oisterwijk

Jan Andries Lambrechss. ende Willem Cornelis Bax soen als meesters ende provisoeren der fabrijcken der ǁ kercken van Oesterwijck meester Jan Lombaerts ende Aelbrecht Willemss. als provisoers der bruederscappen ǁ vanden heyligen Sacrament inder kercken voers. Een huijs ende hoff met zijnen gronde ende toebehoerten ǁ der fabrijcken ende der bruederscappen voers. tsamen toebehoerende gelegen binnen die Vrijheijt van Oesterwijck ǁ inden Kerckstraet aldaer tussen erffenisse der kijnderen wilner Embrechs die Greve optie een zijde ende tussen ǁ erffenisse Jueten weduwe wilner Willem Huijsmans optie ander zijde streckende vander Kerckstraten ǁ voers. totter erfenisse des persoens van Oesterwijck Ende welck huijs ende hoff voers., Marij dochter ǁ wilner Lauwreijs Vrancken met haeren momboir meester Jannen Lombaerts tot behoeff vander fabrijcken ǁ voers. voer deen helft ende der bruederscappen voers. voer dander helft wittelijcken ende erffelijcken ǁ oevergegeven ende opgedragen hadde gelijck als dat in Scepenen brieven van Oesterwijck daer op gemaect ǁ volcomelijcker begrepen is hebben zij wittelijcken ende erffelijcken oevergegeven ende opgedraegen Jannen ǁ zoen wilner Embrecht Jan Emmen soen tsamen metten Scepenen brieven voers. ende met allen anderen ǁ Scepenen brieven ende vorwaerden daer aff mentie maeckend ende gewach doende met afgaen ende ǁ verthijen als daer toe behoerlijcken is Ende hebben geloeft dese voers. provisoers optie verbijntenisse ǁ van allen den gueden der fabrijcken ende der bruederscappen voers. toebehoerende hebbende ende namaels ǁ vercrijgende dese opdracht Jannen voors. altijt vast ende stentich te houden sonder eenich wederseggen ǁ Ende allen commer ende calaengie vander fabrijcken ende der bruederscappen voers. wegen ende oick van wegen ǁ Marien ende haere nacoemelingh daer inne wesende altemael aff te doen den selven Jannen behoudelijck dat hij ǁ daer uut gelden sal een oert oft een halff oert stuvers erfchijns in dien dat daer erffelijck uuytgaende is ǁ Ende sal noch hier uut gelden alle jaer opten heijligen Paessdach Marien voers. drie Rijnsgulden tweijntich ǁ stuvers voer elcken Rijnsgulden voers. gerekent haer ter tochten ende der fabrijcken ende der bruederscappen ǁ then erve te blijvenden, welcke voers. drie Rijnsgulden erfchijns hij altijt sal moegen lossen ende quijten ǁ nader doot van Marien voers. ende nijet eer aen die provisoers voers. met vyftich gelijcke Rijnsgulden ǁ in ander als then tijde vander lossingh inder stadt vanden Bosch gemeynlijck ter boersen gaen sal metten ǁ jaerchijns ende metten achterstelle daer aff ofter dan eenigen onbetaelt stonde, Ende welcke drie Rijnsgulden ǁ voers. Jan voers. hier uut der selver Marien voers. alle jaer als voers. is alsoe gelden ende betalen ǁ sal datter der fabrijcken ende der bruederscappen voers. nimmermeer eenigen commer mot oft hijnder daer aff ǁ coemen en sal gelijck als hij dat openbaerlijck bekent heeft ende als een principael sculder op hem ǁ ende op allen zijn gueden hebbende ende vercrijgende den provisoeren wederom geloeft heeft Orconden ǁ hebben hier oevergeweest Scepenene in Oesterwijck Wouter Thomaes Wouterss. ende Wouter Jacop ǁ Stijnen soen die hueren zegelen in getuijgenisse hier aen hebben gehangen int jaer ons Heeren duijsent ǁ vijfhondert tweijntich ende zesse sevenendetweijntich daeghe in julio

Dorsale aantekening:

Der provisoers vande kercken ende vande bruerscappen vande ǁ Heijliger Sacrament tot Oesterwijck