Oisterwijk

Wij Thomas Timmermans ende Gielis Kievits scepenen in Oisterwyck doen condt eenen yegel(yken) dat voir ons is comen ende gecompareert ǁ in propren persone Lambert de Meyer sone wylen Lamberts de Meyer wonende tot Berckel binnen der prochien van Oisterwyck ǁ ende heeft vut synen vryen eyghenen willen ende welwesentheyt in alder bester manieren vueghen ende formen dat hy coste ende ǁ mochte vryelyck ende onwederroepelyck by goede vaste ghiften die men noempt inter vivos gegeven begift ende getransporteert ǁ ende geeft ende transporteert mits desen Claesen Bey ende Adrianen Gyb Segerss als cappelmeesteren vande cappellen van ǁ Sinte Wilbort tot Berckel voirs. tot behoeff vander selver cappellen een stucxken eckerlants een lopenssaet oft daer omtren[***] ǁ begrypende geleghen omtrent der cappellen voirs. tusschen erffen der heeren van Parwer aen deen syde ende erffen erffenis Elyas ǁ Ariaen Peeterss aen dander syde ende metten eenen eynde streckende metten anderen eynde aen erffenis der erffgenamen Goossen Emmen ǁ noch hier toe alsulcke vier lopen rogghen erffpachts als die voirs. Claes Bey hem Lamberden sculdich is te gelden gelyck ǁ [***] hy sede consenterende de voirs. Lambert dat de voirs. Claes Bey ende synen naecoomelinghen de voirs. vier lopen rogghen ten ǁ eeuwighen daghen sullen moghen lossen ende quyten [***] vanden cappelmeesteren ten tyde wesende metten sommen van sesthien ǁ karolus gulden [***] twintich st[uivers] [***] voerts dat de erffgenamen des voirs. Lambertus t voirs. lopensaet lants ǁ oeck sullen moghen lossen ende quyten ten eeuwighen daghen met vierentwintich gelycke karolus gulden met conditien toegedaen ǁ dat sal wanneer t voirs. stucxken lants oft vier lopen rogghen sullen syn gelost ende gequeten dat de cappelmeesteren ten tyde wesende ǁ de penninghen daer aff comende als dan sculdich sullen syn tot behoeff vander voirs. cappelle ende tot onderhoudinghe vanden lasten ǁ hier nae volghende wederom te belegghen ende t applicieren te weten dat de voirs. cappelmeesteren van nu voirtaen ten ǁ eeuwighen daghen inder cappellen voirs. daer voir sullen doen lesen ende celebreren drye missen te weten dyerste opten dach ǁ van Sint Jacop ende Sinte Cristoffel de tweede op Sinte Huberts dach ende de derde op Sinte Joris dach ende soe voirtaen ten ǁ eeuwighen daghen gedaen ende heeft geloeft de voirs. Lambert den voirs. cappelmeesteren aldaer present ende t selve ǁ accepterende dese voirs. ghifte ende donatie ende allet gene des bovengenoemd verhaelt is vast ende stedich te houden ten eeuwighen ǁ daghen sonder ennich wedersegghen, willende ende vuyterlyck begherende daer toe allet des voirs. is terstont volcomelyck ǁ achtervolght volbracht ende voldaen te wordden sulcx dat dese donatie terstont nae date van desen hier geheel ende ǁ volcomen effect sortere t sy uut crachte van dusdanighe gifte genoempt inter vivos oft van ennighe andere ghifte ǁ oft donatie dat t selve loss vast ende van weerden wesen ende volcomen effect sorteren mach renuntierende op alle ǁ exceptien die hem hier tegens ennichsins te baten soude moghen comen egheene uutgesceyden sonder argelist, ǁ ende des toirconden soe hebben wij Scepenen boven genoempt onse seghelen in getuychenisse hier aen gehanghen ǁ opten thienden dach vanden meye int jaer ons heeren duysent vyffhondert een ende t sestich ǁ D Toenel ǁ [***]

Dorsale aantekeningen:

Jan Franck Brocken ende Jan sone Adriaen Laureys ǁ Mattheeuss hebben bekent als cappelmeesteren vande cappelle ǁ van Sinte Wilbordt tot Berckel hebben bekent dat ǁ Henrick sone Jan Pauwels aen Leunen Handricq de somme ǁ van vierentwintich gulden tot lossinge vande lopensaet laatst ǁ in d willen van desen verhaelt ende welcke vierentwintich ǁ karolus gulden hem Henricken van weghen Jan Cornelis Janss ǁ ten lasten waren gecomen soe men verclaerden [***] ǁ desen IIIIen january 1616 ǁ J. Hoevel

1561/10 mei                                                               

Lambert de Meyer ǁ van een stucksken lant ǁ en vier lopen rogs ǁ [***]