's-Hertogenbosch

Adriaen sone Jans Willems. de Lathouwer wonende tot Gestel by Ooster ǁ wijck, als wittich man ende momboir zoo hij verclaerde van Neelken zijn huysvrouw dochtere wijlen Jans Gerits. de With heeft mits desen wittelijck ende erffelijck ver ǁ coft heeren Adrianen priester, cantor der collegiale kercke van Sinte Pieter Apostel tot Hilvarenbeeck tot behoeff van heer Remijs van ǁ Grevenbroeck priester, wonende tot Diessen, sone Cornelis van Grevenbroeck, eenen jaerlijcke ende erffelijcke chijns van negen Carolus gulden ǁ elcken Carolus gulden tot twintich stuvers te rekenen off die werde daervoor in anderen goeden gancbaren gelde te betalen allejaer ǁ erfelijck int hoochtyt van Allerheyligen, Ende voorden iersten termyn van betalinge inden hoochtyde van Alderheyligen anno ǁ XVIC ende twelff ende in sHertogenbosch vrij van allen hertochs beden, vijfe, tienste, twintichste, honderste ende allen anderen ǁ meerderen ende mindere penningen, commeren ende lasten gewonelijck ongewonelijck ingestelt ende namaels ingestelt te wordene egeene lasten ǁ uutgescheyden te leveren ende te vergelden van ende uut eenen hoybeempt genoemt gemeynlick den Haechbeemt tien lopensaet lants ǁ oft daeromtrent begrypende gelegen in de parochie van Gestel by Oosterwijck, ter plaetsen genoemt inde Heysen tussen de ǁ gemeynte vande Heysen aen deen zijde ende tussen erffenis Daniel Cornelis Mutsarts aen dander zijde, sterckende van erffenis Pieter ǁ sone Pieter Lemmens tot aen erffenis der Taeffele des Heiligen Geests tot Gestel voors. zoo hij seide, vande zelven heer Remijs metten ǁ erffrechtte hebben ende besitten, ende heeft de voorn. vercooper den voors. chijns den voorn. heeren ende meester Adrianen tot behoeff ǁ des voors. heer Remijs opgedragen met helmelinge vertydenis in manieren indijen gewoonlijck zijnde, Gelovende de voors. vercooper ǁ als schuldenaer principael op verbant van zijnen persoon ende goederen present ende toecomende, dat hij den voorn. heer Remys vande ǁ voors. chijns schuldige ende gerechte zal doen waranschap, ende dat hij allen anderen commer ende calangie inden voors. hoijbemt ǁ wesende of comende den voorn. heer Remijs aff zal doen geheelijck, ende dat hij oock den voorn. hoijbeemt voor de betalingen als voors. chijns ǁ aen voorn. heer Remys jaerlix daer uut zoo voors. staet te vergelden altyt goet genoch ende weldogende zal maken ende houden met condi ǁ tie toegedaen dat die voors. vercooper desen voors. chijns van negen Carolus gulden ten allen tijden zal mogen lossen ende ǁ quijten tussens ten eenenmale mette somme van eenhondert ende vijftich Carolus gulden, elcken gulden tot twintich stuvers te rekenen ǁ oft de werde daervoor in zulcken anderen goeden gelde ende tot zulcke valeur gelijck als tgelt ten tyde dese lossinge ǁ volgende tplacaet vanden hove opt stuck der permissie vander munten tot Bruessel alsdan lestmael gepubliceert aldaer ǁ zall gancbaer zyn, Ende metten jaerchijns der lossinge ende achterstellen alsdan daer aff ten achteren ende onbetaelt ǁ staende, behoudelick dat de voors. vercooper den lossinge een halff jaer te voren uuitelick zal vercondigen ende ǁ opseggen, Getuygen waeren hierover schepenen in sHertogenbosche Henrick Franss. van Gestel ende Willem ǁ Cluners, Gegeven den negenentwintichsten dach Octobris int jaer ons heeren dusent zesshondert ende elff.

J van Hees ǁ Litera domini Remigii [***]

Dorsale aantekening:

Ick onderschreven bekenne mij gegevuecht ofte betaelt ǁ te syn van hondert ende vijftich gulden naer inhout des briefs ǁ met den verschenen intrest, consenterende ende begeerende ǁ dat hij opt producol gequeten ende gedoodtt werde ǁ heer Remeys van Grevenbroeck