Loon op Zand

Wij Gelden Mathys soen Huyb Meus Henrick Wey Jan Henrix soen Peter Quuap Gijs Dirxs soen ende Gheryt Wouters soen scepenen in Venloen doen cont enen yegelijken dat voir den scoutheit ende ons scepenen voirs. ǁ inden recht gecompareert is gheweest in properen persoen Hubrecht Janssoen, ende heeft by sijnen voirspreeck een aenspraeck gedaen op joffrou Katherynen van Naeldwyck joffrou tot Venloen, met eenre papiren ǁ cedullen, daer aff die tenuer hier nae volght Her scoutheit ende ghij heren ghij scepenen Hubrecht Janssoen claight ende croent u over joffrou Katherinen van Naeldwyck mijnre joffrouwen van Loen off hoe zij ǁ met recht genoemt is  Ende seeght al eest alsoe, dat onlanx leden Peter Quuap al hier quam voir scoutheit ende scepenen inden recht, ende dede hem richten uut crachten van sekeren sijnen scepenen brieven ǁ aen een erfnis metter tymmeringen dair op staende voertijts toebehorende wilneer Wouter Coppen gelegen opten Clockenberch met beijden sijden aen erfnis Jacob Keyten kynder overmidts geboet der betalingen ǁ eens erffpachs die hij uten selven erven jairlix geldende hadde,  Ende voirtaen met allen solempniteiten van recht daer toe dienende ende behorende die selve erffnis voerts metten recht al hier gesleten ǁ ende vercoft, dair van hij die spreect alsoe coper met recht geworden is midts dien dat sijn gueden een wair sijn des selven pachs Ende want dan [***] verwerdersse bruict off in horen name ghe ǁ bruict wort eens deels vanden erfnissen onderpande voirs. pachs, ende in tslijten van recht voirs. mede gesleten, ende hem die spreect metten anderen erfnissen bij hem voert vercoft inden selven cope ǁ van recht vercoft sijn Sal sij met recht sculdich sijn hoir onghewaerde hant vanden selven erffnis te lichten ende hem die spreect sijnen duechdelijcken cope van rechte voirs. laten volgen, off hem scadeloos ǁ daer aff te ontheffen dwelc hij niet derven off ontberen en woude om die summe van vijfendetwentich Rijnssche gulden, hem des die voirs. Hubrecht alre punten tot sijnen coepbrieven ende voerts ǁ ter wairheit refererende genoemt off niet genoemt dair hij wairheit toe behoeft, ende hem inden recht staij doen mogen, ende die te leijden als recht is begerende alsoe ten slote hantlichtinghe ǁ off scadeloes dair aff ontheven te worden off tvoldoen van sijnen heijsch off trecht beheltelijken hem sijns raets ende rechts, ende ofte hem noot sij onrechte wairheit niet beter te mogen scatten ǁ Op welke aenspraeck Jan van Haestrecht als voirstender sijnre joffrouw moeder voirs. voir den scoutheit ende ons scepenen geantwort heeft met eenre papiren zedullen dair aff die tenuer ǁ hier nae volght,  Her scoutheit ende ghij heren ghij scepenen Jan van Haestrecht als voirstender joffrou Katelynen van Naeldwyck joffrou van Loen sijnre moeder steet wael voer hoe dat onlanx leden ǁ quam al hier inden rechte Hubrecht Janssoen Ende dede aenspraeck op die voirs. joffrou Katelyn in gescrift Onder dander int lanck inhoudende al waert alsoe dat onlanx leden een geheiten ǁ Peter Quuap comen weer al hier inden recht ende hedde hem nae inhoude van sekeren sijnen scepenen brieven doen richten aen een erfnis metter tymmeringen dair op staende voirtijts toebehorende wilneer ǁ Wouter Coppen gelegen opten Clockenberch, ende die selve erfnis voerts met allen solempniteiten van recht dair toe dienende gesleten hadde, dair van hij Hubrecht alsoe in tslijten van dien coper ghe ǁ worden wert  Ende hedde alsoe achtervolgende dien, doechdelijken sijnen coop eens deels van den selven opgewonnen ende gesleten erve met proclamacien alsmen in dien gewoenlick weere te voerde gestelt ǁ ende voerts vercoft, die int vercopen voer tgebrec des voirs. Peters zijns afterstels ende costen van recht dair op staende ende belopen zijnde niet ghenoch gegonden en hadden  Ende want joffrou Katelyn ǁ voirs. bruicten ende hantplichten off andere in horen name eens deels vanden selven erfnis die in tslyten ende vercopen van recht voirs. mede gesleten ende vercoft weeren, soude zij  nae recht hoer ongewande ǁ hant sculdich sijn dair aff te lychten, latende hem, die volgen achtervolgende zijnen doechdelijken coop voirs. dwelc hij niet derven en soude willen om per Rijns gulden hem des ten sloete alre punten ǁ ter wairheijt refererende, met meer off myn dair toe geschiet die heren die scepenen dat verstonden hebben ende hij die spreect des ombegrepen zij in sijn rechte, van welke aenspraken hij die ǁ spreect sijn joffrouw moeder voirs. boet te verstaen  in rechte, ende alsoe als verstender dair tegen midts redenen hem dair toe pon[e]rende daighs ende rechs begeerden, die hem waert met vonnisse en met ǁ rechte, ende alsoe onder meer op huden comen is Soe antwort hij die spreect inden name als boven, dair op aldus ende seeght, den aenlegger desen sijnen heijsch in tgeheel ende al ontkennende, hij ǁ die spreect noch die voirs. sijn joffrou moeder en hebben hem niet geloeft, ende en zijn hem alsoe als hij hoopt niet sculdich ontkent oic die selve zijn joffrou moeder voirs. ennich gebruick te hebben bij ǁ hoir selven off yemonden in horen name, van ennigen erffnissen die alsoe met coop van recht [***] souden wesen als die aenlegger van desen in sijnre aenspraken narreert ende seeght, mair seeght ǁ dat wair is ende inder wairheit sal doen blijken dat zoe wes erfflijck opten Clockenberch [***] in horen name bruijken heeft zij duechdelijken gecoft in wittigen titule van cope ǁ [***]ecregen eendeels tegen Cornelisen Wouters soen, ende eens deels tegen Peteren Jansso[en] [***] Cornelisen Wouters soen vercregen hadde, ende die erffnis geloeft te vrijen ende te weren ǁ [***] die scepenen brieven dair aff luijdende dat clairlijke inhouden ende begrijpen, acht[***] duechdelijken vercrige zij d(aer) aff is geweest in duechdelijker possessien, ombestoert van ǁ [***] tot desen dage toe dair in zij al noch hoopt te berusten ende vande[***] recht quijt te zijn, gemerct dat den commer off pacht, dair dese erffnis mede gesleten ǁ [***] wesen met recht als die aenlegger voirs. sustineert [onleesbaar] [***] ghepacificeerden syner lasten ende onraet dair op staende ende versceijden parthien dair ǁ [***] vergeldendenae inhout daer brieve gecoft ende vercregen h[i]et, hem des die voirs[.] [***] alre punten tot sijnen brieven [***] wairheit refererende genoemt off niet ǁ genoemt dair hij wairheit toe behoeft ende hem inden recht stade doen mogen [***] wairheit cundich is, ende die te leijden als recht is, ende als voirgenger ende voirstender ǁ inder saken Beheltelijken hem sijns raets ende rechs, onrechte wairheit met [***] ofs hem noot zij[...] Ende alsoe die voirs. p(ar)thijen te beijden zijden op wairheit ǁ ghededingt hadden Soe heeft die voirs. Hubrecht sijn wairheit ende sijnen thoen [***] hier nae volgende Item inden eersten, dede die voirs. Hubrecht tot sijnre wairhaeit ǁ inden recht exhiberen ende lesen enen vonnis brieff inhoudende alsoe hier nae volght, [***] dat Peter Quuap hem met vonnis der scepenen heeft doen richten aen erfnis wilneer Wouter ǁ Coppen, metter tymmeringen dair op staende gelegen opten Clockenberch met beijden sijden aen [erfnis] Jacob Keyten kynder voir enen erfflijken pacht van enen halven mud roggen vercoft van ǁ wilneer Wouter Coppen wilneer Gijsbrechten Pige van date dusent vierhondert ende dertien tsijn des dages nae Sinte Andries dach welken pacht hem tafter ende ombetaelt stont van twee jaren lestleden ǁ alsoe hij sede welc gericht Peter voirs. volcomelic volvuerde ende allet dair toe dede dat daer toe te doen was, met altemael after gelaten, Alsoe dair dit aldus ghesciet was, gewijst ǁ want van den scepenen dat Peter voirs. dese voirs. erfnis vercopen mochte, ende dat die heer van den lande den coper daer aff waersscap doen soude Ende want Peter voirs. bij Bertrom Janssoen ǁ der stat dyener vanden Bosch tvoirs. erve sijn gebo[d] aldair heeft doen gheven alsoe gewoenlic is, gelijc bij den selven Bertrom dat onder sijnen segel gecertificeert is, ende geboden te ǁ lossen gelijc dat getuigh der scepenen ghenoch verclaert heeft, soe heeft Hubrecht Janssoen darenteijnden den coop hier aff genomen vanden ja[irlijken] pachte, ende den afterstel voirs. ende ǁ voir den scade metten recht den welken coper overmidts vonnisse daer schepenen die heer vanden lande dese voirs. erfnissen hem te hant vercoft gerechte waersscap sculdich sal sijn te ǁ doen alsoe verre die scepenen hier in wijsers sijn Orkonden hebben hier over geweest scepenen in Venloen Gelden Matijs soen Henrick Wey Jan Henrix soen Peter Eelen Mattheus Beij ǁ Peter die Meyer ende Willem Joesten die hore segelen hier aen hebben doen hangen gegeven opten XIXsten  dach in die maent van aprill nae Paesschen int jair ons Heren dusent ǁ vierhondert twee ende tachtentich Item om te proeven dat joffrou Katelyn van Naeldwyck voirs. bruict ende hantplicht off in horen name gebruict wort zeker erfnissen die wilneer ǁ Wouter Coppen inden voirs. brieve begrepen plagen toe te behoren inder tijt der geloeften dit pachs voirs. hebben getuicht op hore eeden Wijtman Mathijs soen ende Gelden Matthijs soen dat ǁ joffrou Katelyn voirs. bruict ende hantplicht off in horen name gebruict ende gehantplicht w[es] zeker erfnissen die wilneer Wouter Coppen toebehoren plagen welc erfnissen met meer ander ǁ erfnissen inden voirs. brieven begrepen vanden halven mudde roggen voirs. dair voir die [opgewonnen] sijn gelijc voirs. staet, nu ter tijt gelegen sijn metter eenre sijden zuitwaert aen erffenis ǁ wilneer Jacob Sporters nu ter tijt toebehorende Hubrecht Janssoen ende metter ander zijden noortwaert aen erfnis wilneer Jacob Sporters, dat Hubrecht Janssoen voirs. nu heef,t ende aen erfnis ǁ wilneer Wouter Symons dat miin joffrou voirs. nu heeft Item die scepenen tugen op hoir eeden soe wie met coop van recht coempt tot ennigen erfnissen die verbonden staen ende ǁ onderpant sijn van erfcijnsen off erfpachten, die onghewande hant daer aff sculdich sijn te lichten ende den coperen achtervolgende horen coop dien sculdich sijn te laten volgen ǁ off horen moet daer aff te hebben Item Hubr(echt) Jansssoen voirs. heeft mijnre joffrou voirs. gepresenteert dese voirs. erfnissen inden voirs. coepbrieff begre[pen] hoir die in tgeheel te laten ǁ volgen bij alsoe dat hij versekert mach worden vanden selven coop quiet ende scadeloes ontheven te worden off dat sij hoir hant [***]te vanden selven panden alsoe verre ǁ zij die onder heeft off d(aer) voir betale gelijc in sijnen heijsch voirs. bescreven staet Ende dat na dien die voirs. parthijen hoir proc[esse] gesloten  Ende wij het selve processe ǁ te meer stonden oversien gevisiteert ende op al dat die voirs. p(ar)thijen te beijden sijden tott[er] horen rechte hadden gheexhibeert ende gethoent rijpelic gelet hadden hebben ǁ wij scepenen voirg. van een vonnis gewesen, dat na allet dat voir ons comen was, ende wij gehoert hebben, wij niet en hebben gehoert men en sal Hubrecht Janssoen doen gesthien ǁ alsoe hij becraght heeft behoudelic mijnre joff(rou) voirs. te mogen gestaen met tgheen d[ie] Hubrecht voirs. gepresenteert heeft Des torkonden hebben wij scepenen voirs. onsse segelen aen ǁ desen brieff doen hangen opten sevensten dach in decembri int jair ons Heren duse[nt] vierhondert drie ende tachtich

Dorsale aantekening:

7 dec. 1483

V         

Schepen vidimus van Venloon aengaen ǁ de seker geschil tuschen Huybreght ǁ Janssen ende Catharina van Naeldwijck ǁ den 7 decembri 1483.         

Numero  LXXXVI         

Loon    

Den vo[***]ǁ [***] ǁ Quuap [***] ǁ Clocken [***] ǁ Joffrou van [***] ǁ [ee]nen moet [***] ǁ erfenissen [***]