Hilvarenbeek

Wij Willem Aert Thielmans ende Cornelis Willems vander Langrijth schepenen der vrijheijt ende dingbancke van ǁ Hilwarenbeeck tuijghen onder onsen gemeijnen zegule, dat voir ons is comen Wouter sone wijlen Everaerts van Laerhoven ǁ als man ende momboir Catharina sijnder huijsvrouwe dochtere wijlen Aert Peter Thielmans, ende heeft vercocht ende geloeft ǁ als een schuldenaer principael jaerlicken ende erffelicken te gelden ende te betaelen Peteren sone wijlen Dierck Peter Thielmans ǁ als rentmeester ende tot behoeff vande huijsarmen van Hilwarenbeeck, dat hij den selven huijsarmen jaerlicken ende erffelicken ǁ sal gelden ende betaelen, een jaerlicke ende erffelicke rente van drie carolus gulden t siaers tot twintich stuijvers den gulden ǁ gerekent oft de gerechte weerde inne anderen goeden gelde daer voor, lossende vrij van alle ordinairise ende extraordinairise lasten ǁ t zij oock van t gulden twintichste hondertse mindere oft meerdere penningen oft van alle andere impositien erfelike, alle jaer op Sint ǁ Jan Baptisten dach inden midsomere, ende waervan den iersten pacht verschijnen sal Sint Jansmisse ierstcommende, uijt ende ǁ van sijnder huijsinge ende hoevinge met heuren gronde ende toebehoirten, metter erffenisse daeraen liggende ende toebehorende ǁ gestaen ende gelegen tot Beeck inde Wouwerstraet aldaer aen erffenisse der erffgenaemen wijlen Adriana ǁ oft Dingen Smits westwaert, ende erffenisse der erffgenaemen wijlen Hendrick Spiltack met meer andere noirtwaert ǁ ende erffenisse der kijnderen wijlen Laureijs van Waelre oistwaert streckende suijtwaert neffens de voors. Wouwerstraet ǁ item uuijt ende van een stuck ackerlandt geheijten den rothacker gelegen indie looacker, aldaer aen erffuenisse der ǁ weduwe ende kijnderen Evert Peters vanden Poot oijstwaert ende erffenisse Peters van Welen suijtwaert ǁ ende erffenisse Merten Open westwaert, streckende noirtwaert neffens erffenisse der erffgenaemen wijlen ǁ Jacob als hij seijde, ende heeft geloeft op hem ende alle sijne goederen hebbende ende vercrijgende dese ǁ erffrente te waeren, gelijck men erffrenten met recht schuldich is te waeren ende donderpanden voors. altijt ǁ goet seker ende waeldoegende te maecken voor die betaelinge der erffrente voors. Gegeven int jaer ons heeren ǁ duijsent sess hondert thien den iersten februarij ǁ Geregistreert P Barthols de Cort ende uijt [***]ǁ voors. heeft bekent  St Janse lestleden eenen pacht schuldich te wesen ǁ

In dorso:

drie gulden tot laste van ǁ erf Wouter van Laer ǁhoven geregistreert ǁ folium 23 ǁ