Hilvarenbeek

Wij Nicolaes Laureijssen ende Jacob Jan Huijbrechts schepenen der vrijheijt ende dingbancke ǁ
van Hilvarenbeeck tuijgen onder onse gemeijne zegule dat voor ons is commen Henderick Corstiaen Hendericx ende heeft ǁ vercocht ende gelooft als eenen schuldenaer princepael jaerlijcken ende erffelijcken te gelden ende te betaelen Andriesen ǁ Micghilsen tot behoeve vande huijsarmen der prochie van Hilvarenbeeck vermogens den testemente wijlen Catelijn dochtere ǁ Aerts vanden Ven een jaerlijcken ende erffelijcken rente van vijff carolus gulden ende thien stuijvers tot twintich stuijvers ǁ elcken gulden gulden gerekent op dije gerechte werde in anderen goeden gelden daer voor alle jaer op Onser Vrouwen dach ǁ Lichtemisse ende ierstmael te Lichtemisse ierstcomende over een jaer loss ende vrij van alle dorps lasten innegegestelt oft ǁ innegestelt te wordene welcker handen ende hoedanich de selve laste soude moegen wesen oft genoempt worden egene ǁ uuijtgescheijden uuijt ende van twee stucken bempts gelegen tot Hilvarenbeeck inden Bavelt aldaer tusschen erffve Adriaen Sijmen ǁ Anthonis ende derve Adriaen Perbooms op doisten zijde derve Coenraet Franssen optie westenzijde streckende vande vronte ende vande ǁ claimpe innegenomen bij Jannen Fabrij gelegen int niorden totter erffenisse Adriaen Sijmon Anthonis met meer andere gelegen int suijden ǁ als hij seijde ende dije voors. Henderick vercoopere heeft gelooft als een schuldenaer princepael op hem ende alle sijne goedere ǁ hebbende ende vercrijgende dese erffrente te waeren gelijck men erffrenten met recht schuldich is te waeren ende donderpanden voors. ǁ  altijt goet seker ende weldogende te maecken voor dije betaelinge der erffrenten voors. met voorwaerden toegedaen dat dije ǁ vercoopere alle jaer op Onser Vrouwen dach Lichtmisse tot sijnen schonsten als hem gelieven sal commen sal mogen ende lossen ǁ ende quijten dese erffrente voors. metter somme van hondert carolus gulden ten prijse als voor inne gepermiteerde gelde naerde ǁ placcate van sijnen Coninclijcke Maiesteijt altijt metter jaerrente ten achteren ende onbetaelt staende behoudelijck den loss ǁ een halff jaer van te vooren op te seggen allet sonder argelist Gegeven int jaer ons heeren eenduijsent sesshonder ǁ tweendertich den derthienden julij ǁ F. Ghijsels secretaris

In dorso:
Voor ǁ de huijsarmen van Beeck van wegen ǁ Andries Michielssen augmentatie ǁ op ǁ Hendrix Christiaen Hendricx 5 gulden 10 stuver ǁ ende ǁ Jan Simon Moonen cooper des pants ǁ