Brussel

Philips bijder gracien goids coninck van Castillien van Leon van Arragon van Ingelant van Vranckrijcke van Navarre van Napels ǁ van Sicillien van Majorcken van Sardaijnen vanden eijlanden Indien ende vaster eerden der zee Occeane Eertzhertoge van Oistenrycke hertoge van Bourgoingnen van Lotharingen van Brabant van Limborch van Luxemborch van Geldre ende van Melanen Grave ǁ van Habsbourch van Vlaenderen van Artois van Bourgoingnen, Palsgrave ende van Henegouwe van Hollant van Zeelant van Namen ende van Zuijtphen, Prince van Zwane Marcgrave des Heijlichs Rijcx heere van Vrieslant van Salins van ǁ Mechelen vander stadt steden ende landen van Uuijtrecht Overijssel ende Groeningen, ende dommateur in Asien ende in Affrijcken, Allen denghenen die desen onsen brief sullen zien oft hoiren lesen, saluijt, doen te wetene dat wij ontfangen ǁ hebben die supplicatie vanden Schoutet scepenen kerckmeesters heijligeestmeesters ende andere representerende het dorp van Hilvarenbeecke inhoudende hoe dat want zij bij expedieren bevinden, nijet alleene oirboirlijck maer oijck nootelijck te zijnen inden voirs. ǁ dorpe regle ende policie te stellende opte maeten ende gewichten met oijck op tgewichte ende vercoope vanden broode soe terwen als roggen ende om den brandt ende peste te moegen weeren want daer inne veele faulten ende abuijsen wordden ǁ gecommitteert, soe hadden zij gecompeteert daerop zekere statuijten ende ordinancien inhoudende zekere keuren ende bruecken bijde overtreders te committeren gelijck die hier nae volgen ende geinsereert staen, ordinancien ende statuten gemaeckt ǁ bij schoutet ende scepenen van Hilvaerenbeke ter policien ende welvaert der ingesetenen onser heerlicheijt van Beke voirs., Item dat nijemant wie hij zij zal moegen vercoopen wijn bier oft andere waere die men metter maeten vercoopt noch ǁ oock eenich graen oft koren, dan te leveren, metter rechter geijckte maete van Hilvaerenbeke geteeckent wesende metten gerechtigen teecken vanden voirs. onser heerlicheijt, ende zoe wie bevonden zal wordden contrarie gedaen te hebbende sal gebroecht ǁ hebben drije ponden paijment oft eenentwintich stuvers daer voere, die twee vierendeelen daeraf tot behoef van ons ende van heeren Rijckalden van Merode het derdde vierendeel tot behoef vanden koermeesters ende het vierde vierendeel tot behoef ǁ vanden voirs. dorpe Item dat eenijegelijck die wilt backen broot tzij van terwe oft rogge om te vercoopen zal moeten sulcken broot backen naeden gewichte des broots onser vrijheijt van Oosterwijck, wel verstaende dat dese beckers soe vele ponden ǁ broots selen leveren ende geven voir eenen stuver als in onser voirs. vrijheijt van Oosterwijck gegeven wordt naer advenant, opde pene zoe wie contrarie doet vander verbeurte vanden selven broode tot behoef vanden huijsarmen van ǁ Hilvarenbeke ende van eenentwintich stuvers te bekeerene in vierendeelen als voere welck broot die backers sullen schuldich zijn te backen van goede leverbaere terwe oft rogge sonder eenige zemelen oft zonder ijet anders daer onder te ǁ moegen backen op die pene ende te bekeeren als voere Item dat nijemandt eenich goet oft waere dwelck men uuijtlevert oft vercoopt met gewichte en zal moegen vercoopen oft leveren dan met geijckten ende geteeckende gewichte vanden ǁ voirs. onsen dorpe, opde pene ende te appliceren als voere Item dat nijemant en zal moegen vercoopen oft leveren eenige lijnwaet oft laecken oft eenige ander goet dat men metter ellen meet dan metter rechtveerdiger maeten ǁ vanden voirs. onsen dorpe opte verbeurte vanden voirs. pene ende te appliceren als voere Item alle dieghene die wijn oft bier vercoopen willen selen voer ende eer zij dat selen moegen vercoopen te kennen gheven den voirs. keurmeesters die als dan ǁ den voirs. wijn ende bier selen coeren ende werderen op hueren prijs, opte verbeurte vanden peenen voirs. ende appliceren als voere Item dat onse schoutet ende officier van onser voirs. heerlicheijt van Hilvarenbeke die voirs. keurmeesteren ǁ sullen bij raidt ende advijse der voirs. scepenen moegen stellen ende ordineren ende hen den behoirlijcken edt staven ende van hen ontfangen, Item om alle inconnementen bijnnen onser voirs. heerlicheijt te verhueden die deur quaede bewaernisse ǁ vanden hovens af ten ende dijergelijcke occasien van vuere ende brande dickwijle zijn geschiet ende noch souden moegen geschieden soe sullen onse voirs. schoutet ende scepenen macht hebben te versien tzij in droege soemeren oft anderssins tegen alle ǁ perijckelen van brande ende daertoe moegen stellen sulcke redelijcke penen als hen nae gelegentheijt vander saecken sal duncken te behoeren, alle welcke poincten ende articulen hier voer geinsereert die voirs. supplianten aen ons versocht hebben dat wij ǁ souden willen confirmeren ratificeren ende approberen ende voer zoe veele des noot waer die van nijeuws ordineren ende statueren ende daerop doen expedieren onse oepenen brieven daertoe dienende, Waerom zoe eest dat wij hebbende wel ende int lange ǁ doen oversien ende visiteren in onsen raide van Brabant die voirs. poincten ende articulen, metten penen daerinne begrepen ende zoe die voere geinsereert staen, ende bevijndende deselve redelijck ende tot voirderinge vander gemeijnder welvaert te zijne ǁ hebben deselve geconfirmeert geratificeert ende geapprobeert confirmeren ratificeren ende approberen ende voer zoe veele des noot zij van nijeuws ge[o]rdineert ende gestatueert, ordineren ende statueren bij desen willende deselve van nu voertane ǁ wel ende onverbreckelijck onderhouden ende geobserveert ende de voirs. penen tot behoef als voere bij onsen voirs. schoutet van Hilvaerenbeke redelijck ende metter daet geexecuteert te worddene, behoudelijck dat zoeverre namaels wordde bevonden ǁ dat van noode oft geraeden waere dat eenige vanden voirs. poincten wordden verandert gemerdert oft gemindert dat de voirs. supplianten sullen tselve moegen bij gescrifte doen stellen ende ons oft onsen voirs. raide doen presenteren om bij onsen consente ǁ ende auctorizatie daerinne gedaen te worddene soe t behooren zal, Ontbieden daerom ende bevelen onsen lieven ende getrouwen cancellier ende luijden van onsen voirs. raide in Brabant Meijere van Loevene Amptman van Bruessele ǁ schoutetten van Antwerpen ende vanden Bossche ende allen anderen onsen ende onser vassallen oft der smaelre heeren rechteren justicieren officieren ende ondersaeten ons voirs. lants van Brabant dijen dit aengaen zal moegen ende hueren stedehouderen ǁ dat zij de voirs. supplianten van deser onser gracien confimatien approbatien ordinancien ende consente doen ende laeten peijselijck ende vredelijck genijeten ende gebruijcken cesserende alle beletten ter contrarien, Want ons alzoe gelieft Ende ǁ

des toirconde hebben wij onsen zegel hieraen doen hangen, Gegeven in onser stede van Bruessele den XVIIII^e dach van novembri int jaer ons heeren duijsent vijfhondert ende zessenvijftich, van onsen rijcken te wetene van Spaengnen ende Sicillien dierste ende van Ingelant Vranckijck Napels etcetera tderde, ǁ

In dorso:
Gesien en(de) gecollationeert 19 feb(uarij) 1662 ǁ

Octroij en(de) confirmatie ǁ
vanden gewichten van ende ǁ
cuere van Beeck,ǁ
et(cetera) et(cetera) ǁ
den 24e novembri ǁ 1556 ǁ Octroij en confirmatie ǁ van den eijk en keur ǁ van Hilvarenbeek ǁ numero 11 ǁ