Tilburg

Jan zoen meester Gherart Cornelis. van Nerven heeft geloeft als principael sculder hem te gelden te geven ende wel ǁ te betalen Laureijssen zoen Willem Henrick Zwijssen eenen jairlijcken ende erffelijcken chijns van vijffendetwentich ǁ stuver alle jaer erstelijcken inden hoochtijde vander geboerte ons heeren waeraff den ijersten termijn ende dach ǁ van betalinge sal zijn ende vervallen vanden hoochtijde vander geboerten ons heeren nu naestcomende over een ǁ jaer vuijt ende van huijsinge hovinge ende erffenis daer aen liggende ende daer toe behoerende vijff lopensaet ǁ off daer omtrent begrijpende gelegen inder prochien van Goorle ter plaetssen geheijten aen die Abchoven ǁ tusschen erffenis Goiairts Wouter Claens. aen deen zijde, ende tusschen erffenis Peter Peter Faessen zoen daer ǁ een steeghde tusschen beije loopt aen dander zijde, hodende metten eenen eijnde aen den stroom aldair geheijten ǁ die Leije, ende metten anderen eijnde aen die Gemeijn straet, ende noch vuijt ende van der helft van eenen ǁ stuck erffs tot lande ende weijde liggende met eenen vinnecken daer inne liggende gelegen aldair tegen ǁ die huijsinge voirschreven over der straten voirschreven, tgeheel stuck erffs voirs. tusschen erffenis der ǁ voorkijnderen meester Gerarts voorgenoemt dat hij meester Gerart voirs. in tochten beseten heeft aen deen zijde ǁ ende tusschen erffenisse Ghijsbrechts Ghijsbrechts. van Boerden aen dander zijde, hodende metten eenen eijnde ǁ [aen] erffenis Robbrechts [***] aff gedeijlt, ende metten anderen eijnde ǁ aen die Gemeijn straet voirschreven, soe hij seede ende heeft gelooft Jan voorgenoemt als principael sculder ǁ op hem ende op allen zijn gueden die hij nu heeft ende noch naemaels hebben ende vercrijgen sal moegen ǁ Laureijssen voirs. den voirs. chijns te waren gelijck men erffchijnsse schuldich is te waren, ende die voirs. ǁ onderpanden altijt goet zeker genoech ende waeldogende te maken als voor den erffchijns van vijff ǁ endetwentich stuver daer jairlijcks vuijt te vergelden soe voirschreven staet, ende allen commer ende ǁ calaingien dair inne wesende altemael aff te doen den selven, vuijtgenomen dat vuijter huijsinge ǁ hovinge ende erffnisse dair aen liggende voors. erffelijcken vergouwen wordden twee mudden roggen ǁ min anderhalff lopen roggen erffpachts aen diversche personen ierst voor vuijt te betalen ende vuijter ǁ helft panden stuck erffs voirschreven die helft van vier lopen roggen erffpachts aenden Heijligen Geest ǁ van Goorle te betalen  Oirconden hebben hijer over geweest scepenen in Tilborch ende Ghoirle ǁ Anthonis Dionijs Meijnairts zoen ende Adriaen Jan Peter Ghijben zoen die den segell hoers gemeijn ǁ scependoms desen brieff open aen hebben doen hangen int jaer ons Heeren duijssent vijffhondert ende ǁ vijftich den vijfthiensten dach van december 

Dorsale aantekening:

J Berijs ǁ 1561

Jan Cornelis Janssoon van [***] met Jan Laureijs ǁ Aertssoon als procuratie ontfangen hebbende van Laureijs Erasmus ǁ man ende momboir Marie sijne huijsvrouwe ons [***] kennelijck ǁ hebben bekent dese renthe van XXV stuiver sjairs aen dander zijde int ǁ witte van desen begrepen door Lenarden Jan Geritssoon van ǁ Nerven den penninck metten lesten afgelost ende ǁ gequeten te sijne ǁ quod attestor ǁ H. van Roij