's-Hertogenbosch

Jan soene Hermans Remeijssen anders genoempt Jan Thooten woonende in de parochie ende heerlick ǁ heijt van Tilborch voor hem selven, ende alnoch in den naame ende als gemechticht van Cornelis Anthonissen ǁ Verbundt oock ingeseten der selver heerlickheijt in procuratie brieven van den schepenen van der voors. heerlicheijt van ǁ Tilborch ende Goirle in dato den lesten dach der voirleden maent aprilis ende wt crachte der machte den ǁ voorn. Jannen Hermans daer bij soo blijckende was, gegeven ende verleent die voors. Cornelis Anthonis gemechticht ǁ door den testamente bij hem met Margriet sijne huijsvrouwe dochtere wijlen Garart Jan Beris gemaeckt ǁ ende opten eenentwintichsten junij anno XVIc ende veertich voor schepenen der vrijheijt van Oisterwijck gepasseert ǁ heeft in qualiteijten respective voorverhaelt onversceijden ende een voor all wittelick ende erffelick vercoft Michiel van ǁ Haubraken als curateur over Jenne Maria ommundige dochtere Jans de Groot van den Selen ende Maria sijne ǁ huijsvrouwe dochtere wijlen Charles van den Hooff van den Selen ende Johanna sijne huijsvrouwe dochtere Henricx ǁ Henricx te samen verweckt tot behoeff van de selve Jenne Maria ommundige eenen jaerlicken ende erffelicken chijns ǁ chijns van thien carolus gulden tot twintich stuver goets gancbaers gelts elcken gulden gereeckent, te betalen alle ǁ jaer erffelick opten derthiensten dach der maent van maij ende voor den iersten termijn van betalinge opten dertiensten ǁ maij anno XVIc negen en veertich ende binnen deser stadt vrij van allen beden, exacten subventien thiende twentichsten ǁ honderste meerdere ende mindere penningen commeren scattingen ende lasten gewoonlick ongewoont ordinaris extraordinaris innegestelt ǁ oft alnoch naemaels ingestelt te wordden egene lasten wtgesceijden te leveren ende te vergelden, van ende wt huijs schuer scop ǁ hoff ende boomgart dijen aenliggende een loopensaet oft daeromtrent int geheel begrijpende gelegen in de parochie ende heerlickheijt van ǁ Tilborch aen der kercke aldaer, tussen erve Jans Joachims Verscheuren aen deen zijde suijtwestwaerts ende tussen erve Engel ǁ kens weduwe Lenaerts den raeijmaker noort oostwaerts aen dander zijde, streckende metten enen eijnde voor aen de gemeijne ǁ plaetsse ende metten anderen eijnde aen erve Marijkens weduwe Adriaens Jansse rentmeester, van de selve Jenne Maria ommundige ǁ metten erffenisse te hebben ende te besitten ende heeft de voorschreven vercooper den voors. chijns den voorn. curateur tot behoeff der selver ǁ ommundighe opgedragen met helmelinge vertijdenisse in manieren in dijen gewoonlick sijnde, Gelovende de voors. vercooper voor hem ǁ selven als sculdenaer principael onder verbant van sijnen persoon ende allen sijnen goederen present ende toecomende ende alnoch wt rechte ǁ sijnder voors. gegevender machte op verbant van allen de goederen der voors. constituanten hebbende ende naemaels vercrijgende onversceijden ende ǁ een voor al, dat hij den voors. ommundige van den voors. chijns sculdige ende gerechte sal doen warantscappen ende dat hij allen anderen ǁ commer calaengie ende aentael in de voors. onderpande wesende oft comende der voors. ommundige aff sal doen geheelicken, Ende dat hij oock tvoors. onderpand ǁ voor de betalinge der voors. chijns der voors. ommundige jaerlicx daer wt soo voors. staet te vergelden altijt goet genoch ende welduegende sal ǁ maken ende houden, met conditien inne dese toegedaen dat die voors. cooper den voorn. chijns sal mogen lossen ende quijten tot allen tijden teffens ende ten ǁ eenenmaele mette somma van twee hondert carolus gulden tot twintich stuijvers goets permissie gelts elcken gulden gereeckent Ende metten loopende jaerchijns ǁ ende achterstellen in tijde der aff lossinge vanden selven chijns tachter ende ombetaelt staende, Behoudelick dat men den voors. los sculdich ende verbonden sal wesen een ǁ halff jaer te voorens waerlicken te vercondigen ende op te seggen, Getuijgen waren hier over schepenen in Shertogenbossche Laureijns van Scravesande ende ǁ Henrick Vloots Gegeven in den derthienden dach der maent maij int jaer ons heeren duijsent sesshondert acht en veertich

littera impuberis [***]

Dorsale aantekening:

Constitutie van eenen ǁ rente van X gulden ǁ jaerlicx wt onderpanden ǁ tot ǁ Tilborch