's-Hertogenbosch

Jan soone wijlen Joost Denis Huijberts Leijten woonende binnen der parochie en de heer ǁ lickheijt van Tilborch, ter plaetssen genent aende Velthoven, heeft wittelick ende ǁ erffelick vercocht ende vercoopt mits desen Laureijns van Kessel tot behoeff van Robbert ǁ ende Jeronimus gebroideren, soonen wijlen Jaspaer Donckers, eenen jaerlicken ende erffelicken ǁ chijns van sestien gulden tien stuvers, tot  twintich stuvers goets gancbaer gelts elcken ǁ gulden gereckent, te betaelen alle jaer erffelick. int hoochtijt van onser Lieven ǁ Vrouwen Lichtmisse, Ende voorden iersten termijn van betaelinge inden hoochtijd van onser ǁ Liever Vrouwen Lichtmisse anno sestien hondert  vijffendertich. Ende binnen s Hertogenbosch ǁ van allen beden, exactien, subventien tienste twintchste honderste meerdere ende ǁ mindere penningen commeren schattingen ende  lasten gewoonelick ongewoonelick ǁ ingestelt ende naemaels ingestelt te worden egeen uuijtgescheijden vrij te leveren, van ǁ ende uut een stuck hoij ende weijlants, negen loopensaten lants oft daeromtrent ǁ groot sijnde, gelegen binnen der parochie van Tilborch, ter plaetssen genoempt aende ǁ Velthoven aen Spertenborchs hoeffve, tussen erffve der kijnderen Willen Jan Stevens ǁ aen deen sijde ende tussen erffve Jan Willem Jan Peeter Huijben aen dander sijde streckende ǁ vanden kerckpat comende vande heijzijde ende loopende naer der kercke, totter ge ǁ meijnder straete (soo hij verclaerden) vanden selven Robbert ende Jeronimus gebroederen ǁ metten erffrecht te hebben ende te besitten. Ende heeft die voorn. vercooper den voers. chijns ǁ den voorgen. van Kessel tot behoeff vanden voorn. Robbert ende Jeronimus opgedragen ǁ met helmelinge vertijdenisse inne manieren indijen gewoonelick sijnde, geloovende ǁ de voorgen. vercooper als schuldenaer principael op verbant van sijnen persoon ende ǁ allen sijnen goeden present ende toecomende, dat hij den voorgen. Robbert ende Jeronimus ǁ vanden voers. chijns schuldige ende gerechte sal doen warantscappe ende dat hij allen ǁ anderen commer calangie ende aentael int voers. onderpant wesende oft comende, den voorn. ǁ Robbert ende Jeronimus aff sal doen geheelijck. Ende dat hij 't voers. onderpant voor de ǁ betaelinge des voers. chijns, den voorn. Robbert ende Jeronimus jaerlix als voers. staeten ǁ daer uuyt te vergelden altijt goetgenoch ende wel doenende sal maken ende houden, met conditien ǁ dat die voers. vercooper, den voorn. chijns sal mogen lossen ende quiten tot allen tijden teffens ǁ ende ten eenemael metter somme van drijehondert carolus gulden, tot twintich ǁ stuvers goets gancbaer gelts elcken gulden gereckent, Ende metten loopende jaerchijns ǁ ende achterstellen die ten tijde vanden afflossinge vanden voorn. chijns ten achteren ende ǁ ombetaelt sullen staen, Behoudelick dat men den lossinge schuldich ende verbonden sal ǁ wesen een halff jaer tevooren wittelick te vercondigen ende op te seggen. Ende staet te weten ǁ dat dese capitaele penningen sijn geprocedeert van een rente van achtien gulden vijftien stuvers ǁ jaerlijcks die de kijnderen Adriaen Antonis Geraerts de Beer, hebben gequeten, ende de hooftsomme ǁ daervan getelt aenden voorn. Jannen Joosten, soo deselve vercooper dat verclaerde ende bekende ǁ mits desen. getuijgen waeren hier over scepenen in S Hertogenbossche Johan vanden Merlen ǁ ende  Henrick van Casteren, gegeven den eersten dach der maent februarij, int jaer ons ǁ heeren duijsent sesshondert ende vijerendertich.

M. vanden Ancker

Littera census     Seigneur vanden Ancker in [***]

Dorsale aantekening:

Ick ondergeschrevene kenne ontfangen te hebben ǁ van wegen Jeronimus Donckers mijnen broeder ǁ van Jan Jan Melis de jonge wegen de kijnderen ǁ Jan Joost Denis die somme van drij ǁ hondert gulden capitaels mit drije jaeren ǁ achterstellen tegen xv gulden jaerlijcx ǁ bij accoird ende voldoeninge van renten ǁ inden witte deser begrepen actum ǁ den . feb. 16.7

Robercht Donckers secretaris