's-Hertogenbosch

Adriaen Jacobs Keteler, wonende inde parochie, ende heerlicheijt van ǁ Tilborch, heeft wittelijck, ende erffelijck vercocht Matheus van Kessel, als blockmeester vande armen ǁ des blocx vanden vischmerckt, tot behoeff vanden armen desselve blocx, Eenen jaerlicken, ende erffelicken chijns ǁ van acht Carolus gulden, ende vijff stuijvers, tot twintich stuijvers goets ganckbaers gelts elcken gulden ǁ gereeckent, Te betaelen alle jaer erffelijck opten feestdach van Onser Liever Vrouwen Lichtmisse, ende ǁ voorden iersten termijn van betaelinge opten feestdach van Onser Liever Vrouwen Lichtmisse anno XVIc ǁ drijenveertich, Ende binnen dese stadt vrij van alle beden, exactien, subventien, thiende, twintichste, ǁ honderste, meerdere, ende mindere penningen, commeren, schattingen, ende lasten, ordinarisse, extraordinarisse, ǁ ingestelt, ende ter avontueren noch naermaels inne te stellene, egeene lasten uijgescheijden, te leveren, ende ǁ te vergelden, van ende uijt eenen acker lants, vijff loopensaeten, oft daerontrent begrijpende, gelegen inde ǁ voors. parochie ende heerlicheijt van Tilborch, ter plaetse genoempt Oirle, bij t'Stappengoor aldaer, tussen ǁ erve Thonis Joost Jan Adriaens, westwaerts aen d'een sijde, ende tussen erve Jans Cornelis Diercx, ǁ oistwaerts aen d'ander sijde, streckende metten eenen eijnde noortwaerts aen erve der kinderen Nicolaes ǁ Jan Goijaerts, ende metten anderen eijnde op erve Jans Cornelis Diercx, Item van ende uijt een stuck weij ǁ lants, een loopensaet, oft daerontrent begrijpende, gelegen ter plaetse voors., neffen erve Jans Peeters ǁ de Bont, suijtwaerts aen d'een sijde, ende metten eenen eijnde westwaerts, ende neffen erve Jan Peeter ǁ Vrancken noortwaerts aen d'ander sijde, ende metten anderen eijnde oistwaerts, Ende alnoch van ende uijt huijs, schuer, ǁ hoff, bogart, ende erffenisse dijen aenliggende, vijff loopense lants, oft daerontrent int geheel begrijpenden, ǁ gelegen ter plaetse voors., neffen erve Jan Peeter Francken suijtwaerts aen d'een sijde, ende neffen erve Adams ǁ Laureijnssen van Gorop, noortwaerts aen d'ander sijde, streckende metten eenen eijnde oostwaerts aen erve ǁ der kinderen Laureijns Wouters, ende metten anderen eijnde westwaerts aende gemeijn straet, soo hij verclaerde, ǁ vanden selven armen metten erffrecht te hebben, ende te besitten, Ende heeft die voorn. vercooper den voors. chijns den ǁ voorn. Van Kessel tot behoeff vande voors. armen opgedraegen met helmelinge verthijdenisse in manieren inne ǁ dijen gewoonlijck sijnde, Gelovende die voors. vercooper als schuldenaer principael, op verbant van sijnen persoon, ǁ ende goederen, present, ende toecomende, dat hij den armen voorn(oempt) vande voors. chijns schuldige, ende gerechte sal doen ǁ warantschappe, Ende dat hij allen anderen commer, calaengie, ende aentael inde voors. onderpanden wesende, oft ǁ comende, den selven armen aff sal doen geheelijck, uuijtgenomen eenen erffelijcken chijns van twee gulden jaerlijcks aende ǁ tafele vande Heilige Geest aldaer, ende alnoch eenen erffelijcken chijns van acht gulden aen Peter Janssen Mutsarts, Ierst ǁ jaerlijcks van rechts wegen daeruijt te vergelden staende, soo hij seede, Ende dat hij oock de voors. onderpanden voorde ǁ betalinge des voors. chijns den armen voorn. jaerlijcks daeruijt als voor te vergelden altijt goet genoch, ende welduegende ǁ sal maken, ende houden, Met conditien in desen toegedaen dat die voors. vercooper den voorn. chijns sal mogen lossen, ǁ ende quijten, tot allen tijden teffens ende ten eenenmale met de somme van hondert vijfftich Carolus gulden, tot XX stuijvers goets gelts ǁ elcken gulden gerekent, Ende metten loopenden jaerchijns, ende achterstellen alsdan daeraff ten achteren staende, Behoudelijck ǁ dat men den voors. los schuldich, ende verbonden sal wesen een halff jaer te voorens wittelijck te vercondigen, ende op te seggen, ǁ Getuijgen waeren hierover schepenen in Shertogenbossche, Ghijsbrecht Pieck, ende Otto Copes, Gegeven den ǁ achthienden dach der maendt januarij, int jaer ons Heeren, duijsent sesshondert ende tweenveertich

L.C. van Kessel                                                                              

Dorsale aantekening:

8 gulden 5 stuijver ǁ uijt d'onderpanden Adriaen Jacops ǁ Keteler tot Tilborgh