Bakel

Allen den ghenen die dese openen brieven van certificatien sullen sien oft hoiren lesen Saluijt, mit alder oitmoet wij Jan ǁ Hoebrechts Aert Hunnen Lambert Mickaers Thomas Hoeben Jan Peters Thijs Noeijen ende Jan Verbeeck scepenen ǁ vander banck van Bakel doen te weten dat wij vernomen hebben ende oick van enighen van onsen mede scepenen ǁ heijligeestmeesters ende bedesetters vander selver banck onderricht zijnde dat die commissarijssen ons aldergenedigsten heeren der ǁ Keijserlijcke Majesteijt geordineert totter herttellingen in Brabant mitten anderen gedeputeerden vanden steden ende platten lande inden op[***] ǁ vander stadt ende meijerijen van tsHertogenbossche doende die herttellingen tellen alle huijsen ende hertsteden hutkens [***] ǁ cleijn huijskens nijet werdich om tellen Alzoe wel huijsen ende hoeven toebehoirende den cloosteren goidshuijsen leenhuij[sen] ǁ pontoren vanden Bossche ende andere buijten luijden Ende die selve stellen ende begrijpen inder herttellingen van onser banck ǁ ende den prochien dair onder gelegen ende want die besitters der voirs. gueden ende hoeven inder beden ons ǁ genedigste heeren des keijsers ende in andere lasten ons overcommen mit ons nijet en willen gelden noch betalen mair ǁ hen dair aff willen bevrijen uut saken van eender onredelijcker ramingen in voirledene tijden bij die vander stadt mit ǁ hueren adherenten geraempt ende gemaect bij welcker ramingen wij ende dandere scamele ondersaten van onser banck ǁ over langen tijt zeer belast ende beswairt zijn geweest gelijck wij noch zijn  Al eest zoe dat wij tot hier tot dat ǁ overmidts onser armoeden nijet en hebben connen gekeren  Soe gestaen ende certificeren wij mits deser dat onse ǁ meijninge nijet en is bij der voirs. ramingen te blijven gemerckt dat wij dair inne noijt geconsenteert en hebben want wij ǁ onsen zegel dair aen nijet gehangen en hebben ende dat wij dair bij geheelijck ende all bedorven souden wordden ǁ mair bidden oitmoedelijck dat onsen alder genedigsten heeren den Keijsere ende zijnen eedelen raide gelieven will ons zijnen ǁ arme scamele ondersaten te willen doen ontlasten vander beswaringen ons gedaen ter saken vander voirs. onredelijcker ǁ ramingen latende alle onvrije gueden kontribueren gelden ende betalen ter plaetsen dair die gelegen zijn Ende ǁ dat zijne Keijserlijcke Majesteijt ons dien aengaende nijet anders en wille houden noch laten tracteren ende handelen dan zijne ǁ ondersaten vanden anderen drie quartieren van Brabant als Loeven Bruessel ende Antwerpen getracteert ende ǁ gehandelt wordden, want wij arme ondersaten die binnen xxx jaeren herwaerts bij der oirlogen ende andersins grooten ǁ commer ende last geleden hebben, geheelijck verdorven ende te nijeuw te gaen souden want wij onder onse banck ǁ liggende hebben xxxiii hoeven ende huijsen ponteren vanden Bossche ende andere buijten luijden toebehorende ende noch ǁ dair en boven uut onsen gueden gelden jairlix viic ende xiii Rijnsgulden erffelijck ende noch viic xii mudden roggen jairlix ǁ boven nochtans alle roef brant brantscattinge uuijtternige van volck van wapenen te perde ende te voet ende dair toe ǁ dootslach van onsen armen nagebueren die wij hebben moeten lijden ende mit goeden penningen hebben moeten betalen gedragende ǁ ter sommen van xviii m vic Rijnsgulden alst blijckt bijder visitanen gedaen anno xvc xv bij meester Leonaert Touttreau Raid ǁ ordinaris in Brabant  Dair af wij egheen verlichtingen noch behulp van mede geldingen en hebben connen gecrijgen ǁ waer omme wij gebeden hebben Everarden van Doerne ende den selven volcomen macht procuratie ende sunderlinge beveel gegeven ǁ ende overmits desen genen tselve zoe voirs. staet van onsen wegen ende in onsen naem aen onsen alder genedigsten heeren ǁ de Keijserlijcke Majesteijt of in absentien vanden selver maiesteijt aen onse alder genedigste vrouwe regente ende governante etcetera ende haerder ǁ genaden Eedelen Raide of anderswair dair dat behoiren sal te moegen [ver]volgen om alsulcke gr[***] ende remedie dair ǁ tegen te verwerven soe men van goids ende van rechts wegen in goeder [***] bevijnden sal [***] ǁ ende approberende zoe wes Everart voirs. in deser ende in andere onsen saken[***] [de]sen daige toe gedaen [***] ǁ sal een ende den selven om de macht van onsen wegen te mogen substitueren eende of meer die heln mit[***] ǁ sullen in onser saken te handelen gelovende den voirs. Everden van Doirne scadeloos te houden van alles [***] ǁ in vuegen als boven doen sal super omnia habita et habenda  In oircunden van desen ende dat dit onse [***] ǁ oitmoedige begeert is zoe hebben wij scepenen voirs. den gemeijnen zegel van onsen scependoime hier [***] ǁ gehangen den ixten dach septembre int jaer xvc xxvi

Dorsale aantekening:

In potlood: 9 september 1526

Schepenbrief van Bakel

Bakel