Oisterwijk

Jouffrouw Catharina Pelgroms nagelaten weduwe wijlen Joncker Johan de Bever sone wijlen Jonker Cornelis de Bevere met eenen ǁ momboir bij haer gecoren ende haer bij den here nae gewoonten gegeven, gemechticht uuijt cracht van testamente ǁ lesten ende uuijttersten wille bij haer ende den voirs. Jonker Johan de Bever tsamen gemaeckt ende uuijt crachte der machte haer ǁ als lancxtlevende tijden voirs. testamente (soe scheen) gegeven ende verleent eenen jaerlijcken ende erffelijcken chijns van veerthien ǁ karolus gulden van twintich stuveren tstuck, Welcken chijns Adriaen sone wijlen Jans sone Peter Adriaen Sterts daer moeder ǁ aff was Elisabeth dochtere wijlen Jans de Meijere hadde wettelijck ende erffelijck vercocht Jonker Johan de Bevere voirs. te vergelden ǁ ende te betalen allen jaer erffelijck op Sinte Dionijs dach Biscop vrij van alle beden thienden twintichsten ende hondersten penningen commeren ǁ schattingen ende lasten gewoonlijck ende ongewoonlijck ingestelt ende namaels ingestelt te wordden eghene lasten uuijtgescheijden van ende ǁ uuijt twee stucken lants bij ende aen malcanderen gelegen soe ackerlant als weijlant seven lopenssaet oft daeromtrent tsamen begrijpende ǁ gelegen in de prochie van Oisterwijck ter plaetsen genoempt Udenhoudt opte Houtsche Strate tussen erffenisse Jan Peterss. de Lepper ǁ ende erffenisse des heren van Peterschen aen deen sijde noirtwaert ende tussen erffenisse Imken weduwe Jan Wilborts ende erffenisse des Biscops vanden Bosch ǁ aen dander sijde suijtwaert streckende metten eenen eijnde oistwaert aen erffenisse der kijnderen Jans sone Jan Peter Adriaenss. voirs. ende metten ǁ anderen eijnde aende Houtsche Strate, noch van ende uut de helft westwaert in een stuck beempts acht lopenssaet oft daeromtrent int geheel ǁ begrijpende gelegen in de prochie voirs. aen de Gruen Strate dese helft tussen erffenisse des heren van IJseren aen deen sijde ende metten eenen eijnde ǁ ende tussen erffenisse der kijnderen Jans voirs. hier tegen gedeijlt wesende aen dander sijde streckende metten anderen eijnde aen erffenisse Bartholomeeus ǁ Michiel Loeijen een cleijn straetken tussen beijde liggende ende halff tot dese erffenisse behoirende gelijck dat in schepenen letteren ǁ van Oisterwijck daerop gemaeckt volcomelijck begrepen staet wesende van der date den thienden dach October anno ǁ duijsent sesshondert ende derthien, heeft sij wettelijck ende erffelijck opgedragen ende overgegeven Lambrechten vanden ǁ Hovel tot behoeff vanden religieusen susteren conventie vanden derden regule van sinte Franciscus in der vrijheijt van ǁ Oisterwijck tsamen mette voirs. schepenen letteren tsamen oijck metten geheel afterstel daer van tachter ende ombetaelt ǁ staende met affgaen ende verthijen in manieren in dijen gewoonlijck sijnde Gelovende die voirs. transportante ǁ mette haren voirs. momboir uuijt crachte als voir op haer ende op alle hare goeden hebbende ende vercrijgende ǁ dit opdragen ende overgeven dijen vanden voirs. conventen vast ende stedich te houden ten eewigen dagen sonder ǁ enich wederseggen ende allen commer calangie ende aentael van haren twegen ende van haren mans ende erffgenamen wegen ǁ inden voirs. chijns wesende oft comende dijen vanden selven convente aff te doen gehelijcken, Behoudelijck dat ǁ den voirs. chijns staet te loss nae uuijtwijsen den lossbrieven daeraff sijnde, Getuijgen waren ǁ hierover schepenen in Oisterwijck Goossen Peijnenborch Wouterss. ende Cornelis Bartholomeeuss. de ǁ Bont die huere segelen in getuijgenisse hier aen hebben gehangen opten derthiensten dach Augusti ǁ int jaer ons heren duijsent sesshondert ende twintich.

L. Hoevel  [secretaris]

Dorsale aantekening:

Here Jacop Wassenberch pater vande ǁ convente binnen Oisterwijck heeft betael ǁ deser rente aen die van convente ǁ gequeten te sijn door handen Jan vanden ǁ Broeck ende Adriaen Wolffs in qualiteijt van ǁ Elisabets dochter Adriaen Laureijs Sterts ǁ opten 7 maij 1631 ende is ten prothocolle geste[ld] [ende]  aengetekent ǁ  quod attestor ǁ J. Peijnenborch

Opdracht voir ǁ t'convent van ǁ Oisterwijck van ǁ xiiii gulden ǁ uuijt onderpanden ǁ in Udenhout

Udenhout op Sint ǁ Dionijs XIIII gulden ǁ Adriaen Jan Sterts ǁ nu Vreijsken weduwe desselffs