's-Hertogenbosch

Jans Dam Henricx als wittich man ende momboir van Barbara zijne huijsvrou dochteren ǁ Bernarts Jan Gijsberts heeft wittelick ende erffelick vercoft Jannen Henricx van Nuenen alias van Brussel ǁ eenen jaerlicken ende erffelicken chijns van achtien carolus gulden vijftien stuijvers, elcken gulden tot twintich ǁ stuijvers goets gancbaers gelts gereeckent, te betalen alle jaer erffelick op drije coningen dach ende voirden ǁ iersten termijn van betaelinge op drije coningen dach, Anno xviC veertich Ende binnen dese stadt vrij van ǁ allen beeden, exactien, subventien tiende twintichste, honderste meerdere ende mindere penningen commeren ǁ scattingen ende lasten egeene uutgescheijden te leveren van ende vuijt huijs, hoff metten gronde, ende ǁ erffenisse daeraen liggende vier lopensaet off daeromtrent groot zijnde gelegen binnen der parochie van ǁ Tilborch ter plaetsche geheijten Loven omtrent de Broecksijde aldaer tussen erffenisse Jan Bernaerts ǁ Segers, ende oijck eensdeels de gemeijne Herbane aenderen zijde, ende tussen erffenisse Cornelis Joris ǁ Peeters met meer andere aen d'ander zijde, Streckende met d'een eijnde op erffenisse des voirs. vercoopers ǁ ende metten anderen eijnde op eenen gemeijnen wech, Item van ende uut een stuck saijlants derdalff lopensaet ǁ of daeromtrent groot zijnde gelegen binnen der voirs. parochie ende plaetsche, tussen erffenisse Vranck ǁ Jan Vrancken aen d'een zijde, ende tussen erffenisse Dierck Aert Scheijven aen d'ander zijde, streckende ǁ vander erffenisse Jan Wouter Cornelis totter erffenisse der weduwe mette kijnderen Aelbert van Bruegel ǁ binnen dese stadt woonende, Ende alnoch van ende vuijt een stuck weijlants groot omtrent een lopensaet off ǁ daeromtrent gelegen inde parochie ende plaetsche voirs., tussen erve hier tegens affgedeijlt aen deen ǁ zijde, ende tussen erve der pastorije van Tilborch aen d'ander sijde, Streckende van erve Giel Arien Peter ǁ Huijben tot opden gemeijnen wech, soo hij verclaerde, vanden selven coopere metten erffrecht te hebben ǁ ende te besitten, Ende heeft die voirn. vercooper den voirs. chijns den voirn. cooper opgedraegen met ǁ helmelinge vertijdenis Inne maniren indien gewoonlick zijnde, Geloevende die voirn. vercooper als ǁ sculdenaer principael op verbant van sijnen persoon ende allen sijne goederen present ende toecomende, dat hij den ǁ voirn. cooper vanden voirs. chijns sculdige ende gerechte sal doen warantscap, Ende dat hij allen anderen commer ǁ calangie ende aentael inde voirs. onderpanden wesende oft comende den voirn. cooper aff sal doen geheelick ǁ uut genomen twee lopen garsten, Alnoch dertien stuijvers veertien denier in gelt, ende twintich ǁ lekens wassch maeckende dese twintich lekens, een halff pont, binnen Gemonden altesamen te ǁ betaelen aende rentmeester van Graff Henrick vanden Berch, jaerlicx van rechtswegen uuttet ǁ voirn. huijs ende hoff te vergelden staende, Ende dat sij oijck de voirn(oemde onderpanden voirde betalinge ǁ des voirs. chijns den voirn. coopere jaerlicx daer vuijt, als voirs. staet te vergelden altijt goet genoch ǁ ende welduegende sal maecken ende houden, Getuijgen waeren hier over scepenen inne ǁ Shertogenbossche Adriaen Ploos van Amstel ende Johan vanden Noort, Gegeven den negentienden ǁ dach der maent januarij, int jaer ons heeren duijsent sesshondert negenendertich.

J. van der Meulen.

Te lossen met iijc gulden ǁ in rijcxdaelders tot ǁ ij gulden x stuijver t'stuck

Dorsale aantekening:

Gerart Adams heeft alnoch inne voldoeninge vande ǁ achterstel deser rente betaelt drije en vijftich ǁ gulden vijff stuijvers acht penningen alnoch voor de cas ǁ satie van desen briefs betaelt negen ǁ stuijvers actum ǁ 4 januarij 1651

f 53 gulden 5 1/2 stuijver   Henrijck van Nuenen

337

Tilborch ǁ Jan Adams xviij gulden ǁ xv stuijvers ǁ Constitutie