's-Hertogenbosch

Willem sone wijlen Adriaens Willemss. woonende tot Tilborch heeft wittelick ende erffelick vercoft ende ǁ vercoopt mits desen Peeteren Boudewijnss. vander Santvoort cremere, Eenen jaerlicken ende erffelicken chijns van seven carolus gulden ǁ elcken gulden tot twintich stuvers goets gelts gereeckent te betaelen alle jaer erffelick inne den hoochtijde van Sinte Luijcas ǁ evangelist, Ende voor den iersten termijn van betaelinge inne den hoochtijde van Sinte Luijcas Evangelist anno sesstienhondert ǁ ende sevenentwintich, Ende inne Shertogenbossche vrij van alle beden ons heeren des hertochs, exactien, subventien, tienste ǁ twintichste, honderste, ende alle andere meerdere ende mindere, penningen, commeren, scattingen ende lasten ordinarisse ǁ extraordinarisse, innegestelt ofte bij avontueren naermaels innegestelt te wordene, egeene lasten uutgescheijden te leveren ǁ ende te vergelden, van ende uut eenen acker toillants groot ontrent sess lopensaten gelegen onder de prochie van Tilborch ǁ ter plaetssen genoempt aenden Heijkant, tussen erve Cornelis Adriaens Corneliss. d een sijde, ende tussen erve Antonis ǁ Janss. Denen aen d ander sijde, streckende metten eenen eijnde aen erve der kijnderen Jans Janss. vander Loo Keteler, ǁ ende met den anderen eijnde aen erve IJkens weduwe Ghijsbert Cornelis Henricsss., Ende alnoch van ende uut ǁ een stuck ackerlants groot ontrent drije lopensaten, gelegen onder de prochie ende plaetsen voornoempt neffen erve ǁ des voors. Cornelis Adriaen Corneliss. aen d een sijde, ende neffen erve Henricx Corneliss. aen d ander sijde, ende metten ǁ eenen eijnde, streckende metten anderen eijnde aen erve Wouters Corneliss. van Gurp soo hij verclaerde, vanden ǁ selven cooper metten erffrecht te hebben ende te besitten ende heeft de voorn. vercooper den voors. chijns den voornoempden ǁ cooper opgedragen met helmelinge vertijdenisse inne manieren indien gewoonlijck sijnde, Gelovende de voorn. ǁ vercooper als schuldenaer principael op verbant van sijnen persoon ende alle sijne goedens present ende toecomende ǁ dat hij den voorn. cooper vanden voors. chijns schuldige ende gerechte sall doen warantschappe ende dat hij allen andere ǁ commer calangie ende aentael inde voorn. onderpanden wesende oft comende den voorn. cooper aff sall doen geheel ǁ uutgenomen eenen chijns van sess gulden, aen heer Jan de Weer presbyter tot Oisterwijck, uut t voors. ierste onderpant ǁ jairlijcx van te voorens ende van rechts wegen te vergelden staende, soo hij seede, Ende dat hij oock de voornoempde ǁ onderpanden voorde betaelinge des voors. chijns den voorn. cooper jaerlijcx daet uut soo voors. staet te vergelden ǁ alijt goet genoch ende weldueghende sall maecken ende houden, Getuijgen waeren hier over schepenen inne ǁ Shertogenbossche Peeter van Gestel ende Johan vanden Venne, Gegeven den seventienden dach der maent octobris ǁ int jair ons heeren duijsent sesshondert ende sessentwintich.

A. van Hees subscripsit

Dorsale aantekening:

Op huiden den 14 merdt ǁ 1630 heeft Wijllem Ariaen ǁ Wijllems deesen brief aen ǁ mij gelost  met de afterstel ǁ met de somme van hondert ǁ ende drie en dartich gulden ǁ ende acht stuijvers

Een rendt van 7 gulden ǁ jaerlijckxs tot Tijlborch ǁ aenden Heijkandt.

Peter Boudewijns ǁ Sandtvordt.