Tilburg

Cornelis sone Robbert Jan Willem Meussoon, heeft gelooft als principael ǁ schuldenaer, te gelden, te geven, ende te betalen Catarina ende Willemyne gesusteren kynderen ǁ wylen Hendrick Willem Claess., begyntkens opden hove binnen [***] Turnhout eenen ǁ jaerlycken, ende erffelycken chyns tot van tweendertich carolus gulden, tot XX st(uyver) t'stuck,oft de weerde ǁ derselver in anderen goeden ganckbaren gelde, gelyck ten tyde der betalinge gemeynlyck ǁ cours, ende van hant tot hant, goede betalinge wesen sal, te betalen alle jaer ǁ erffelyck, op onser lieve vrouwe lichtmisse dach, Ende sal den iersten verschyndach wesen ǁ tot lichtmisse des jaers 1643, van, ende vuyt een huys, hoff, schuer, boomgaert ǁ metten gronde, ende erffenisse daeraen, ende daertoe behoirende seven quartier oft ǁ daeromtrent begrypende, gelegen binnen der prochie van Tilborch ter plaetschen ǁ genoemt int nieuwlant, aldaer tuschen effenisse Jan Matheus Denis Bax ǁ deen syde, ende tuschen erffenisse Hendrick Jan Adam Jacobss. dander syde streckende ǁ van de gemeyne nieuwlantse strate, totten acker wech oft voetpat aldaer, Ende ǁ voorts vuyt het versterff, dwelck hen vuytten hooffde van syne huysvroue ǁ moeder is aengecomen, ende  verstorven, alsoo hy seyde, Ende heeft gelooft die ǁ voors. Cornelis, onder 't verbant van synen persoon, ende goeden hebbende, ende vercrygende, ǁ den voors. chyns te waren, als men los, ende vry erffchynsen schuldich is te waren ǁ Ende t' voors. onderpant, altyts goet, selver genoch, ende weldogende te ǁ houden, als voorde vergeldinge des voors. erffchyns jaerlyx daeruuyt te betalen ǁ als voors. staet, Ende allen commer oft calangie daerinne wesende, ǁ altemael aff te doen, sonder argelist, in oirconden hebben hierover ǁ geweest, Peter Adriaenss. van Gilse, ende Wouter Kients, Schepenen ǁ binnen Tilborch, ende Goirle, die den segel huns gemeyn schependoms ǁ desen brieve op ende aen hebben doen hangen, Inden jare ons heeren duysent ǁ seshondert ende tweenveertig, op den XXe dach der maent van januario

H. de Roij