's-Hertogenbosch

Jan sone wijlen Adriaens Janss. Molder tot Tilborch heeft wittelick ende erffelick ǁ vercoft Daniel Goijarts vanden Graft ten behoeve van Adriaen van Meerwijck, eenen jaerlicken ende ǁ erffelicken chijns van sevenentwintich Carolus gulden tot twintich stuijvers goets gancbaers gelts den ǁ gulden gereeckent. Te betalen alle jaer erffelick den eersten meert ende voor den eersten termijn van betaelingen den ǁ eersten meert, anno XVIC sessenveertich, ende in sHertogenbossche vrij van allen beeden, comeren ǁ scattingen ende lasten gewoonlijcke ongewoonlicke, ingestelt ende naemaels ingestelt te wordden egeene ǁ lasten uutgescheijden te leveren ende te vergelden, van ende uut een stuck weijlants groot omtrent vier ǁ loopensaten gelegen onder de parochie van Tilborch omtrent den Corvelschen rosmolen aldaer, tussen ǁ erve vande weedue Jacobs. Aerts. oistwaerts aen d’een zijde, ende tussen erve Joachims Janss. Verschueren ǁ westwaerts aen d’ander sijde, streckende metten eenen eijnde aen eenen gemeijnen waterlaet ende ǁ metten anderen eijnde aen erve Jans sone Jans Henricx, ende al noch van ende uut huijs, hoff metten ǁ gronde ende erffenisse daeraenliggende ende daertoe behoirende, elff loopensaten oft daeromtrent begrijpende ǁ oft soo groot ende cleijn t’selve gelegen is binnen de parochie van Tilborch voors. ter plaetse geheeten ǁ Corvel, tussen erffenisse Henricx Janss. van Pelt aen d’een zijde, ende tussen erffenisse der ǁ  erfgenamen des heere barons van Grobbendoncq met jouffrouwe Anna van Hambroeck aen ǁ d’ander zijde, streckende vande Lijckweg aldaer totter gemeijne straet, vande selven Adriaen ǁ van Meerwijck metten erffrecht te hebben ende te besitten, ende heeft die voors. vercooper den ǁ voorschreven chijns den voors. vander Graft tot behoeff vanden voors. Adriaen van Meerwijck ǁ opgedragen met helmelinge vertijdenisse inde manieren in dien gewoonlick zijnde, Geloevende ǁ de voors. vercooper als sculdenaer principael op verbant van sijnen persoon ende alle zijne goederen ǁ present ende toecomende dat hij den voors. van Meerwijck vanden voors. chijns sculdige ende ǁ gerechte sal doen warantscap, ende dat hij allen anderen commer, calangie ende aentael ǁ inde voors. onderpanden wesende oft comende den voors. Adriaen van Meerwijck aff zal doen ǁ geheelicken, Ende dat hij oijck de voors. onderpanden voorde betaelinge des voors. chijns den ǁ voors. Adriaen van Meerwijck jaerlicx daeruut, als voor, te vergelden altijt goet genoch ende ǁ welduegende sal maecken ende houden mit conditien inne desen toegedaen dat de voors. ǁ vercooper den voors. chijns ten allen tijden sal moegen lossen ende quijten teffens ende ǁ t’eenemael mette somme van sesshondert dergelijcke Carolus gulden soo ende gelijck het gelt ǁ onder de dinckbanck van Oisterwijck sijnde cours is hebbende, ende metten loopende jaerchijns ǁ ende achterstellen ten tijde der afflossinge daervan t’achter ende ombetaelt staende behoudelijck ǁ dat men den selven los een halff jaer te voorens wittelick sal moeten te kennen geven ende opseggen ǁ Getuijgen waeren hier over scepenen inne sHertogenbossche Johan van Noort ende ǁ Gielis van Bruessel Gegeven den sesten dach der maent martij int jaer ons heeren  ǁ duijssent sesshondert vijffenveertich Littera Adriani [***]

J. van der Meulen

Dorsale aantekekening:

Dese Adriaen van Meerwijck was beducht de panden inder constitutiebrieff, aen dandersijde geschreven, daer Jannen sone ǁ wijlen Adriaen Jans. Molder voor schepenen in s’Hertogenbosch verleden, niet sufficient te sijn voorden jaerlijcken, ende erffelijcken chijns ǁ van sevenentwintich Carolus guldens daerinne gemelt, Soo is tot meerder asseurantie van der selven Meerwijck voor schepenen van ǁ Tilborch ende Goirle ondergenoempt, personelijck erschenen, ende gecompareert, Bathasar vanden Hovel procureur alhier ǁ des welcks sich selven als borg, ende cautionaris heeft verobligeert voorden voorschreven Jannen, sone Adriaen Jan. Molder ǁ Gelovende dienvolgende op verbant van sijnen persoon, ende alle sijne goeden, hebbende, ende vercrijgende, des voornoemden ǁ van Meerwijck, dese panden voorden voorschreven chijns altijt goet, ende weldogende te houden, ende sulcx daer voren als schuldenaer ǁ principael te sullen responderen, ende inne staen, renuntierende tot dien eijnde van alle benefitien, exceptien, ende verweiren, die hem ǁ hierinne souden mogen te stade comen, ende in sonderheijt den rechten dicterende, dat generale renuntiatie sonder voorgaende ǁ speciale van geender waerde, sij dies soo belooftde d'voorn. Jan Adriaens Molder, op speciael verbant vande voors. panden ǁ ende voorts op sijnen verbant van sijnen persoon, ende alle sijne andere goeden hebbende, ende vercrijgende, d’voornoemden ǁ sijnen borge van dese sijne borchtochte, altoos te sullen indempneren, costeloos, ende schadeloos houden sonder argelist, actum ǁ den dertienden der maent van november int jaer ons heeren duijsent seshondert eenenvijftich voor schepenen vande Roij ǁ et relati van Stockum

[***] present

B.H. van Gils secretaris ǁ 1651

Behourlick onder