Tilburg

Wy schouteth, schepenen, gezworens, reeckenmeesters, kerckmeesteren ende heylige geestmeesteren, binnen der heerlycheyt, ende der dorpen ǁ van Tilborch, ende Goorlle, uuyten naem van ons zelven, ende voorts uuyten name van alle onse innegesetene, der ǁ heerlycheyt, ende dorpen voors., die wy in tgene hier nae volgen zal, met hennen vryen will, weten, ende consent inne ǁ desen zy, vervangende, maken condt eenen yegelycken, dat wy volgende den consente van onsse alre genedichste ǁ heere, die conicklycke majesteit van Hispanien, als hertoige van Brabant, blyckende tselve by zynder ma(jestei)ts opene ǁ brieven van octroye, gedateert van den zevensten dach in julio in den jare ons Heeren, duysent vyffhondert, ende ǁ vyffentzeventich, ondergeteeckent il[lustrissimus] de Zoete, met will, weten, ende vervolge, van joncheeren Kaerlle van ǁ Malssen, onse tegenwoordige heere van Tilborch, ende Goorll voors., om te vervallen, die costen schaden, ende ǁ lasten, die wy hebben geleden, ende noch dagelycx zyn lydende, deur die continuele tochten, uuyteringhen, ǁ ende onderhoudingen, van alreley ruyteren, ende zoudaten, te voet ende te peerde, die dagelycx deur dese heer ǁ lycheyt, (als gelegen op te groote ende gemeyne herbane) zyn passerende, ende repasserende, voorts deur ǁ dat onderhout van den stercten  in de Langestrate tegens die van Sintegeertruydenberge, ende deur andere me ǁ nichfuldige, ende onverdrachelycke lasten, daer inne wy geduerende, dese tegenwoordige troublen, belaten ǁ ende gevallen zyn, wittelyck, ende erffelyck hebben uuytgegeven, ende met voorgaende kerckegebode ten aff ǁ hange voor alle man vercocht hebben in eenen wittigen coope, Cornelise soon wilner Cornelis Peeter Mutssairt, Een ǁ stuck erffs oft gronden van onse gemeynte, tot heye, ende weye liggende, vierendertich loopensaet, ende thien roeyen ǁ oft daer omtrent begrypende, gelegen binnen der parochie van Tilborch, ter plaetse geheyten voor dat Tilborchsse ǁ Brouck, by Dongen, tusschen erffenisse Gysbert Gerit Henrick Beykens, by hem van deser gemeente oock innege ǁ nomen, aen die een zyde, ende tusschen erffenisse Goyairt Matheeus Wouters, by hem oock innegenomen, aen die ander ǁ zyde, streckende van der gemeynte van Tilborch, totter loopender Leye toe al dair, daer den Nieuwendyck beneffens ǁ die zelve Leye geordineert synde, tusschen beyder loopende, Omme dat selve stuck erffs by Cornelisse cooper ǁ voornoomt innegegraven, besloot, ende beheymt te moigen worden, zoo hy ende zyn erven oft nacomelingen, baet, ende ǁ prouffyt daer aff zullen willen hebben, Ende hebben wy daer op tot behoefft desselffs coopers voors., volcomelyck vertegen ǁ met overgeven, ende affgaen, in vuegen, ende manieren, als dat behoorlycken ende recht is, Gelovende wy ǁ schouteth, schepenen, gezworens reeckenmeesters, kerckmeesters ende heylige geestmeesteren, alle bovengenoomde, voor ons ǁ zelven, ende voor onsse oiren ende nacomelingen innegesetene deser heerlycheyt voors., onder dat verbant van ǁ alle die goeden, totter selver onser gemeente, behoorende, Cornelisen cooper voors., dat zelve stuck gronden van ǁ erven te waren los, ende vry, gelyc men los ende vry erven, schuldich is te waren, ende dat vercoopen, uuytgeven ǁ opdragen, affgaen, ende verthyen voors., altyt vast, ende stentich te houden, ende van onser wegen te doen houden ǁ zonder ennich wederseggen, ende alle commer, ende calaengie, daer op comende, altemael aff te doen, Behoudelyck dat ǁ die voornoomde cooper, hieruuyt zal gelden, jegens dat buynder, twee stuvers Brabants nae advenant, tsiaers ge ǁ win chyns, in des hertoigen chyns, op Sinte Thomas dach tot Oisterwyck te betaelen, Ende dat dit erve ten eewichen ǁ dage, zall staen ten schote, ende ten lothe, ende voorts ten gebode des Heeren, als van schouwen van heyningen, van water ǁ gangen, van wegen, ende van stegen, soo die van des heeren, ende der wethouderen wegen alhyer, alreede geordin[eert] ǁ zyn, ende in toecomenden tyde tot gemeyn welvairt van den lande geordineert zullen worden, Ende des toorconden soo ǁ hebben wy schepenen voors. ten versuecke van den schouteth, gezworens,  rekenmeesters, kerck ende heylige geestmeesteren ǁ oock voors., den zegell ons gemeyn schependoms hier onder aen doen hangen, Int jair ons Heeren, duysent vyff ǁ hondert ende zevenentseventich, Op ten vyffthiensten dach in februario, folio2