Oisterwijk

Laureys ende Aleydt brueder ende sustere kijnderen wijlen Adriaen Laureijs Huyben daer Moeder aff was ǁ Adriana dochtere wijlen  Peter Vannys met eenen momboir bijde voirs. Aleijdt gecoren ende huer bijden ǁ here nae gewoenten gegeven een huijs ende schop met hennen gronde ende toebehoirten ende erffenis ǁ daeraen liggende ende daertoebehoirende  elff lopensaet off daeromtrent begrijpende  gelegen inde ǁ prochie van  Oisterwijck ter plaetsen genoempt Berckel int Lock tussen erffenis der erffgenamen Jan ǁ Em Sijmons. aen deen zijde ende  tussen  erffenis der erffgenamen  Gerits van  Griecken aen dander zijde ǁ streckende metten eenen eijnde aende  gemeijn strate, ende metten anderen eijnde aen erffenis der  erffgenamen ǁ Peter Priem met meer andere noch een  stuck  eckerlants acht lopensaet oft daeromtrent begrijpende ǁ gelegen ter plaetsen voirs. tussen erffenis der erffgenamen Andries Peter Priem aen deen zijde ende tussen erffenis ǁ Dierick  Marten Theeus. aen dander zijde streckende metten eenen eijnde aen erffenis der erffgenamen Gerits ǁ van Griecken ende metten anderen eijnde aen erffenis  joncher Diericx de borchgrave  noch een  stuck ǁ eckerlants vier lopensaet off daeromtrent begrijpende gelegen ter plaetsen voirs. tussen erffenis ǁ Dierick Martens aen deen zijde ende tussen  erffenis der erffg(enamen) Gerit Priem aen dander zijde streckende ǁ metten eenen eijnde aen erffenis der erffgenamen Aert Francken ende metten enderen eijnde aen erffenisse ǁ Joncker Diericx  de borchgrave noch een stuck weijvelts neghen lopensaet oft daeromtrent begrijpende ǁ gelegen ter plaetsen  voirs. tussen erffenis Dierick Martens aen deen zijde ende tussen erffenis des Convents vande ǁ Ulenborch aen dander zijde  streckende met beijden eijnden aende gemeijt aldaer. Welcke voirs. goederen hem ǁ Laureijsen ende  Aleijden voir twee derden gedeelten bij ende overmidts der doot ende afflijvicheijt van hennen ǁ ouders voirs. bijden rechte van successien erffelijck aengecomen sijn Ende welck resterende derden gedeelt ǁ Cornelis sone Gerit Meeus Stevens als man ende momboir Willemken zijnre huijsvrouwe dochtere Adriaen ǁ Laureijs  Huijben ende  Adriana voirges. wettelijck ende erffelijck vercocht hebbende Aerden  Henricxsz. ǁ van Oirt hij Laureijs daernae tselve metten rechte van  naerderschappe erffelijck  vercregen hadde gelijck ǁ dat in verscheijden schepenen  lettren van Oisterwijck daerop gemaeckt volcomelijck begrepen staet. hebben ǁ in wettelijck ende erffelijck vercocht Janne sone  wijlen Jan  Ariensz. de  Molder  om bij den zelven in eenen erffrecht te ǁ hebben ende te besitten gelovende de voirs. Laureijs voir twee dorden gedeelten ende de voirs.  Aleijdt ǁ met haren voirs. momboir voir een derden gedeelt de voirg(escreven) stede ende toebehoirten voirges. te waren als men ǁ erffve schuldich is te waren ende allen commmer ende calangie daer inne wezende denselven aff te doen ǁ gehelijcken vuytgenomen een mud roggen erffpachts in eenen pacht van drije mudden roggen den erffgenaam ǁ Jan Ariensz. tot Tilborch noch vijfftalf mud roggen ter plaetsen ende aende persoonen daermen dat van ǁ rechts weghen schuldich is  ende noch drije gulden tsiaers staende te lossen met vijfftich karolus gulden oijck ǁ daermen dat van rechts weghen schuldich is Allet met drije verschenen pachten als nu tachter ende ǁ ombetaelt staende, Behoudelijck  ofter ennigen commer meer opquamen daermen tdeser tijdt nijet aff en ǁ weet datmen den selven aen copere sall aen copen  nae gemeijnen lantcoop Getuijgen waren hierover ǁ schepenen in Oisterwijck Gielis Goossensz. vander Borcht ende Adriaen Peijnenborch Petersz. ǁ die henre zegelen in getuijghenisse hier aen hebben gehangen  opten sesthiensten dach van ǁ februarij int jaer ons heeren duijsent vijff hondert sessendetnegentigh

P. van Loevel