Brussel

Kennelijck sij eenen eigelijck dat inden jaere ons heeren duijsent vijffhondert sevenentzestich opten leesten dach der maent septembris voer mij Franchois Le Febure oepenbaer notaris residerende tot Bruessele ǁ bijden rade ons heeren des connicx geordineert in Brabant totter exercitien vanden notarisscappe geadmitteert ende ten bijsijne vanden getuijgen hieronder genoempt  ccomparerende in propren persoene Joris Becx duerweerdere vanden voerscreven rade ǁ van Brabant, heeft geconstitueert machtich gemaect ende gestelt in sijne stede, constitueert maect mechtich ende stelt midts desen in sijne stede. Aerden de Meijere, Gerardt Willems de Prijckere, Bernaert van Spont ende Machiel den ǁ Voirstere, ende elcken van hen besundere al woenende binnen der heerlicheijt van Oisterhoudt bij Breda, Om in sijns constituants naeme ende voer hem te compareren voerde heeren drossart scepenen ende wethouderen der voerscreven ǁ heerlicheden van Oisterhout oft voer meijere ende laeten, waeronder dat sekere huijs ende hoff met sijnen toebehoirten hieronder genoempt, sorterende oft gelegen is, ende voer welcken die passeringe vander guedenisse vanden selven huijse behoiert ǁ te geschiedene, ende inde dit om aldaer te doen ende laeten gueden Lenaerden Bosschot int huijs hoff ende sijnen toebehoirten, daer vuijt dat gestorven sijn Marie Salentijns ende Jan Assensus haer man, welcke huijs is bij hem constituant ǁ als duerweerden vuijt crachte van zekere scepenen brieven van executoren desselfs ons heeren des conincx, bij faulte van betalinge vanden imposten vanden vier specien, aenden voerscreven Lenaert Bosschot als leeste verdierden, vercoipt voerde somme van ǁ hondert vierentzeventich carolus gulden, den gulden tot twintich stuvers, boven die rente van drije rins gulden tsiaers, ende boven den heerlijcken chijns, daer vuijt gaende, sonder meer lasten daerop bevonden, gelijck bij diversse pubicatien ende ǁ exploicten bijden constituant dien aengaende gedaen naerdere blijckende is, van welcken brieven van executoren ende autorisatien den teneur van werde te worde hiernae volght, Philips bijden gratien gods coninck van Castillien van Leon van Aragon ǁ van Napels etcetera eertshertoge van Oistenrijck hertoge van Bogonignen van Lotharingen van Brabant van Limborch van Luxemborch etc: Den iersten van onsen duerweerderen oft boden macht hebbende t exploicteren binnen desen onsen lande van Brabant hierop versocht salvuijt ǁ wij hebben ontfangen die supplicatie van onsen lieven ende getrouwen raide ende rentmeestere van Brabant int quartier van Antwerpen Jannen van Gameren bij ons geconmmitteert totten ontfange vanden penningen procederende ter causse vander verpachtinge vande impostten ǁ gestelt opde vier specien inhoudende hoe dat hem suppliant ter saken vande zelven imposten geeijndt den 20e julij respective vanden jaeren 61 62 ende 63, 12 ende 63 diverse persoenen merckelijcke sommen van penningen ten achter sijn, Als te weten Aerdt vanden Weicke vijff ǁ duijsent negenendertich ponden arthois, Willem Hendricx sess hondert vijfenentzestich gelijcke ponden, Willem van Covieringen achthondert sessenvijftich ponden vier scellingen, Jacques van Ghestel sevenhondert achtentachtich ponden thien scellingh, Peeter Goidscalck ǁ Peterssen vijfhondert vijffentzestich ponden vier scellingen ende meer anderen waer van alsoe die supplianten egheen betalinge en cunnste gecrijgen dan bij reele executie van van hunnen goeden, heeft bij Jorisen Becx duerweerder van onsen voerscreven raede van Brabant vuijt crachte ǁ van onse oepenen brieven van executorien bijden supplianten in onsen rade verworven, die haeffelijcke goeden soe wel den voerscreven gebrekelijck persoenen als hunne borgen respective toebehoirende veroerhte ende voirts ennige van hunne onruerlijcken goeden ter venten gestelt, Maer want ǁ die supplianten beducht dat hij metten prijs vanden selven onruerlijcken goeden nijet en sal toecomen emmers nijet tot volste betalinge van sijnen voerscreven tachterheden, soe souden hij die selve goeden gernne doen vercoopen met twee kerckgeboden ende den cooperen oft ǁ coopere daer inne gueden ende erfven voer hoff ende heere daer dat behoirt ende dat al om metder costen te schouwen, Ende op dat wij ende die staten ons voerscreven lants van Brabander zoude moegen betaelt wordden, Soemen tot meer stonden gelijcke ǁ exercietien heeft gedaen maer want die voerscreven supplianten tselve effectuelen nijet en soude kunnen oft moegen doen dan bij onsen consente ende auctorisatie, Soe heeft hij ons om die selve oitmoedelijck gebeden gehadt te waeren zoe eeft dat wij desen ǁ aengesien geneijght wesende ter beden des suppliants, hebben u geconsenteert ende consenteren midts desen, dat ghij de onberuerlijcken goeden vanden voerscreven gebrekelijck persoenen sult met twee voergaende proclamatien alleenlijck moegen oepenbaerlijck ende den hoochsten ǁ verdiendere vercoopen, Behaudelijck dat ghij tusschen beijden stelt gewoonlijck internal van tijde, u ordinerende de cooperen oft cooper der selver goeden daer inne behoirlijck te gueden ende te erfven voer hoff ende heere daer dat behoirt, welcke vercooperen ǁ ende guedinge inder manieren voerscreven te gesciedene willen wij te sijne van sulcken macht ende weerden al oft die selve met vier voergaende proclamatien waren ende voer sulck hebben wij die selve ingevalle als voer geauctoriseert ǁ ende auctoriseren bij desen nijettegenstaende den ordinaren desponerende ter contrarien die wij supplianten nijet en willen in desen te letten oft hinderlijcken te wesen, Die selve ten andensake blijvendt ten heure macht ende vigeur ontbieden hierom ǁ ende bevelen den wethouderen scepenen lathen ende anderen onsen ende ende onser vassallen oft der smaelre heeren justicieren ende officieren dijen dit aengaen sal, dat hij u dit doende ernstelijck verstaen ende obedieren, want ons alsoe gelieft, Gegeven in ons ǁ stadt van Bruessele den 29^e dach van aprille int jaer ons heeren duijsent vijf hondert sessentzestich, van onsen rijcken van Spaingnen Sicillien CXI^e , ende van Napels CXIIJ^e. Onder staet gescreven Bijden coninck in sijnen rade [***] ǁ ende heeft die voerscreven constituant geloeft ende geaffirneert in mijns voerscreven notaris handen die selve guedinge inder vuegen als boven te gesciedene te houden voer vast ende van sulcker weerden ende machte voerts ende ten eewigen ǁ dagen al oft die in presentie van hem gedaen oft anderssins bij hem persoenelijcken versochte ware geweest, Begherende daerenboven bij desen dit voerscreven constituant ende ex offitio aenden voerscreven heeren drossaert scepenen meijere ǁ ende laethen dijen die jurisdictie vanden selve guedinge competeert dat sij den selven Lenaerden verleenen vander voerscreven guedinge behoirlijck brieven ende acte daertoe dienende, onder henren behoirlijck salaris. versueckende ǁ voirts die voerscreven constituant van mij voerscreven oepenbaer notaris hieraff genaert te wordden een oft meer instrumenten, Aldus gedaen ende gepasseert te Bruessele ten jaere maende ende dage boven gesteht in presentie vande gesaemen ǁ ende discrete persoenen heeren Lucas vander Bruggen priestere capellaen vande collegiaelder kercke van Sinte Goedele, Ende Laureijs de Croisettes beijde woenende binnen der stadt van Bruessele, als getuijgen hiertoe specialen ǁ geroepen ende gebeden t van Navarre ǁ [***] Ende want ick Franchois Le Febure openbaer notaris, bij den raede van Brabant geadmitteert tot Bruessel residerende in ende tot tghene ǁ des voerscreven staet metten voergenoempden getuijghen oick mede versocht ende present geweest hebben. Soe heb ick dit tegewoirdich ǁ openbaer instrument (oick bijder eijgen handt des voerscreven Joris Becx comparants ende constituants onderteeckent zijnde) met mijn gewoenlijck ǁ cleijn handteecken ondergeteechent tot approbatie vander waerheijtǁ w.g. Le Febure openbaer notaris voerscreven bijden ǁ raede van Brabant gheadmitteert ǁ