Vindplaats van het origineel
Regionaal Archief Tilburg, toegangsnummer 3167, Charterverzameling Oosterhout, inv.nr. 62.
4 mei 1470/15 januari 1537
Samenvatting oorkondetekst
[1] Akte van verkoop voor schepenen van Oosterhout, door Jacob Henricx, aan Bertelmeeus Jans Brouwers, van een jaarlijkse erfpacht van vijf lopen rogge. 4 mei 1470 [2] Akte van verkoop voor schepenen van Oosterhout, door Aertken dochter van wijlen Jan Lemmen Sijmonss met Cleijs Peterss haar echtgenoot en voogd, aan Raes Jan Vrancken, van een jaarlijkse erfpacht van vijf lopen rogge 12 januari 1537.
Transcriptie
Wii Ian vander Spont ende Iacob Vrancken soen schepenen in Oosterhout verconden ende kennen dat ǁ voir ons comen is Iacob Henricx soen uuten Esshout kende ende liide dat hii vercocht had ǁ om een somme van gheldt die hem vol ende al betailt was Bertelmeeus Ians vrouws. soen viif ǁ lopen roghs erfpacht te betalen alle iair guet ende custbaer metter maten van Oosterhout ǁ aliairs tot onser liever vrouwen daghe lichtmisse, ende Iacob voirscreven heeft ghestelt ǁ onderpande viif lopensaet lants luttel min of meer soe die ghelegen siin neven [***] ǁ [..]s Claes soens erve aen deen ziide ende Ianne erve van der Spont aen dander ziide ǁ hodende voir aen tsheeren strate ende vriien ende te waeren met heeren chiinse ende viif lopen ǁ roghe erfpacht voir uutgaende in welken erfpacht voirscreven Bertelmeeus voirscreven ǁ ende gheerft is met vonnisse ende met rechte met voirwaerden dat hii dair af schuldich ǁ sal siin te doen ende te gheven alle schoten beden ende gebuiirlike rechten tOosterhout ǁ orconde dese brieve met onse zegelen bezegelt int iair ons heeren dusent vierhondert ǁ ende tzeventich vier daghe in meiie ǁ
Tweede charter:
Wij Philips van Bruheze ende Bartholomeus Pauwelss. scepenen in Oesterhout oircon[den] ǁ ende kennen dat voer ons quam Aertken dochter wijlen Jan Lemmen Sijmonss. m[***] ǁ Cleijs Peterss. haeren man ende voicht haer metten recht gegeven kende ende lijd[en] ǁ dat zij vercoft hadde om een somme van gelde die haer vol ende al betaelt is ǁ Raes Jan Vrancken zoen vijf lopen rogs erfpachts daer zij opgedeelt is nae doot ǁ van haerder moeder alsoe zij seede te betalen erffelijck ende alle jaer guet ende ǁ cusbaer metter maeten van Oesterhout op alsulcken pacht datse uut alsulken ǁ onderpanden met alsulken waernisse ende voert in alre manieren ende ǁ voerwaerden als desen ouden scepenen brieff inhoudt ende begrijpt daer desen ǁ met onse segelen besegelt doergesteken is in welcke vijf lopen rogs ǁ erfpachs voers. die voergenoemde Raes gevest ende geerft is met vonnisse ende ǁ met rechte alsoe datse hem zijn ende vaste in oirconden desen brieve ǁ met onse segelen besegelt int jaer ons heeren duijsent vijfhondert ǁ sevenendertich den tweelfften dach januarij ǁ
In dorso:
Raes Jan Vrancken ǁ