Oosterhout

Wii Henrick Peterssoen ende Ioes Geriits soen scepenen der heren van Sente Ians in Oesterhout ǁ orconden ende kennen dat comen is voirden meyer ende scepenen Raes Ianssoen ǁ ende heeft met rechte doen besetten voir een erfvoirwairden die hii so lieff ǁ hadde als dertich Riins gulden twintich stuvers voir elken gulden een ǁ buynder beemde onder landt ende water alsoe groot ende soe cleyn als dat ǁ gelegen is in die wiinstert miins heeren van Santreyn erve dat Ians van ǁ Rull was aen deen siide westwaert ende Willem Wolfaerts kiinderen erve ǁ oestwaert hodende op Ian Peter Heynen erve ende Rasens erve voirscr. ǁ welck erve voirg. Raes voirs. gewonnen heeft met vonnesse ende met ǁ rechte al volcomen ende gheen punten van rechs wegen achter gelaten ǁ die daer schuldich waeren toe te geschien behoudeliic eniegeliick siin ǁ voir recht die daer chiins oft pacht op heffende siin in welken buynderǁ beemde voirs. Raes voirg. ghevest ende gheerft is met vonnisse ende met ǁ rechte ende die heere is warande bleven als van bedingden guede met ǁ voirwairden dat hii daer aff schuldich sal siin te doen ende te gheven ǁ alle schoten beden ende gebuerlike rechten tOesterhout. In orconde desen ǁbrieve met onse segelen bezegelt int iaer ons heeren dusent vierhonǁdert eenendetseventich achtendetwintich daghe in octobris ǁ

Dorsale aantekening:
acte gepasseert voor ǁ schepenen en heren vanǁ St Ians in Oesterhoutǁ A 1471 ǁ Oisterhout ǁ Cleiis Coman ǁ Adriaen Landt ǁ was ǁ [***]