Brussel

Gesien in den Rade ons genadiche heeren des conincx van Castillien, van Arragon, van Leon, van beijden Sicillien, van Jerusalem, van Portugael etcetera ǁ ertshertoghe van Oistenrijck, hertoghe van Bourgoindien, van Lothrijck, van Brabant, van Limborch, van Luxemborch, van Gelre, ende van Milanen etcetera, geordineert in deze sijnre maiesteijts landen ende hertochdomme van Brabant die ǁ requeste aldaer gepresenteert bij ofte van weghen den schouteth schepenen ende die gemeijn ingeseten der vrijheijt van Oisterhoudt, daerbij verthoonende hoe dat hen van ouden tijden zijn vergundt twee jaermerckten, deen beginnende ǁ sanderdaeghs naer Sint Jans Baptisten dach, ende dandere smaendaeghs voer alder heijlighen, durende elck alleen eenen dach, daer mede die buijten coopluijden de voers. merckten frequenterende, qualijck wordden geaccommodeert, ǁ aengesien dat die ghene die verre zijn geseten, den voers. dach qualijck cunnen genieten, midts der distantie van dijen, ende dickwils over die ses zeven ende acht mijlen comen gereijst daer deur die vrome coopluijdens zijn vermoijt ǁ ende verarbeijt, ende om den zelven te beter te accommoderen, zoo waeren zij remonstranten hen keerende totten voors. rade, biddende in alder oijtmoet dat den zelven gelieven wilde hen supplianten de voors. twee merckt daghen te ǁ gunnen elcken van drije daghen, deen naer dander volgende, daerbij nijemant en soude wordden gepreindiceert, maer grootelijck geavancheert, ende die coopluijdens grootelijck gerieft (zoo zij supplianten zeijden), Gesien oijck de brieven van octroije ǁ daermede den voers. supplianten die voers. twee jaermerckten zijn gegundt, op al geleth, die coninck onse aldergenadichste heere hertoghe van Brabant etcetera geneghen wezende ter beden der voors. suppplianten heeft ǁ den zelven tot gerieff vande gemeijnte ende den coopman gegundt geaccordeert ende geoctroijeert, gundt accordeert ende octroijeert midts dezen, dat de voers. twee oude jaermerckten zullen voirtaen dueren drije daeghen lanck, te wetens die naer Sint Jans ǁ Baptisten dach van Sint Jans Baptisten dach naeder noenen des anderen daeghs daer naer den geheelen dach, ende des daeghs daer naer totter noenen, ende die van smaendaghs voer alder heijlighen van sondaeghs daer te vooren naeder noenen, des maendaeghs ǁ daer naer den geheelen dach ende des dijssendaeghs daer naer totter noenen, tot welcke voers. twee jaerlijcksche merckten ende daghen zijne voers. Majesteijt permitteert alle persoonen te moghen comen ende aldaer te merckt te bringhen, vercoopen ende oijck coopen alderande ǁ waeren bestiaelen ende coopmanschappen alst hen gelieven zal, zekerlijck ende vrijelijck, zonder dat zij sullen moghen gepraempt gevanghen oft gearresteert wordden in eenigher manieren ter saken van henne schulden. Behoudelijck voir zijne Majesteijts schulden ǁ alleenlijck ende de schulden oft andere oirsaken op de voers. merckt daghen gemaeckt. Aldus gedaen in de rade van Brabant tot Bruessele den 2en aprilis anno XV^C vierentnegentich ǁ

In dorso:

V ǁ 1594 april 2 ǁ Oosterhoudt ǁ Octroij ǁ Van 2 jaermercten, vande coninck de ǁ 2a aprilis 1594 daerbij die ǁ van eenen dach zijn geoctroijeert te ǁ dueren elck drij continuele dagen ǁ