Antwerpen

Philips bij der gratie Gods coninck van Castille van Leon van Arragon van Navarre van Napels van Secille van ǁ Maillorcque, van Sardanien, vanden eijlanden Indien ende vaster eerde der zee Occeane eertshertoghe van Oistenrijck, hertoghe van Bourgoingne van Lothrijck van Brabant ǁ van Lembourg van Luxembourg, van Gelre, ende van Milanen, grave van Habsbourg, van Arthois van Vlaenderen, van Bourgoingne, palsgrave ende van Henegouwe van ǁ Holland, van Zeeland, van Namen, ende van Zuutphen, prince van Zwave, marcgrave des Heijlich Rijcx heer van Vriesland van Salms, van Mechelen vander stadt steden ǁ ende landen van Utrecht, Overijssel, ende Groeningen, Ende dominateur in Asie ende in Affricken, Allen den ghene die dese onse ieghewoirdighe sien sullen Salut, ǁ Wij hebben ontfanghen die oitmoedighe supplicatie van drossaert schepenen, ghezworen, bedesetteren, ende ghemeijn inghesetene van Oisterhoudt, inhoudende ǁ hoe dat de voirs. vrijheijt zedert eenighe jaeren herwaerts mids de continuele aenstooten overvallingen, verwoestingen ende verbrandinghen vanden vijant, als oock ter ǁ oorzaeken van uuijteringhe vanden crijsvolck zeer onbewoont ghewordden es, Ende sunderling verlaeten vande treffelijcxste innewoonderen, ende meestal edelluijden die ǁ de zelve vrijheijt bewoonen plaghen, ende nu vertrocken zijn in steden om de voirs. lasten ende zwaricheijden t'ontvlieden, Ende alevenwel henre goederen aldaer ghelegen ǁ doen bauwen ende de vruchten daervan ghenieten dat nochtans dies nietemin de zelve vrijheijt daghelijcks ghepraempt word tot betaelingen vande beden ende andere ordinarie ǁ ende extraordinarie lasten opden ouden voet die ghemaect es over langhe jaren, Ende ten respecte vanden goeden staet daerinne zij alsdoen was mids de frequentatie ǁ van veele treffelijcke edelluijden ende persoonen, Al tot onverhalijcken achterdeele van onse goede ingesetene alsnu daer woonende, die alle de voirs. lasten moeten ǁ alleene draghen, biddende daeromme dat ons ghelieven wille hen te aucthoriseren dat zij henre taxen, sattingen ende lasten moegen verhalen ende stellen op alle ǁ de ghene die binnen de voirs. vrijheijt gegoet oft bedrijf houdende zijn tzij datzij daer woonen oft niet, oft dat emmers ten minste henre quoten ghemindert wordden ǁ naer advenant vande ghene die mids henre voirs. vertreck inde zelve lasten niet en zijn draegende oft gheldende, Ende hen daerop te verleenen ende doen expedieren onse opene ǁ brieven daertoe dienende, Soe eest dat wij de zaken voirs. overgemerct, Ghenegen wezende ter bede ende begheerte vande supplianten hebben dezelve bij advijse ende ǁ deliberatie van onsen zeer lieven ende zeer beminden neve ende broedere den eertshertoghe van Oistenrijck hertoghe van Bourgoingne etc. gouverneur ende capiteijn ǁ generael van onse landen van herwaertsovere, Ende van onse seer lieve ende getrouwe die luijden van onsen raede van state neffens hem wesende, Gheoctroijeert ǁ gheconsenteert ende gheaccordeert octroijeren, consenteren, ende accorderen uuijt onse sunderlinghe gratie bij desen, Dat zij deghene die binnen de voirs. Heerlicheijt ǁ van Oisterhoudt eenich labeur oft bedrijf zijn houdende sullen moeghen taxeren ende belasten tzij dat ze daer woonen oft niet, Waertoe wij hen geauctorizeert ǁ hebben ende aucthoriseren insghelijcx bij desen, Ontbieden ende bevelen daeromme onsen lieven ende getrauwen die cancelier ende luijden van onsen raede in Brabant ǁ schauteth van Antwerpen, ende alle andere onse ende onser vassalen smaelreheeren rechteren justicieren, officieren, ende onderzaeten dien dit aengaen zal, dat ǁ zij de voirnoemde supplianten van dese onse ieghewoirdighe gratie, octroij, consent ende aucthorisatie inder vuegen ende manieren voirs. doen laeten, ende ghedooghen rustelijck ǁ vredelijck ende volcommelijck ghenieten, ende gebruijcken, sonder hen te doen noch laeten gheschieden eenich hinder, letsel oft moijennisse ter contrarien, Want ǁ ons alzoo ghelieft, Des toirconden hebben wij onsen zeghel hieraen doen hanghen, Ghegeven in onser stadt van Antwerpen den veerthiensten dach ǁ decembris int jaer ons Heeren duijsent vijfhondert negenentzeventich, Ende van onse rijcken te weeten van Spaengnien Sicelle etc. het XXIIII^den ende ǁ van Napels het XXVI^en. ǁ

In dorso:

Octroij, [***] de welcke ǁ de regeerders in Oisterhout [***] te taxeren ǁ ende belasten den ghenen die binnen Oisterhout ǁ eenen labeur oft bedrijff is houdende, tzij ǁ dat ze daer woonen oft nyet. ǁ Octroij om de in en uit gesetenen te ǁ mogen belasten op hare landerijen en ǁ vasten goederen. ǁ In dato 14e december 1579 ǁ Numero 2 ǁ