Brussel

Die cancellier ende luijden van zijne conincklijcke Majesteijts raede geordonneert ǁ in Brabant, allen richteren soo provincialen als anderen, die deze tegenwoordige sullen worden gethoont Saluijt, van weghen die schouteth, schepenen ende ǁ recheerderen der heerlijckheijt ende vrijheijt van Oisterhout is ons verthoont ende te kennen gegeven, hoe dat sij hier te hove proces sustineren, teghen den ǁ drossaert, borgemeesteren ende schepenen, ende die vande laeckenneringe van Breda, daerinne soo verre is geprocedeert dat partijen sijn geadmitteert ten ǁ thoone, die sij remonstranten van hunnen tweghen voor dmeestendeel hebben affgeleijdt, ende die hun noch resteren te produceren als getuijgen woonen ǁ buijten tgebiet van sijne voors. majesteijt, soo dat hun qualijck mogelijck, ende te zeer costelijck soude wesen deselve hier te hove te produceren, soo is ǁ van weghen die remonstranten ons oijtmoedelijck gebeden, hen hierop te verleenen onse brieven van requisitorien hiertoe dienende, wij desen aengesien ǁ requireren ende versuecken U ende elcken van U hierop versocht zijnde ten versuecke vanden voors. remonstranten, oft hunnen procureur te verhoiren ende examineren ǁ oft bij eenige van U daertoe te deputeren, te doen verhoiren ende examineren onder eedt alle alzulcke persoonen ende getuijgen, als die voors. supplianten oft ǁ hunnen procureur U noemen sal op alzulcke feijten ende arlen van hunne scriftueren (daeraff zij U copije oft extract autenticqe thoonen sullen) als de remonstranten ǁ oft hunnen procureur U ende elcken van U designeren sullen, deselve interrogerende vanden redenen hunder wetentheijt ende andere circumstancien daertoe naer recht ǁ gerequireert stellende oft doende stellen heure depositien oft attestatien wel ende getrouwelijck in gescrifte, ende ons deselve toegesloten soo dat behoirt ǁ overseijndende, om daerinne bij ons voirts gedaen te wordene soo behoiren sal geroepen ierst ende vooral den voors. drossaert, borgemeesteren, schepenen ende die ǁ vanden laeckenneringe van Breda voors., oft hennen procureur om de voors. getuijgen te sien ende hoiren eeden, ende sweiren, hierinne doende alzoo ghij luijden ǁ in gelijcke oft meerdere zaken tot voirderinge ende in faveur van rechte ende justicie bij ons ende den officieren slants van Brabant soudt begheeren ǁ gedaen te wordene, behoudelijck ende eeneniegelijcken sijnen rechte, ende redelijcken sallaris ende in kennisse van dezen hebben wij den contreseghel ǁ van Brabant hieraen doen hangen Gegeven binnen der stadt Brussel den vijffentwintichsten dach van februario int jaer xvic eenendertich ǁ die cansellier ende luijden vanden raede van ǁ sijne majesteit geordinert in Brabant ǁ Cools ǁ