[Brussel]

Alzoo in den Rade van onsen genadichsten heere den coninck van Castillien, van Arragon, van Leon van beyden ǁ Sicillien, van Jherusalem,van Portugael, van Navarre etcetera Eertzhertoge van Oistenryck, hertoge van Bourgoingnen, van Lothryck, van ǁ Brabant, van Lymborch, van Luxemborch etc, grave van Habsburg, van Vlaenderen, van Arthois etc. geordonneert in dezen Zynre Majesteits lande ǁ ende hertochdomme van Brabant waere van wegen den regeerderen ende andere vanden lande ende baenderye van Breda bij hunne supplicatie ǁ verthoont ende te kennen gegeven in substantie hoe dat sy vuyt oirsaecke van deze inlantsche troublen ende oirlogen in diversche plaetssen ǁ ende quartieren daghelycx moeten seynden hunne gecommitteerde zoo hier te hove, tot Antwerpen, s'Hertogenbossche, Herentals, Lyere als ǁ andere steden ende plaetssen, soo wanneer zy by dezelve steden, capiteynen oft hooffden van oirloge bescreven wordden, oft anderssins hunne ǁ affairen tzelve zyn verheysschende ende dat deselve gecommitteerde dickwils wordden becommert ende gearressteert voer schulden oft actien ǁ die ten laste vanden voerscreven quartiere ende lande van Breda oft eenigen dorpen van dyen wordden gepretendeert, tot grooten achterdeele met ǁ alleenlyck vande dienste van zyne Majesteit maer oyck tot postpositie vande affayren vande lande, Soo hebben de supplianten inden Rade van Brabant ǁ verworffven twee distincte acten, daerby geordonneert is, dat twee persoonen van den voerscreven lande van Breda by scriffelycke commissien ǁ zouden moegen vuytgesonden wordden ten dienste van zyne voerscreven Majesteit ende van de Staeten vanden lande van Brabant ende oyck ǁ om daffayren vande voerscreven lande van Breda ende dorpen daeronder resorterende, ende dat dezelve vry ende vranck met hunnen peerden ǁ ende anderssins zouden moegen gaen ende keeren in alle steden ende plaetssen van desen lande van Brabant sonder by yemande ǁ te moegen wordden becommert, geinquieteert, gearresteert oft geapprehendeert voer eenige schulden, actien oft presentien die men ǁ tot laste vande voerscreven lande van Breda oft eenige dorpen vanden zelven zoude willen heysschen, daeraff de leste oft tweede acte ǁ is in date van XVIII den augusti lestleden, ende want deselve acte hen supplianten alleenlyck is verleent voerden tyt van zesse ǁ maenden die alsnu commen te expireren ende dat den dienst van zyne Majesteit ende vande voerscreven Staten van Brabant ende affairen ǁ vanden voerscreven quartiere ende lande van Breda nu ter tyt zoo zeer ende meer zyn requirerende dat zij supplianten eenige gecommiteerde ǁ over al moeten houden vacerende als oyt van te voerens ende dat den dienst vande zelve zyne majesteit ende Staeten vanden voerscreven ǁ lande van Brabant deur d'inquieteren ende becommeringen die hen zouden moegen gedaen wordden, grootelyck zoude wordden geretardeert ǁ Soo is der supplianten oytmoedich bidden om veruyenwinge der voerscreven acte voer den tydt van eenen jaere, daerby hunne gecommiteerde ǁ wordde gepermitteert alomme bynnen den voerscreven lande van Brabant ter oirsaken als voere te moegen vacheren vry ende vrack,ǁ Onse genadichste heere die coninck hertoge van Brabant etc regardt nemende op tgene des voerscreven is , heeft geordonneert ǁ ende ordonneert by dezen dat de twee persoonen die by ende met scriftelycke commissie van hun supplianten vuytgesonden zullen ǁ wordden ten dienste van zyne Majesteit vande Staeten van Brabant ende om de gemeyne saecken vande voerscreven lande van ǁ Breda ende dorpen daeronder resorterende, sullen vry ende vranck met hunnen peerden moegen gaen ende keeren in ǁ alle steden ende plaetssen van dezen lande van Brabant , sonder by yemanden becommert, geinquieteert, gearresteert,ǁ oft geapprehendeert te moegen wordden voer eenige schulden oft actien die men opten voerscreven lande van Breda oft dorpen ǁ daeronder resorterende zoude moegen pretenderen ende dat al voerden tydt van zesse maenden naestvolgende oft dat ǁ anders by den hove dyen aengaende zal zyn geordonneert, Aldus gedaen inden Rade van Brabant den zeventhiensten ǁ february int jaer XV^C zessentneghentich ǁ Coots ǁ

In dorso:
Sint Anthoenis Lips voer trappoel ǁ hierinne gedaen [***] ǁ ene voer deze acte ǁ [***] ǁ