Gilze

Wij Peeter Peeter Smits ende Bastiaen Anthonis Wijnants schepenen in Ghilse doen condt ǁ alsoo joncvrouwe Anna van Hambroeck vrouwe van Jeckschot rechtelijck heeft doen besetten ǁ seker parcheel beemden toecomende off in handen hebbende Wouter Anthonis ǁ Beris tot Tilborch groot ontrent achthien loopensaet off soo groot ende cleijn ǁ onbegrepen der maete alst gelegen is onder Ghilse int Ghilsebroeck ontrent ǁ de Hackelers bijde hoeven genaemt soomen verstaet den raephorst, oistǁwaert de kinderen van Adriaen Adriaen Somers ende Wouter Anthonis voorǁnoemt met henne erven, zuijtwaert aen dheer Jan van Ghilse erve westǁwaert . . . . ende noortwaert Jacob Michielsen erve ǁ omme te hebben betaelinge van het verloop van een jaerlijcxse rente van ses ǁ Arnhemse guldens opden selven beempt uijtgaende, ende alsoo naer ontsettinge ǁ tusschen de voors. vrouwe van Jeckschot ende den voorgenoemden Beris ǁ soo verre geprocedeert is, dat eijntelijck bij vonnisse diffinitieff van date ǁ den negenthiensten februarij XVI^c achtenveertich den voornoemden Beeris ǁ bij wethouderen in Ghilse is gecondemneert inden eijsch van den voors. vrouwe ǁ midtsgaders inde costen van recht ende naer dien den voors. Beeris ǁ is gebleven in foute vanden gemelten vonnisse te voldoen ende dat naer ǁ sommatie ende rospandthalinge uijt crachte vanden voors. vonnisse ende ǁ beteeckeninge des officiers vanden voors. beemt gehouden sijn drije ǁ coopdaegen, naer voorgaende drije sondaechse proclamatien in conformiteijt ǁ van de ordonnantie deses landts van Breda ende eijntelijck met het ǁ uijtgaen vande brandende keersse cooper gebleven is Jan Ghijsbrechts ǁ Verschueren als hoochsten bieder volgens de vercoopcedulle daer van sijnde ǁ Soo is uijt crachte van dien den voors. Jan Ghijsbrechts Verschueren in het ǁ stuck beemden voors. gevest ende toegedaen met vonnis ende met ǁ recht soo dat het hem seker is ende vast, behoudelijck eenen igelijcken ǁ sijns rechts ende voorcommers ende dat hij cooper uijtten voorgenoemden ǁ gecoften pandt jaerlijcx sal moeten gelden ende uijtreijcken de ǁ gerechtige helft der voors. rente van ses Arnhemse guldens ende voorts ǁ onderhouden alle gebuerlijcke rechten, In oirconden desen brieff ǁ met onse segelen besegelt int jaer ons heeren duijsent seshondert ǁ ende achtenveertich achthien daegen in novembri ǁ J. Hanecops 1648 ǁ

in dorso:

numero 2^o ǁ vestbrieff ǁ voor ǁ Jan Ghijsbrechts Verschueren ǁ