Gilze

Wij Peter Cristoffel Brouwers zone ende Huijbrecht Peter Jan Lambrechts zone schepenen in Ghilze, oirconden ǁ dat voor ons quamen Dingne Laureijs Aertssen dochter weduwe wijlen Anthonis Anthonis Wijnens molener was ǁ in zijnder tijt tot Tilborch, geassisteert met Jan Ianssen de Bie als heuren gecoren voight tot dese zaecke voor ǁ heur selven ende Mercelis Heijmans de molder als voight ende Jan Ianss. de Bije voors. als toesiender beijde met ǁ recht gestelt zijnde soo zij zeijden inden naeme van Anthonis Anthonis Wijnens zoons voors. onmundige kinderen ǁ ende lijden dat zij tesamen wittelijck vercoft hebben om een somme van gelde die hen vol ende al betaelt is ǁ Anthonisen Henrick Jans zoons Vermeer zone de twee parcheelen beemden nabescreven, te weten ijerst ǁ een stuck beemden groot drije loopensaet ende tweeenveertich roeden oft alzoo groot ende cleijn ombegrepen der ǁ maten alst gelegen is onder Ghilse inde Ghilsche vucht westwaert aen Sebrecht Ian Anthonissen erve ǁ noortwaert aen stuck beemden nader mert oostwaert aen Adriaen Anthoniss. tot Riel erve ende zuijdwaert ǁ aen . . . . ende noch een stuck beemden houdende omtrent zes loopensaet gelegen ǁ daer omtrent, oostwaert aen Adriaen Vrancken tot Tijlborch erve, zuijtwaert aen t stuck beemden ijerst ǁ voors., westwaert aen Sijmon Anthonis Ianss. weduwe ende kijnderen erve, ende noortwaert aen seker ǁ erve genaempt den raephoff ende met eenen steert comende aende Ghilsche Leije, te vrijen ende te ǁ waren de vercofte parcheelen, van erven voors. metten gerechten heeren chijns daer jaerlijcx uuijtgaende ǁ zonder ennigen anderen commer, behoudelijck dat se medepandt ende bijpandt blijven zullen daerse met recht ǁ schuldich zijn medepandt ende bijpandt aff te zijn, in welcke twee stucken beemden voors. de voorgenoemde ǁ Henrick Ianss. Vermer inden naeme ende tot behoef vanden voorgenoemde Anthonisen zijnen zone gevest is ende ǁ toegedaen met vonnis ende met recht zoo datse hem zeker zijn ende vast met voirwaerde dat hij hijer aff ǁ doen sal alle gebuerlijck recht, in oirconden desen brieven met onse segelen besegelt int jaer ons heeren ǁ duijsent vijffhondert zessentnegentich drijentwintich dage in aprille ǁ secretaris J. Adriaens ǁ