Raamsdonk

Ick Adriaen Adriaenss. rechter inden ambocht tot Raemsdonck ende Adriaen Gijsbertss., Peter ǁ Janss., Adriaen Janss., Mathijs Wijten, Cornelis Adriaenss., Gerit van Bommel Geritss. ende ǁ Claes Meuss. met mij als heemraeders inden selven ambocht voers. orcunden ende ǁ kennen dat voer ons gecomen is voer een gebannen vierschaere Frans Hubertss. ǁ ende gaff over met eenre vrijer gyften Jan Gijsbertss. sevendalff gerden lants ǁ gelegen midden in Clauwaerts weer plach te wesen aengaende van der Donga ǁ streckende nortwaert totter Maess toe Jan Buijss. wedue erve gelegen aendie ǁ oest sijde vanden voers. weer ende Jacoep Wilms erfgenaemen erve aen die weest ǁ sijde Ende dese voers. sevendalff gerden lants geloefden Frans Hubertss. voers. Jan ǁ Gijsbertss. voers. te vrijen ende te waeren nu ende ten ewijgen daegen naeden lantǁrecht ende alle voercommer aff te doen tot desen daege toe In orcunden ǁ der waerheijt ende want wij voers. heemraet genen gemenen zegel en ǁ hebben soe hebben wij gebeden Adriaen Adriaenss. onssen voers. rechter dat hij ǁ ons desen brieff besegelen wil dwelck ick Adriaen Adriaenss. voers. rechter ǁ duer bede der voers. heemraet alsoe gedaen hebbe mijnen zegel hier aen ǁ gehangen over hem luijden ende over mij selven int jaer ons heeren dusent ǁ vijff hondert ende dertich den lesten dach in octobris ǁ