's-Hertogenbosch

Guilliam Oliviers Inne den name ende van wegen Nicolai Kemp Coopman tot Antwerpien ende Marikens sijne huysvrouwe ǁ dochtere wijlen meester Jooss Careest van den selven meester Joos ende wijlen Geertruyt Blicmans sijn huysvrouwe te samen verwect ende inne dyer qualiteyt de voornoemde Guillam tot sgeens navolgende ǁ is gemechticht specialicken door procuratie brieven der Bourgemeesteren, Schepenen ende Raidt der stadt van Antwerpen in date den twintichsten marty lestleden ende vuyt crachten der machten hem daer inne van den ǁ voornoemde Niclaessen ende Maria sijne huysvrouwe alst blijcte gegeven ende verleent heeft geloeft inne dyer qualiteyt te gelden, te geven ende te betaelen Sustere Catharina Anthonis dochter van St Oeden Roede ǁ als conventualinne des Convents van Sinte Catharynen Dael tot Sinte Geertruydenberge ende Goyaert Goyaertz. vanden Donck tot behoeff desselffs convents eenen Jaerlycken ende erffelycken Chijns ǁ van twee carolus gulden tot twintich stuvers tstuck goets gancbaers gelts alle jaer erffelijck den achtiensten dach der maent augusti ende voorden iersten termijn van betaelinge den achtiensten augusti deses jaers ǁ sessentnegentich Ende in Shartogenbossche vrij van allen beden ende exactien subventien commeren ende lasten egeene uutgesceyden te leveren ende te vergelden van ende vuyt eene hoeve lants den voornoemde Niǁclaessen ende Maria sijn huysvrouwe toebehoorende gelegen inde prochie van Vucht Sinte Peeters ter plaetssen genoemt Wargarshuysen te wetene huysingen timmeraigien henne gronden hoven ackerlanden ǁ weylanden heyvelden hoyvelden houtwassen ende alle andere henne rechten ende toebehoorten tot wat plaetssen gelegen ende te bevynden gelijckerwijs ende in alder vuegen maten ende grootten als die den voors. ǁ Niclaes ende Maria sijn toebehoorende ende gelijckerwijs Catharina wedue Peeter Ribben deselve als laetster in haer gebruycke tegenwoordelijck is hebbende ende behoudende soo hij verclaerde heeft alnoch geloeft ǁ de voornoemde Guillam uut crachte sijnde gegeven der machten voors. op verbant van allen den anderen goederen des voors. Niclaes Kemp ende Maryken sijn huysvrouwe present ende toecomende dat hij t'voornoemde Convent vande ǁ voors. chijns sculdige ende gerechte sal doen warantscappe Ende dat hij allen anderen commer calangie ende aentael inde voornoemde hoeve lants met allen haren rechten ende toebehoorten voors. wesende oft comende ǁ den voors. Convente aff sal doen geheelycken uutgenomen eenen erffelijcken pacht van een mud roggen den taeffelen des heylichs geest ten Bosch Item diversche jaerlijcken ende erffelijcken chijnsen tzamen tot drije ǁ ende twintich gulden eenen stuver jaerlijckx beloopende aen diversche goidtshuysen onlancx uuter voors. hoeve gevest ende geconsituteert ende alsoo uuter selver hoeve tevoorens van rechts wegen te vergelden ǁ staende soo hij verclaerde Ende dat hij de voornoemde hoeve lants met allen haren rechten ende toebehoorten voors. voorde betaelinge des voors. chijns jaerlijckx den voornoemde Convente daer vuyt soo voors. is te vergeldene altijt ǁ goetgenoch ende waeldogende sal maken ende houden Met condicien toegedaen dat de voors. Niclaes Kemp ende Mariken sijn huysvrouwe desen chijns ten allen tijden sullen mogen lossen ende quyten tegens den penninck ǁ sestien in gelijcke carolus gulden oft die weerde als boven Ende metten jaerchijns ende afterstellen die ten tijde der lossinge van de voornoemde chijns ten afteren ende ombetaelt staen sullen behoudelijck dat alsulcken loss ǁ een halff jaer te vorens wittelijck sal worden vercondicht ende opgeseeght Ende soo dese constitutie gesciet ten fine van naer der hipotheecquen ende beter commoditeyt des voors. Convents in plaetsse van alsulcken ǁ legaet van twee gelijcke gulden jaerlicke ende erffelicke rente te loss den penning sestien als wijlen heer ende meester Goijaert Blicman priester ende Canonick der voors. kercke in sijnen testament beset hadde ende geleǁgateert den voors. Convente te ontfangen uut sekere rente van vijfftich gulden siaers die Geertruyt sijn sustere uut haren huyse tot Antwerpen hem Testatoer vergeldende was ende soo den voors. Convente moijelijck ǁ soude wesen dese rente tot Antwerpen te haelen soo de Testatoir hadde gewilt dat de voors. Gertruyt sijn suster dese rente van vijfftich gulden soo lange sij leven soude inhouden soude ende dat dese voors. ǁ rente van twee gulden siaers met meer andere sulcke renten van pijelegaten tzamen tot vijfftich gulden jaerlijckx bedragende midlertijd souden uut sijns Testatoirs hoeve voors. bijden proprietarissen oft gebruijcker ǁ der selver gegonden worden in plaetsse van alsulcke vijfftich gulden jaerlijckx als hij Testatoir der voors. Gertruyt sijn suster in den voors. Testament gemackt hadde haren leven lanck uuter voors. hoeve te ontfangen ǁ nae breeder inhouden desselve Testaments Soo sijn gestaen voor Schepenen ondergescreven de voornoemde Suster Catharina ende Goyaert vander Donck inne den name ende als scriftelicken last ǁ hebbende int stuck van desen van de Matere ende allen dandere Conventualinnen desselffs Convents ende hebben inne dyer qualiteyt in den name desselffs convents opte voors. rente van vijfftich gulden siaers ǁ vuyten huyse de clavecimble genoemt tot Antwerpen gelegen der voors. Geertruyt toebehoort hebbende mitgaders op deselve huysinge wittelijck ende erffelijck tot behoeff des voornoemde Niclaes Kemp ende Marikens sijn ǁ huysvrouwe ende ten behoeve van allen anderen geinteresseerden vertegen ende vercopen mitz desen met helmelinge inne manieren inne dyen gewoonlijck sijnde Gelovende de voornoemde suster Catharina met haren momboir bij haer ǁ daer toe vercoren ende haer van richter nae gewoonten gegeven ende Goyaert van[den Do]nck op verbant van allen den goederen des voors. Convents present ende toecomende dit verlijden eeuwelick vast stedich ende van weerden ǁ te houden sonder tegenseggen Getuygen waeren hier over Schepenen inne Shartogenbossche Handrick Franss van Gestel ende Herman Pelgrom. Gegeven den tweeden dach der maent van augusto int jaer ons ǁ heeren duysent vijffhondert sessentnegentich ǁ P.v.Hees ǁ Litera conventus ǁ scripsit hoc in fine libri ǁ