Geertruidenberg

Inden name ons heeren amen, Wij Floris van Mecre ende Michiel vander Stael Schepenen der stede Geertruijdenberghe, doen ǁ condt ende kennelijck eenen iegelijcken dien dese opene letteren sullen sien oft verthoont worden, dat op heden datum ondergeschreven voir ǁ ons gecomen ende gecompareert zijn in propere persoonen Joost Hemekens van Cortrijck trompetter van zijne [***] compagnie ǁ ende Digna Straetsen van Breda, wettighe houwelijcx lieden, beijde gesont van lichame gaende ende staende, haers verstandts ǁ memorie ende vijff sinnen over al wel machtich ende gebruijckende, alst opentlijcken bleke, die welcke aenmerckende der ǁ menschelijcke natueren broosheijt ende datter niet sekerderen is dan die doot ende niet onsekerder dan die ure der selver, hebben ǁ met goeden voirbedenken vuijt hennen vrijen eijgen wille, sonder daer toe geinduceert te zijne oft oijck bedwongen van iemanden, ǁ gemaeckt geordonneert ende gesloten maecken ordonneren ende sluijten midts desen hen Testament ende vuijtersten wille inder ǁ vuegen formen ende manieren hier nae volgende, Inden iersten bevelen zij Testateuren henne sielen Gode almachtich ende ǁ henne lichamen nae hen overlijden der Christelijcke begraeffenissen, Ende comende totte dispositie van henne tijtlijcke goederen ǁ henlieden bij den wille Gods op dese werelt vergundt, hebben omme de sonderlinge lieffde ende affectie die zij totten anderen zijn ǁ dragende ende omme naer andere redenen hen daer toe porterende ende moverende, malcanderen reciproce den lancxtlevenden van ǁ hen beijden gegeven gemaect ende gelegateert geven maecken ende legateren midts desen alle de selve henne goederen, ruerende ǁ ende onruerende actien ende crediten, die zij nu hebben ende noch vercrijgen sullen mogen, geene vuijtgesundert, omme bijden ǁ lancxtlevenden daer mede zijnen oft haeren vrijen wille te moghen doen, ende daer aff disponeren zoot den selven lancxtlevenden ǁ goet duncken ende gelieven sal, sonder contradictie van iemanden, den selven lancxtlevenden zijnen oft haeren vinuverselen erffgelaeten ǁ instituerende midts desen well verstaende ende met conditie dat bij zoo verre zij ene den eenich kindt oft kinderen van hennen ǁ beijde lijve geprocureert in leven achterlaeten, dat de selve lancxtlevende tselve kindt oft kinderen sal alimenteren ende onderǁhouden van cost ende cleeden eerstlijck ende tamelijck nae hennen state, die ter scholen houden gaende, ende in alles te doen leeren ǁ wijsen ende wegen als een goet vader oft moeder henne kinderen schuldich zijn te doene, ende zij malcanderen dat zijn toevertouwen ǁ sonder dat de selve lancxtlevende voirder gehouden sal zijn het selve kindt oft kinderen voir vaderlijck oft moederlijck goet het ǁ meer te geven oft vuijt te reijcken dan te goeder gelieften van den selven lancxtlevenden, Ende dit seijden ende verclaerden zij ǁ testateuren te wesen hen testament ende vuijterste wille, begheerende ende willende dat tselve volcomen effect hebben en sorteren ǁ sal tsij bij forme van testamente codicille donatio inter vivos vel causa mortis oft anderssins zoo tselve nae recht best ǁ soude mogen subsisteren, niettegenstaende dat alle de solempnisen ten dier nade geschrevene rechten gerequireert mochten wesen ǁ hier inne niet geobserveert en wesende, oijck niettegenstaende eenige costumen locale oft municipale rechten ter contrairen ǁ alle de welcke zij testateuren hebben gederogeert ende derogeren midts desen in kennisse der waerheijt van allen tghene voirs. is ǁ hebben wij schepenen boven genoempt dese letteren met onse segelen besegelt int jaer ons heren duijsent vijff hondert vijff ende ǁ tnegentich achtien daghen in maijo.ǁ van Mansdale ǁ 1595 ǁ