Terheijden

Wij Robbrecht Cornelissen Bocx ende Frans Janssen van Doren schepenen in Terheijden ǁ oirconden dat voor ons quam Cornelis Adriaenssen van Ghilse ende lijde dat hij ǁ vercoft heeft ons een somme van gelde hem vol ende al betaelt sijnde, aen Adriaen ǁ Maes als armmeester Terheijden, in den name ende ten behoeve van den armen ǁ aldaer, een stuck weijlants ende seggen groot ontrent anderhalf buijnder ǁ ofte soo groot enden cleijn ombegrepen der mate als het selve gelegen is onder ǁ Terheijden aenden legen vaertcant, oostwaert Jan vanden Kerckhoven erve ǁ suijtwaert s’lants wateringe aldaer, westwaert den legen vaertcant ǁ voors., ende noortwaert swaensweehsken, te vrijen ende te waeren ǁ met een veertel roggen ende ses gulden thien stuijvers s jaers die den armen ǁ Terheijden voors. selver daer op heffende is ende met den gerechten heeren ǁ chijns daer jaerlijcx uijtgaende sonder eenigen voorder en commer, in ǁ welck vercofte stuck faeijlants ende seggen voors. den voorgenoemden ǁ armmeester Adriaen Maes ten behoeve vanden armen (als voor) gevest is ǁ ende toegedaen met vonnis ende met recht soo dat het den voors. ǁ armen seecker is ende vast, met voorwaerde dat men hier afdoen ǁ sal alle gebuerlijcke recht. In oirconden desen brieff met onse segelen ǁ besegelt, inde vestcamer ter secretarije tot Breda op huijden ǁ den achtentwintichsten april anno XVI^C vierentsestich ǁ G van Alphen ǁ

In margine:

Pro deo ǁ