Breda

Wij Peter van Baerle ende Cornelis Montens schepenen in Breda oirconden dat voir ons quam Joost Peters ǁ zone van Ghilze, ende lijde dat hij vercoft heeft om een somme van Gelde die hem vol ende al betaelt is ǁ Willemen Jan Willems zone vanden Kijeboom, een stuck weijden hendende omtrent een veertelsaet gelegen ǁ ter Teteringen opt hoeveneijnde aende gemeijn stege, oostwaert aen wijlen Henricx Montens erfgenamen erve, ǁ zuijtwaert aen Henrick Evert Snavels zoons, erve westwaert aen Daniel Cornelis Peters zoons vanden ǁ Merberch die men noemt Schreijnmaeckers, erve ende noortwaert aende gemeijn stege voirs., ende noch ǁ een stuck beemden houdende omtrent een buijnder, gelegen inde Leechburcht inde Moeren, oostwaert aen ǁ Daem Henrick Cornelis Robbens zoons erve, zuijtwaert aen des voirs. Daniel Cornelis Peters zoons ǁ vanden Merberch erve, westwaert aen Peter Jan Boomaerts zoons erve, ende noortwaert an Jacop ǁ Matheeus zoons vanden Kijeboom erve, al zoo groot ende cleijn als de vercofte twee stucken erfs voirs. ǁ gelegen zijn, die onder andere de voirgenoemde Joost Peters zone van Ghilze eertijts vande kijnderen ende ǁ erfgenamen wijlen Henrick Cornelis Robbens zoons gecoft ende vercregen heeft nae uutwijsen des ǁ schepenenbriefs in Breda daer af zijnde van date tijt jaer XV^C negenenvijftich twee dage in meerte, ǁ te vrijen ende te waren de vercofte twee stucken erfs voirs., met drie rijns gulden t stuck tot veertich ǁ grooten vleems erfchijns ter quijtinge den penning zesthien, met noch vijer rijns gulden ende thien stuvers  ǁ erfchijns ter quijtinge oick den penning zesthien, die heer Anthonis Valijant priester deken der kerck ǁ van Breda nu ter tijt heffende is, ende met sheeren chijnse, daer jaerlicx uutgaende, zonder ennigen ǁ anderen commer, verbijndende de voirgenoemde Joost Peters zone van Ghilze voir de waernisse vande vercofte ǁ twee stucken erfs voirs. ende settende den voirgenoemde Willemen Jan Willems zone vanden Kijeboom ende ǁ zijne nacomelingen daer af te waerborge ende te verhale hem zelven ende alle zijn goeden, ruerende ende ǁ onruerende, die hij nu ter tijt heeft ende naemaels vercrijgen zal mogen, in welcke vercofte twee ǁ stucken erfs voirs. de voirgenoemde Willem Jan Willems zone vanden Kijeboom gevest is ende toegedaen ǁ met vonnis ende met recht, zoo datse hem zeker zijn ende vast, met vorwaerde dat hij hier af doen ǁ zal alle gebuerlick recht, in oirconden desen brieve met onse zegelen bezegelt, int jaer ons heeren ǁ duijsent vijfhondert ende tzestich, zeventhien dage in octobri ǁ J Corput ǁ

In dorso:

Joost Peters zone van Ghilze heeft bekent dat Whilhem Jan ǁ Willems zone vanden Kijeboom hem alnu wittelick gelost ǁ ende afgequijt heeft de drie rijns gulden tsiaers ter quijtinge ǁden penningen zesthien, die bij hem Joosten den zelven Willemen ǁ aengenoomt waeren nae uutwijsen van desen schepenenbrieven ǁ ende die hij Joost (zoo men bevonden heeft dat niemandt ǁ anders die heffende en is, zoo hij zeijde) zelve daer opgeheven ǁ zoude hebben, alzoo dat deselve drie rijnsgulden t siaers ǁ alnu geheel doot ende te nijet zijn, Actum den twintichsten ǁ junij anno XV^C eenentzestich, present Jan Otten ǁ zone van Galen, ende Adriaen de Bont Jans zone, als ǁ getuijgen ǁ J ende ick ǁ J Corput secretaris ǁ