Terheijden

Wij Huijgh Dingman Mathijs zone ende Cornelis Adriaen Rombouts zone schepenen ter ǁ Heijden, oirconden dat voir ons quam Jan Godert Henrick Mathijs zone, ende lijde dat hij vercoft ǁ heeft om een somme van gelde die hem vol ende al betaelt is Jannen Jan Peter Braets zone, ǁ een stuck lants houdende omtrent een half buijnder, oft alzoo groot ende cleijn alst gelegen ǁ is ter Heijden tZonzeel inde Zandtschragen, oostwaert aen der Tafele sHeijlichs Geests ǁ oft der armen tot Breda erve, zuijtwaert aen Anthonis Andries Domaes zoons erve, ǁ daer over men met dit vercofte stuck lants wegende is ende eenen erfgebruijckwech heeft ǁ tot aenden Zonzeelschen wech toe uut ende in, alzoo de voirgenoemde Jan Godert Henrick Mathijs ǁ zone vercooper zeijde, westwaert aen Daem Adriaen Lambrechts zoons erve, ende noortwaert ǁ aen Dingman Aerts zoons erve, te vrijen ende te waren tvercofte stuck lants voirs. ǁ met drie ende een half ort stuvers erfchijns te heeren chijns, daer jaerlicx uutgaende, ǁ zonder ennigen anderen commer, behoudelick den voirgenoemde Dingmannen Aerts zone ende ǁ Willemen van Dijependale met hon erven die zij hier achter hebben liggende honnen erfgebruijckǁwech over dit vercofte stuck lants, ende dan voirts over des voirgenoemde Anthonis Andries ǁ Domaes zoons erve oick tot aenden voirs. Zonzeelschen wech toe uut ende in, in welck ǁ vercofte stuck lants voirs. de voirgenoemde Jan Jan Peter Braets zone gevest is ende toegedaen ǁ met vonnis ende met recht, zoo dat hem zeker is ende vast, met vorwaerde dat hij hier ǁ af doen zal alle gebuerlick recht, in oirconden desen brieve met onse zegelen bezegelt ǁ int jaer ons heeren duijsent vijfhondert vijfentzestich, drie dage in aprille. ǁ v.d. Corput ǁ

In dorso:

Jan Jan Peter Braets ǁ