Den Haag

D'eerste ende andere Raeden van Brabant onder ǁ de geunierde provintien allen den geenen die dese onse brieven sullen sien oft hooren lesen salut, doen ǁ te wetene dat wij ontfangen hebben de supplicatie van vrouwe Anna geboren gravinne vander Marck abdisse ǁ des vrijen keijserlijcken ende wereltlijken stifte Thooren, inhoudende hoe dat sij suppliante als impetrante ǁ van mandament van reformatie proces voor desen raede uuijtstaende heeft, op ende tegens schouteth ǁ schepenen ende regeerders vanden dorpe van Baerl inden lande van Breda, als geinthimeerde int selve cas ǁ waer inne soo verre is geprocedeert dat opden negenthienden julij XVI^c negenthien de saecke is voldongen omme ex usdem actis ǁ getermineert te wordene an bene vel male welcken volgende oock van der geinthinieerdens wegen gedient is ǁ van acten ende munimenten dan alzoo parthijen onderlinge verdragen sijn metten anderen te comen in communiǁcatie ende haerlieder different int minnelijck aff te handelen, soo en souden sijlieden des geensints vermogen ǁ te doen sonder onse voorgaende admissie ende conge du court, midts welcken soo keerde haer de remonstrante tot ǁ ons inden voors. raede oitmoedelijcken biddende om de voors. opene brieven van conge du court in desen dienende ende ǁ gerequireert, waeromme soo eest dat wij desen aengesien wesende genegen ter bede vande vrouwe remonstrante ǁ ingevalle als boven geoorloft ende geconsenteert hebben, oirloven ende consenteren uuijt sunderlinge gratien bij desen ǁ onsen brieve dat de selve met haerder voors. weder parthije op ende aengaende den voors. processe ende materie van ǁ reformatie sal mogen appoincteren ende overcomen, ende dat doende scheijden uuijt den voorscreven raede sonder eenige ǁ pene oft amende, behoudelijck dat t' voors. proces de gemeene saecke oft ons nijet anders aen en gae dan voorde ǁ voors. pene ofte amende alleenlijck, ende dat de voors. vrouwe remonstrante gehouden sal sijn het dobbel oft ǁ copie vanden accorde binnen ses weecken naer dat tselve accord sal sijn gedaen te sendene inde greffie vanden ǁ voors. raede, ontbieden daeromme eenen ijgelijck die t'selve roeren ende aengaen sal moegen dat zij de voors. ǁ vrouwe remonstrante ende reformante van deser onser tegenwoordige gratien, oirlove, en consent inder ǁ voegen ende manieren boven verclaert, peijselijck ende vredelijck te doen ende laten genieten ende gebruijcken, ǁ cesserende alle beletten ter contrarien, want wij bevonden hebben t'selve alsoo te behoorene, gegeven in ǁ s'Gravenhage onder den segel vanden voors. raede hier aen doen, drij dagen inde maendt van februario, int jaer ǁ ons heeren duijsent ses hondert eenentwintich ǁ bij de voors. eerste ende andere raeden ǁ

In dorso:

 M ǁ numero 17 ǁ