Baarle-Nassau

Wij Joost Henrickx sone van Ghilse ende Henrick Jans sone Verhoeven, schepenen in Baerle onder onsen heere van Nassau, ǁ oirconden dat voor ons quam, Aert Henrick Aert Jacops sone van der Voirt, ende lyde dat hy vercoft heeft om een somme van geld ǁ die hem vol ende al betaelt is, Adrianen Jan Jacops zone vander Voirt sijnen neve, vijf karolus gulden ende seven stuyvers, elcken karolus gulden ǁ tot veertich grooten vleems t siaers erfchyns, te gelden ende te betalen, den voors. Adrianen ende synen nacomelingen, alle jaer op Lichtǁmisse, ende d'yerste chynsdach daer af sal syn te Lichtmisse anno XV^C tweentsestich Ludicx style naestcomende, uut ende op ǁ syn helft scheydinge hem Aerden voorgenoemd toebehoorende. In ende van een stuck beemden houdende int geheel omtrent een buynder ǁ daer af de wederhelft scheydinge Engelen Aert Jacops dochter vander Voirt zynder moeyen, wittige huysfrou Cornelis Jan Zwanen ǁ soons toebehoort, zoo wy verstonden. Alsoo groot ende cleyn als 't geheel stuck beemden voirs. gemeyn ende ongedeelt gelegen is tot Baerle ǁ inde Vloet eensdeels onder Nassou ende eensdeels onder de abdisse van Thoren, oostwaert aen Bastiaen Adriaen Puetincx zoons erve ǁ suytwsaert aen Claes Claes Schuts zoons erve, westwaert aen Henrick Berthels van Looven erve, ende noortwaert aen s heeren ǁ Vreente, te vrijen ende te waeren den onderpant voirs. mette helft van derdalf oort stuyvers erfchyns der voirs. abdisse van ǁ Thoren daer jaerlycx voor uutgaende zonder ennigen anderen voircommer . Ende om de vercofte vijf karolus guldens ende zeven stuyvers ǁ erfschyns voirs., beter te versekeren, zoo heeft de voirgenoemde Aert Henrick Aert Jacops zone van der Voirt daer af noch t’onderǁpande geset ende sedt tonderpande met desen. Een zester rogs t’siaers erfpachts d'welck de voirgenoemde Cornelis Jan Zwanen zone ǁ ende Engele Aert Jacops dochter van der Voirt zyn huysfrou uut hon stede ende erffenisse tot Baerle aenden Rueth gelegen hem Aerden ǁ voorgenoemd jaerlycx ende erffelyck uutreycken nae uutwysen des schepenen briefs in Baerle daer af fynde. Ende noch een halfter ǁ rogs erfpachts, d'welck Jan Jan Houtermans zone, uut syn stede ende erffenisse tot Baerle toordeel gelegen hem Aerden Voirgenoemd ǁ jaerlycx ende erffelyck uuytreyct nae uuytwysen oick der brieve ende bescheyde daer af zynde, al zoo wy verstonden, welcke ǁ twee erfpachten by hem tonderpande geset synde voirs., de voirgenoemde Aert Henrick Aert Jacops zone vander Voirt geloofde ǁ te vryen ende waeren, vry ende loss van alle voorcommer, met voorwaerde dat men de vercofte vyff Karolus gulden ende zeven ǁ stuyvers erfschyns voirs. altyt lossen ende afquyten sal mogen met tachtentich karolus gulden ´t stuck tot veertich groten ǁ vleems eens te geven opten chynsdach voirs. ende metten verschenen chynse, sonder yet meer te geven, in welcke vercofte ǁ vyf karolus gulden ende seven stuyvers t’siaers erfchyns voirs., de voorgenoemde Adriaen Jan Jacobs sone gevest is ende toegedaen met ǁ vonnis ende met recht soo datse hem seker syn ende vast, met voirwaerde dat hy hier af doen sal alle gebuerlyck recht. In ǁ oirconden desen brieve met onse segelen besegelt soo verre als wy wysers sijn, Int jaer ons heeren duysent vijff ǁ hondert eenentsestich, achthien daege in meerte. ǁ