Brussel

Philips bijder gratie Goids coninck van Castillien Leon Arragon Navarre Naples Cecillien ǁ Maillorcaque Sardeyne vanden eijlanden van Yndien ende vaster eerden der zee occeane, eertzhertoghe van Oistenrijck hertoge van Bourgoingnen Lothringen Brabant Limborch Luxembourg ǁ Geldre ende van Milanen, grave van Habsbourg van Vlaenderen van Arthois van Bourgoingnen, Palsgrave ende van Henegauwe van Hollandt Zeelandt Namen ende van Zutphen ǁ prince van Zwave, marcgrave des Heijlichs Rijcx, heere van Vrieslandt van Salins van Mechelen, vander stadt steden ende landen van Utrecht, Overyssel ende Groeninghen ǁ ende dominateur in Asien ende in Affricaquen, Allen denghenen die dese onse brieven sullen zien oft hooren lesen saluijt doen te wetene dat wij ter oitmoedigher ǁ beden ende supplicatien van Jan Wouters sone van Goorp, ende de dochter van wijlen Henrick de Wolff zijn huijsvrouwe, woonende tot Baerle, onder d‘landt van Breda, beijde ǁ van wettighen bedde geboren ende geprocreert, den selven supplianten geoirloeft gewillecort ende geconsenteert hebben, Oirloven willecoren ende consenteren uuijt sunderlingher ǁ gracien bij desen onsen brieve voer ons onse erven ende nacommelinghen hertoghen ende hertoghinnen van Brabant, dat zij gesamenderhandt oft elck besunderen op ende van allen hueren ǁ goeden die zij iegenwoordelijck in onsen voors. lande van Brabant hebben, eensamentlijck oijck die zij bij versterve coope ghifte ende anderssints inden selven onsen lande naemaels ǁ vercrijgen sullen, zoe wel van hueren leengoeden van ons onsen erven ende nacommelinghen als hertoghen van Brabant ende vanden smalen heeren te leene gehouden, als oijck van ǁ hueren eijgene goeden, erffgoeden, chijnsgoeden, Uckelsche goeden, Sinte Geertruijden goeden haeffelijcke goeden, vercregene goeden, ende andere hoedanich die zijn oft wezen moghen, ǁ sullen moghen maken ende ordineren huere testament oft uuijtersten wille, het zij voer notaris ende getuijgen, voer schepenen, mannen van leene, onder huere hanteecken, oft ǁ anderssints, alzoe hen dat gelieven ende goetduncken zal, ende bij den selven testamente huere goeden in al oft in deele maken gheven ende laten, oft erffelijcke oft lijffrenten daerop ǁ bewijsen hueren kinderen in bruederlijcker ende susterlijcker deijlinghen, oft anderen hueren vrienden ende maghen ende andere daer ende alzoe hen dat gelieven ende goetduncken zal, ǁ ende dat altoes moghen, meerderen, minderen, ende veranderen, allet nae huerer gelieffen ende goetduncken, Ende tvoors. heure testament oft uuijtersten wille dwelck zij ǁ alzoe maken sullen, oft alreede gemaeckt moghen hebben, wij geconfirmeert, gewillecort, ende geapprobeert hebben, confirmeren willecoren ende approberen alsnu voer alsdan met ǁ desen onsen brieve, voer ons onse erven ende nacommelinghen voors., willende dat tzelve van machten ende weerden zij blijve ende gehouden wordde teeuwighen daghen, ende dat huer ǁ voors. goeden ende insgelijcx de voors. renten, lasten ende commeren daerop volghen, hueren voors. kinderen vrienden, maghen ende anderen dien zij die bij den selven hueren testamente oft ǁ uuijtersten wille gemaeckt gegeven ende gelaten sullen hebben, in alder vueghen ende manieren oft zij voer der heeren hoven ende nader bancken rechten daer aff die voors. goeden gehouden ǁ ende onder gelegen zijn, daer inne geguedt ende geerft waeren, Behoudelijck dat nader supplianten afflijvicheijt, deghene dien deselve supplianten huere voors. goeden oft renten daerop ǁ alzoe sullen hebben gemaeckt, gegeven, oft gelaten (soe verre zij die aenveerden willen) gehouden sullen zijn deselve goeden oft renten tontfanghene ende ons ende den smalen ǁ heeren, daeraff die rueren ende gehouden zijn, te doene alletgene des zij ons ende den voors. smalen heeren, naer onss ende huers hoeffs recht, schuldich zijn van doene ǁ hier inne versien dat de voors. supplianten bij hueren voors. testamente oft uuijtersten wille nijet en sullen moghen disponeren van hueren voors. leengoeden oft erffelijcke  goeden ǁ binnen onsen voors. lande van Brabant geleghen, tot behoeff van ennighen kercken Goidtshuijsen cloosteren oft andere doode handen in ennigher manieren, Ontbieden daerom ende ǁ bevelen onsen drossaet van Brabant, stadthouderen van onsen leene ende allen anderen onsen ende der voors. smaelre heeren, rechteren justicieren dieneren mannen van leene  ǁ schepenen lathen ende ondersaten ons voors. landts van Brabant hueren stedehouderen nu zijnde ende namaels wesende, ende allen anderen dien dat eenichssints aengaen ǁ mach ende elcken van hen besunder, dat zij de voors. supplianten van deser onser tegenwoordige gracien oirlove consente confirmatie ende approbatie peijselijck ende vredelijck ǁ doen ende laeten genijeten ende gebruijcken, ende voorts der voors. supplianten testament oft uuijtersten wille dwelck zij inder manieren voors. maken sullen oft alreede gemaeckt ǁ mogen hebben, voer goet vast gestantich van machten ende weerden houden ende doen houden teeuwighen daghen doende denghenen dien deselve supplianten ennige goeden oft renten daerop ǁ sullen hebben gemaeckt gegeven oft gelaten, dijer rustelijck ende vredelijck genijeten ende gebruijcken, sonder hen daerjegens ennighen hinder stoot oft beleth te doene oft te laten ǁ geschieden nu noch in toecommende tijden in enniger manieren, nijettegenstaende ennighe costumen gewoonten oft lantrechten ter contrarien, want ons alzoe gelieft, ende ǁ des toirconden hebben wij onsen zeghel hier aen doen hangen, Gegeven in onser stadt van Bruessele zeventhien daghen inde maent van julio, int jaer ons Heeren duijsent ǁ

vijffhondert ende vierentzeventich. Van onsen rijcken te wetene van Spaingnen Cecillien etcetera tXIX^e, ende van Naples etcetera tXXV^e. ǁ

Op de pliek:

Bij den coninck ǁ Houwere ǁ

Op de zegelstaart:

[***] ǁ