Den Haag

D'eerste Presiderende ende andere Raeden van Brabant, ǁ Allen den genen die desen sullen sien ende hooren leesen, zaluijt, wij hebben ontfangen de supplicatie van Catarina Verelst, weduwe van ǁ Jochemssen Verhiel ende met haer Jasper Verhiel ende Guilliam vander Vloet voorliden respective over de kinderen van voor- en naerbedde ǁ van den gemelten Jan Jochemssen Verhiel, innehoudende dat den voors. Jan Jochemsen Verhiel op den seven en twintichsten junij 1676 tot Baerle ǁ Nassauw onder den lande van Breda deser werelt is komen te passeren, naerlaetende veele schulden, soo dat sij supplianten niet geerne den selven boedel ǁ voor hennen respective wesen souden aenvaerden simpelijck ende sonder beneficie van inventaris. Soo keerden de supplianten haer aen ons inden ǁ voors. Raede (soo sij seijden) versoeckende onse provisie van beneficie van inventaris, addresserende aen wethouderen van Baerle Nassauw in desen dienende ǁ Waeromme soo ist, dat wij desen aengesien genegen wesende ter bede der voors. supplianten in de voors. qualite, de selve hebben geoorlooft gewillekeurt ǁ ende geconsenteert, oorlooven willekeuren, ende consenteren uijt sonderlinge gratie bij desen onsen brieve, dat sij onder beneficie van inventaris ende in dier ǁ qualiteijt als vooren, sullen mogen apprehenderen ende aenvaerden het sterfhuijs ende alle de goederen actien, schulden ende crediten bij Jan Jochemssen ǁ achter gelaeten, mits bij den Officier dien dat behooren sal ende daertoe geroepen de crediteuren vande voors. sterfhuijse ende andere die daeromme ǁ sullen behooren geroepen te sijn, goeden ende deuchdelijcken inventaris doen maecken. Behoudelijck dat daer niemant anders en sij vanden geslachte ǁ van de voirs. Jan Jochemsen Verhiel die hem simpelijck ende sonder 't voirs. beneficie van inventaris voor sijne erfgenamen dragen willen ǁ ende dat de voirs. supplianten gehouden sullen sijn den selven inventaris te maken ende volmaken binnen veertich dagen nae de impetratie ǁ van desen ende den selven inventaris volmaeckt sijnde, de goeden van den voirs. sterhuijse te doen estimeren bij luijden geexperimenteert, geeedt ǁ ende daertoe geordonneert ofte te ordonneren bij den wethouderen van Baerle Nassauw ofte ter plaetse daer onder de voirs. goeden gelegen sijn ende ǁ naervolgende deselve estimatie ofte waerderinge te stellen suffisante cautie ende borchtochte van wel te bewaren de voirs. goeden omme daer ǁ mede den crediteuren ende legatarisen soo der sijn te voldoen, soo dat behoort aleer de voirs. supplianten eenige apprehensie sullen mogen doen ǁ op paene van gehouden te wesen voor simpele erfgenamen, indien sij eenige apprehensie deden, sonder te observeren de de solemniteijten hier ǁ boven geroert. Onder welcke voirs. cautie sullen de voors. supplianten hebben ende behouden 't gebruijck van de goeden van den voirs. sterfhuijse ǁ sonder dat deselve supplianten boven de waerde van de voirs. goeden ijet meer gehouden sullen sijn te betalen. Ontbieden daeromme ende ordonneren ǁ mits desen alle officieren dienaren van justitie ende d'onderdanen onder de jurisdictie vanden voirs. Raede resorterende ende heure ǁ stedehouderen dien dat eenichsints aengaen sal mogen, dat den voirs. inventaris behoorlijck volmaeckt de voirs. cautie ende borchtochte ǁ gestelt, ende bij den genen dien dat behooren sal ontfangen ende geregistreert sijnde, sij den voirs. supplianten doen ende laeten volgen de ǁ voirs. achtergelaten goeden, actien schulden ende crediten, ende voorts van deser gratie ende beneficie van inventaris in der manieren ǁ boven verhaelt peijselijck ende vredelijck laeten genieten ende gebruijcken sonder haerl(uijden) daerinne te doen ofte laeten geschieden eenich hinder stoot ǁ ofte letsel ter contrarie. Ontbieden voorts ende committeren bij desen, den eersten deurwaerder daertoe bij de supplianten in der voirs. qualiteijt ǁ versocht sijnde te trecken aende persoonen ofte ter woonplaetsen van allen den crediteuren van den voirs. sterfhuijse die seecker ende bekent sijn ǁ ende henluijden van wegen d'Hooge Overicheijt dachvaert te compareren ofte gemachticht te senden t'eenen seeckeren gelegenen dage voor wethouderen ǁ van Baerle Nassauw voirs. ofte voorden Officier ende twee ofte meer schepenen ofte anderen vanden gerechte daer het sterfhuijs gevallen ǁ is, indien henluijden belieft, omme aldaer ende elders daer't van nooden wesen sal alle de goederen des voirs. sterfhuijs behoorlijck inventarieren ǁ deselfde goeden bij henluijden te sien estimeren volgende de voirs. ordonnantie ende inhouden van desen iegenwoordigen brieve ende cautie ǁ te stellen bij de voirs. suppliant soo 't behoort, dachvaert ofte inthineert mede bij openbare edicte ende uijtroepinge ter plaetsen daer men gewoon is ǁ publicatie te doen ten fine voirs. de andere onseeckere ofte onbekende crediteurs, indien daer eenige wesen mogen, mitsg(aders die gene die woonende ǁ sijn buijten onse jurisdictie van Brabant ende allen anderen die de voirs. brieven van beneficie van inventaris eenichsints sullen willen ǁ impugneren ende hen daer tegens opposeren die henluijden als crediteur van den voirs. sterfhuijse sullen willen ofte mogen fonderen authoriseren ǁ ende committeren wij u noch bij desen alle die selve crediteurs ende allen anderen die hem sullen willen opposeren soo wel die bij edicte ǁ als anders geroepen ende geinthineert sijn te dachvaerden ende dach beteeckenen voor onse lieve ende beminde wethouderen van Baerle Nassauw ǁ voirs. omme aldaer te compareren ofte gemachticht te senden ten eijnde de voirs. brieven van beneficie van inventaris te sien iterineren ǁ ofte debatteren. Die voirs. wethouderen pertinent relaterende u wedervaren den welcken wij ontbieden (daertoe committerende bij desen ǁ dat sij partijen gehoort, goet, cort vertogen recht doen ende expeditie van justitie. Gegeven in 's Gravenhage onder den zegel van ǁ voirs. Raede hier aen doen hangen, den vier en twintichsten julij sesthien hondert ses ende seventich. ǁ Bij d'voirs. Eerste Presiderende ende andere ǁ Raeden. ǁ N van der Haer 1676. ǁ

In margine:

Benefitie van inventaris ǁ