Alphen

Wij Jan Jan Schuermans zone ende Peeter Berthelmeeus Princen, schepenen in Alfen, oirconden dat voor ons quam Adriaen ǁ Laureijs Harmans zone, zoo voor hem zelven als inden naeme van Berthelmeeus Laureijs Harmans zijns broeders kijnder en ǁ deselve hijer in vervangende, ende lijde dat hij vercoft heeft om een somme van gelde die hem vol ende al betaelt ǁ is, Jannen Anthonis Sijmons zone, een gerecht vijfftedeel hen toebehoorende ende competerende in ende vande ǁ stede geheijten den Sterckenbosch, ende erffenisse met heure toebehoorte ende vanden erve daeraen liggende ǁ houdende omtrent twee ende een halff buijnder, ende noch in ende van tstuck lants houdende omtrent een ǁ buijnder in desen doorsteken schepenen brieve begrepen, daer aff de andere vijer vijfftedeelen te weten de twee ǁ den voorschreven Jannen ende zijne kijnderen, volgende desen doorsteken schepenenbrieve noch een den voorschrevenen ǁ Jannen cooper alleen, dwelck hij van Peeter Harman Jan Wiericx zone gecoft heeft zoo hij zeijde, ende ǁ dander Dingman Henrick Buicx kijnderen toebehooren ende competeren zoo wij verstonden, gemeijnende ǁ ongedeelt tot alsulcke stadt gestaen ende gelegen met gelijcken commer ende waernisse, ende ǁ voorts in alle der selver voorwaerden ende manieren soo als de brieff inhout ende begrijpt, daer dese brieff ǁ met onse zegelen besegelt doorgesteken is, wesende van date int jaer duijsent vijffhondert eenentach ǁ tentich zeven dage in meerte in welck vercoft vijfftedeel in ende vande stede ende erffenissen ǁ voors. de voorgen. Jan Anthonis Sijmons zone gevest is ende toegedaen met vonnis ende met recht zoo ǁ dat hem zeker is ende vast, met voorwaerde dat hij hijer aff doen zal alle gebuerlijck recht, in ǁ oirconden desen brieve met onse zegelen besegelt int jaer ons heeren duijsent zesshondert ende twee ǁ zeven dage in meije

Secretaris ǁ FA Dijrven