's-Hertogenbosch

Lambert Janssen van Doremaelen soo voor hem selven mede als man ǁ ende momboir van Maijke dochtere Peter Coenraet vande Staeck heeft wettelijck ende erffelijck vercocht Hendrica van ǁ Empel weduwe wijlen d'heer advocaet van Herlaer eenen Jaerlijcken ende erffelijcken chijns van vijff carolus gulden tot ǁ twintich stuijvers goet ganckbaer gelts Ieder gulden gereeckent ent te betaelen allen Jaer erstelijck opden achtentwintich ǁ sten Januarij ende voor den Iersten termijn van betaelinghe opden achtentwintichsten januarij CVIc drijent'sestich ende binnen ǁ s'hertogenbossche vrij van allen beden exactien subventien commeren schattinghe ende lasten Ingestelt ende noch naermaels ǁ ingestelt te worden egheene lasten vuijtgescheijden te leveren ende te vergelden van ende vuijt een stuck ackerlants groot ǁ acht loopense gelegen tot Moergestel ontrent het Clockven neffens erve der susteren van Orten aen d'een Zijde ende neffen ǁ erve Corstiaen Gielen aen d'ander sijde streckende vande gemene straet tot op erve der voorn. Susteren van Orten, vande ǁ selve Coopersse metten erffrecht te hebben ende te besitten ende heeft den voorn. vercooper den voors. chijns de voorn. coopersse ǁ opgedraeghen met helmelinghe vertijdenisse Inne manieren indien gewoonelijck sijnde, gelovende die voors. vercooper ǁ als schuldenaer principael op verbandt van sijnen persoon ende allen sijne goederen present ende toecomende dat hij de voorn. Henrica ǁ vanden voors. chijns altijt schuldich ende gerechte sall doen warantschappe ende allen anderen commer calangie ende aentael in het ǁ voors. onderpandt wesende ofte comende de voorn. Henrica altijt erst sal doen geheelijcke, vuijtgenomen eenen chijns ǁ van drije gulden aen voors. Coopersse, ende noch eenen chijns van drije gulden aen vrouw Comans sijnde beijde de voors. ǁ chijnsen in plaetse van een mud roggen reducibel ende daer voor betaelt werdende, item noch een loopense rogge aen ǁ de heer Boeckholt, ende dat hij oock het voors. onderpant voor de betaelinghe des voors. chijns de voorn. Henrica jaerlijcx ǁ daer vuijt alsvoor te vergelden altijt goet genoch ende weldeughende sall maecken ende houden, met conditien In desen ǁ toegedaen dat die voorn. vercooper den voors. chijns ten allen tijden sal moghen lossen ende quijten t'effens ende t'eenemael ǁ met de somme van hondert carolus gulden tot twintich stuijvers goet permissie gelts ieder gulden gereeckent ende ǁ met den loopende Jaerchijns ende achterstelle daer van t'achter ende onbetaelt staende, behoudelijck dat men schuldich ǁ ende gehouden sal sijn den los een halff Jaer te voorens wettelijck te vercondighen ende op te seggen. Getuijghen waeren ǁ hierover schepenen In s'hertogenbossche Johan vander Horst ende Arnoldt van Thienen, gegeven den thienden ǁ dach der maent maij int' jaer ons heeren duijsent sesshondert tweent'sestich

Dorsale aantekeningen:

Moergestel ǁ Constitutie van V gulden